Չեմպիոնների լիգան վերադառնում է նոր ձևաչափով։ 2021 թվականին գերակումբների կողմից Սուպերլիգա ստեղծելու անհաջող փորձից հետո ՈւԵՖԱ-ն փոփոխություն է մտցրել Եվրոպայի գլխավոր ակումբային մրցաշարում։
Փոփոխությունները, կարծես, ոչ ոքի դուր չի եկել։ Մարզիչներն ու ֆուտբոլիստները դժգոհ են հանդիպումների մեծ քանակից, իսկ երկրպագուները չեն հասկանում նորամուծությունները և պահանջում են վերադարձնել հին օրհներգը։
Այսօր՝ սեպտեմբերի 17-ին, Չեմպիոնների լիգայի 1-ին տուրի շրջանակում Թուրինի «Յուվենտուսը» տանը կհյուրընկալի հոլանդական ՊՍՎ-ին:
Հանդիպումը կմեկնարկի Երևանի ժամանակով 20։45-ին։
- Կրկնակի հաղթողն ընդդեմ 1988 թվականի չեմպիոնի
- ՊՍՎ-ն նախորդ մրցաշրջանում հասել էր մինչև 1/8 եզրափակիչ
Հանդիպման մրցավարը՝ Ալեխանդրո Էրնանդես
Չնայած նրան, որ երկու ակումբներն էլ պարբերաբար մասնակցում են Չեմպիոնների լիգային, սա կլինի նրանց առաջին հանդիպումը պաշտոնական խաղում։
Չեմպիոնների լիգայի շրջանակում շուրջ 11 տարի անընդմեջ ելույթ ունենալուց հետո թուրինցիները բաց թողեցին 2023/24թթ․ մրցաշրջանը, սակայն արագորեն վերադարձան՝ նպատակ ունենալով հաղթել այս մրցաշարում:
Թուրինցիների երեկվա մարզումներից*
«Անհամբերությամբ ենք սպասում հանդիպման մեկնարկին: Դա յուրահատուկ երաժշտություն է, յուրահատուկ օրհներգ, և մենք ուրախ կլինենք կրկին լսել այն մեր երկրպագուների հետ: Չեմպիոնների լիգան փորձառություն է պահանջում: ՊՍՎ-ն ուժեղ թիմ է, որտեղ հավաքված են փորձառու ֆուտբոլիստներ: Նրանք կազմակերպված և որակյալ ֆուտբոլ են ցուցադրում»,- Մանուել Լոկատելիի խոսքերն է մեջբերում ՈւԵՖԱ-ի պաշտոնական կայքը։
Հպարտ ենք, որ ունենք այսպիսի մրցաշարի մասնակցելու հնարավորություն: Ուրախ ենք, որ խաղում ենք տանը: Անհամբերությամբ եմ սպասում այս գրավիչ խաղին: Պետք է լավ ֆուտբոլ ցուցադրենք հանուն մեզ և մեր երկրպագուների: Ինձ դուր է գալիս ՉԼ-ի նոր ձևաչափը: Խաղալու ենք մի շարք թիմերի հետ: Դա ուրախացնող է, քանի որ կարող ենք ինչ-որ նոր բան սովորել»,- ասել է թուրինցիների գլխավոր մարզիչ Տիագո Մոտտան:
«Ինձ անչափ հետաքրքիր է նոր ձևաչափը: Նախորդ տարի մեր թիմի մի շարք ֆուտբոլիստներ դեռ նոր էին ծանոթանում Չեմպիոնների լիգային, սակայն հիմա պատկերն այլ է: Նրանք ավելի փորձառու են դարձել»,- ասել է ՊՍՎ-ի գլխավոր մարզիչ Պետեր Բոսը:
«Մոտտան բարձրակարգ մարզիչ է: Երախտապարտ եմ նրան, քանի որ հենց նա ինձ շատ բան է սովորեցրել: Ես նույնիսկ հաղորդագրություն եմ ուղարկել նրան, երբ նա գլխավորեց «Յուվենտուսը»,- նշել է հոլանդական ակումբի կիսապաշտպան Յերդի Սհաութենը:
Ով կխաղա
«Յուվենտուս»՝ Դի Գրեգորիո, Դանիլո, Գատի, Բրեմեր, Կամբյասո, Թյուրամ, Դուգլաս Լուիս, Գոնսալես, Կոմպեյներս, Յիլդիզ, Վլահովիչ
Հարցականի տակ են՝ Կոնսեյսաու, Միկիլ
ՊՍՎ՝ Բենիտես, Լեդեսմա, Ֆլամինգո, Բոսկալյի, Դամս, Տիլ, Սհաութեն, Վերման, Բակայոկո, Դե Յոնգ, Տիլման
Չեն խաղա՝ Լանգ, Լոսանո, Կարսդորպ, Օպեգոր
Հարցականի տակ են՝ Դեստ, Մաուրո Ժունիոր, Օբիսպո
