Պիռլոյին համոզել ենք վերադառնա մեծ ֆուտբոլ, որ Առաջին լիգայում լեգեոներների պակաս չլինի. Վալերի Ալեքսանյան

Ծիծաղի միջազգային օրվա առթիվ ArmSport-ը կապ է հաստատել «Ուրարտու 2»-ի մարզիչ Վալերի Ալեքսանյանի կնոջ՝ Սիրանուշ Ալեքսանյանի հետ՝ խնդրելով նրան հարցաշար պատրաստել ամուսնու համար։ Հայաստանի հավաքականի նախկին ֆուտբոլիստն, իհարկե, այդ մասին չգիտեր ու կարծում էր՝ պատասխանում է մեր կայքի լրագրողի հարցերին։

-Վալերի՛, ինչպե՞ս է անցնում կյանքը կարանտինում։

-Դե, ինչպես բոլորինը․ գնում եմ գնումների և տուն։ Ինչպես նաև զբաղվում եմ մասնագիտականը բարելավելով։ Մոռացա նաև նշել, որ անպայման ամեն առավոտ 40 րոպե վազում եմ։

-Ինչպե՞ս եք բարելավում մասնագիտականը։

-Թուղթ ու գրիչի տեսքով։ Այսինքն՝ նոր վարժություններ եմ փորձում մշակել։

-Այ, օրինակ, նշեցիք, որ տնից դուրս եք գալիս միայն գնումներ անելու կամ վազելու նպատակով, բայց շշուկներ են տարածվել, որ երկրում գործող սահմանափակումներին չեք ենթարկվում․ քաղաքի տարբեր վայրերում Ձեզ ընկերների հետ տեսնողներ են եղել։

-Այդ շշուկներն իրականությանը չեն համապատասխանում։

-Իսկ շա՞տ դժվար է առավոտից երեկո կնոջ հետ տանը մնալը։

-Ընդհանրապես։ Ավելին ասեմ, դեռ այսքան ֆիլմ միասին չէինք դիտել։

-Մասնագիտականը բարելավելու մասին խոսեցիք, բայց չանդրադարձաք Ձեր նոր մտահղացմանն այն մասին, որ փորձում եք բիզնես սկսել՝ ֆուտբոլիստներ պատրաստել ու մատակարարել հայկական ակումբներին։ Դեռևս չե՞ք ցանկանում բարձրաձայնել այս տեղեկությունը։

-Ճիշտն ասած, դեռ չէի ուզում բարձրաձայնել, բայց որ արդեն ինֆորմացիայի արտահոսք կա, ուրեմն մի բան էլ ես ավելացնեմ․ արդեն նախնական համաձայնություն կա Պիռլոյի հետ, որին մեծ դժվարությամբ համոզեցինք վերադառնա մեծ ֆուտբոլ և կարիերան նոր թափով սկսի մեր Առաջին լիգայում, որպեսզի լեգեոներների պակաս չլինի։

-Ձեր որդին՝ Արտյոմը, նույնպես ֆուտբոլային ուղին է ընտրել․ նրա որակներն ու հեռանկարն ինչպե՞ս կգնահատեք։

-Այ, այս հարցը պետք է չտայիք (ծիծաղում է՝ խմբ․)։ Շատ խիստ եմ Արտյոմի նկատմամբ, չեմ սիրում գովել, բայց որ հարցրեցիք, չեմ կարող չասել, որ մեծ հույսեր ունեմ ու կարծում եմ, որ առաջ Աստված, մոտ ապագայում հզոր ֆուտբոլիստ ենք ունենալու։

-Իսկ վերջում մի հարց-խնդրանք․ պատրաստվում ենք ֆուտբոլիստների կանանց մասնակցությամբ ֆիլմ նկարահանել ու որպես գլխավոր հերոսուհի դիտարկում ենք Ձեր կնոջը։ Նկարահանումները տեղի են ունենալու Տավուշի մարզում ու տևելու են ընդամենը երկու ամիս։ Նշեմ, որ մեծ հոնորարի հույսեր կան։ Կտա՞ք Ձեր համաձայնությունը։

-Տարիներ առաջ այսպիսի առաջարկներ ունեցել է։ Այն ժամանակ երիտասարդ եմ եղել, մերժել եմ, թույլ չեմ տվել գնա, իսկ հիմա եթե համաձայնեք այդ ֆիլմում մի դեր էլ ինձ տալ, մեծ հաճույքով կգանք (ծիծաղում է՝ խմբ․)։ Իսկ միայնակ՝ իհարկե ոչ։

Հ․Գ․ Ալեքսանյանն, ըստ ամենայնի, հարցազրույցի ընթացքում գուշակել էր դրա հումորային բնույթը, բայց չէր հանձնվում՝ շարունակելով պատասխանել հարցերին։

Հարցազրույցի նպատակը բացահայտելուց հետո վերջինս փորձեց գուշակել հարցերի հեղինակին, սակայն այդպես էլ ճիշտ անունը գտնել չկարողացավ։ 

Ըստ Ալեքսանյանի՝ հարցաշարը կազմել էր կա՛մ Գևորգ Կասպարովը, կա՛մ Հրայր Մկոյանը։

Ստելլա Բաբլոյան