Արգենտինական «Բոկա Խունիորսը» նվաճել է աշխարհի ակումբային առաջնության ուղեգիր, որը կկայանա ԱՄՆ-ում 2025 թվականի ամռանը։ Վերջին անգամ Բուենոս Այրեսի ակումբը աշխարհի ակումբային առաջնությանը մասնակցել է 2007 թվականին։
Աշխարհի գալիք ակումբային առաջնությունում հայտնվելու մասին հայտնի դարձավ երեկ երեկոյան՝ Լիբերտադորեսի գավաթի 1/8-րդ եզրափակչում ուրուգվայական «Նասիոնալ Մոնտեվիդեոյի», արգենտինական «Սան Լորենցո դե Ալմագրոյի» և «Տալերեսի» դուրս մնալուց հետո։
«Բոկա Խունիորսը» դարձավ 2025 թվականի Աշխարհի ակումբային առաջնության 30-րդ մասնակիցը։ Մնացած երկու ուղեգրերը կբաշխվեն ընթացիկ Լիբերտադորեսի գավաթի հաղթողի և մրցաշարը հյուրընկալող երկրի թիմի միջև:
Հիշեցնենք, որ աշխարհի ակումբային հաջորդ առաջնությունը կանցկացվի ԱՄՆ-ում 2025 թվականի հունիսի 15-ից հուլիսի 13-ը թարմացված ձևաչափով։ Մրցաշարում առաջին անգամ հաղթանակի համար կպայքարեն 32 թիմեր։
