«Տոտենհեմն» ամենաակտիվ ակումբներից մեկն է անգլիական ակումբների շրջանում այս ամառային տրանսֆերային պատուհանի ժամանակ։
Թիմի կազմում այս ամառ որոշակի փոփոխություններ են սպասվում։ Այս պահի դրությամբ լոնդոնյան ակումբն արդեն երեք տրանսֆեր է ձևակերպել։ Թիմի բոլոր նորեկները երիտասարդ, հեռանկարային ֆուտբոլիստներ են։ Թվում է, որ Դանիել Լևին արդեն սկսել է թիմի կազմի երիտասարդացման գործընթացը։
«Տոտենհեմի» կազմն այս ամառ համալրել են հետևյալ ֆուտբոլիստները․
Արչի Գրեյ (Անգլիա) — կենտրոնական կիսապաշտպան, տեղափոխվել է «Լիդսից» 41 մլն եվրոյի դիմաց
Լուկաս Բերգվալ (Շվեդիա) — կենտրոնական կիսապաշտպան, տեղափոխվել է «Յուրգարդենից» 10 մլն եվրոյի դիմաց
Յան Մին Հյուկ (Հրվ․ Կորեա) — վինգեր, տեղափոխվել է «Գանգվոնից», տրանսֆերի արժեքի մասին տեղեկություն չկա
Թիմի բոլոր նորեկները 18 տարեկան են։ Արչին համարվում է անգլիական ֆուտբոլի ամենահեռանկարային ֆուտբոլիստներից մեկը։ Նույնը կարելի է ասել Բերգվալի մասին՝ շվեդական ֆուտբոլի շրջանակում։ Իսկ ահա հարավկորեացի նորեկը թիմին կմիանա միայն հունվարին։
Լոնդոնյան ակումբի երիտասարդական թիմից հիմնական թիմին է միացել նաև 19-ամյա հարձակվողական ոճի կիսապաշտպան Ալֆի Դևինը, որը համարվում է տեղի ակադեմիայի ամենատաղանդավոր ֆուտբոլիստներից մեկը։ Ակումբը նաև երկարաձգել է «Լայպցիգի» գերմանացի հարձակվող Տիմո Վերների վարձակալության ժամկետը։
Հավանական տրանսֆերներ
«Տոտենհեմն» այսքանով չի պատրաստվում սահմանակվել այս տրանսֆերային պատուհանի ընթացքում։ Ակումբը պատրաստվում է ձևակերպել ևս 3-4 տրանսֆեր։
«Տոտենհեմը» հետաքրքրված է «Քրիսթալ Փելասի» հարձակվողական ոճի կիսապաշտպան Էբերեչի Էզեի և «Վուլվերհեմփթոնի» հարձակվող Պեդրո Նետուի ծառայություններով: Այս մասին հայտնում է TEAMtalk-ը։ Սակայն, ինչպես շեշտում է աղբյուրը, լոնդոնյան ակումբը պետք է ծախսի 128 միլիոն ֆունտ (151,7 միլիոն եվրո) այս ֆուտբոլիստներին գնելու համար։ «Տոտենհեմը» կարող է մրցակցել այլ ակումբների հետ: Օրինակ՝ Էզեի ծառայություններով հետաքրքրված է նաև «Մանչեսթեր Սիթին»։ Ըստ ԶԼՄ-ների՝ լոնդոնյան թիմին կարող է միանալ Ֆեդերիկո Կիեզան «Յուվենտուսից»։ Իսկ ահա Էմերոսոն Ռոյալի՝ թիմից հեռանալու դեպքում, անգլիական ակումբը կդիտարկի «Մոնակոյի» պաշտպան Վանդերսոնի տեղափոխության հնարավորությունը։ Թիմի տրանսֆերային նպատակներից մեկն էլ Սքոթ Մաքտոմինայն է ՄՅՈՒ-ից։ Հարձակվող Դոմինիկ Սոլանկեն, ում տրանսֆերային իրավունքները պատկանում են «Բորնմուտին», ևս կարող է տեղափոխվել «Տոտենհեմ»։ Այս մասին հայտնել է ինսայդեր Ֆաբրիցիո Ռոմանոն։ Նախորդ մրցաշրջանում ֆուտբոլիստը մասնակցել է Անգլիայի առաջնության 38 հանդիպման, որոնցում դարձել է 19 գոլի և երեք գոլային փոխանցման հեղինակ։ Դոմինիկի տրանսֆերային արժեքը գնահատվում է 40 միլիոն եվրո։
Հնարավոր է, որ բացի վերը նշված ֆուտբոլիստներից, «Տոտենհեմը» ևս մի քանի նոր տրանսֆերային նպատակներ ևս կունենա, քանի որ թիմից դեռ կարող են հեռանալ որոշ ֆուտբոլիստներ։
Անգլիական ակումբն այս ամառ արդեն ունի կորուստներ։ Էրիկ Դայերը, Ռայան Սեսենյոնը, Տանգի Նդոմբելեն, Իվան Պերիշիչը և Տանգանգան լքել են թիմը՝ բոլորն էլ ազատ գործակալի կարգավիճակով։ Գումար վաստակել հաջողվել է միայն Ջո Ռոդոնի տրանսֆերից «Լիդս»՝ մոտ 12 մլն եվրո։ Իսկ ահա Բրայան Ժիլը և Պյեր-Էմիլ Հոյբերգը վարձավճարով համապատասխանաբար տեղափոխվել են «Ժիրոնա» և «Մարսել»։ Թիմից, ինչպես վերևում արդեն նշեցինք, դեռ կարող են հեռանալ որոշ ֆուտբոլիստներ։ Էմերսոն Ռոյալի ծառայություններով հետաքրքրված են Իտալիայում, իսկ Ռիշարլիսոնին ակումբը կփորձի շահավետ առաջարկի դիմաց վաճառել Սաուդյան Արաբիայի ակումբներից մեկին։
Վար Բաբայան
