Ավարտվեց ԵՎՐՈ-2024-ի խմբային փուլն ու հայտարարվեց երկօրյա դադար։ Ընթացիկ ԵՎՐՈ-ն հասցրեց զարմացնել, հուզել և տպավորել։ Եղան անակնկալներ, բացահայտումներ, հիասթափություններ և իհարկե, երազանքի իրականացում՝ վրացական երազանքի իրականացում։
Առաջարկում ենք վերհիշել ԵՎՐՈ-2024-ի խմբային փուլի ընթացքում գրանցված պատմական իրադարձությունները, հետաքրքրաշարժ դեպքերը, սենսացիաները և հիասթափությունները։
Վրացական հեքիաթը շարունակվում է․ Վրաստանը՝ ԵՎՐՈ-2024-ի սենսացիա և բացահայտում
Խմբային փուլը դեռ նոր է ավարտվել, սակայն կարող ենք փաստել, որ Վրաստանը հասցրեց դառնալ ընթացիկ ԵՎՐՈ-ի զարդը, բացահայտումը․․․ էպիտետները կարող եք դուք շարունակել։ Վրացիները փոխեցին իրեց տեղն ու դերը ֆուտբոլային աշխարհում, ջնջեցին հինը և գրեցին նորը՝ ոսկե տառերով։
Ո՞վ կպատկերացներ, որ մեր հարևանները հերիք չէ կհայտնվեն ԵՎՐՈ-ի խմբային փուլում, մի բան էլ կնվաճեն փլեյ-օֆֆի ուղեգիր՝ հաղթելով Պորտուգալիային։ Նրանք նույնիսկ այսքանով չեն բավարարվել, ընթացիկ ԵՎՐՈ-ի խմբային փուլի լավագույն ռմբարկուն նույնպես վրացի է՝ Ժորժ Միկաուտաձեն։ Վրաստանը շարունակում է սավառնել, հիանալ և հիացնել։
Հիասթափություններ եվ անակնկալներ
ԵՎՐՈ-2024-ի մեկնարկից առաջ բազմաթիվ փորձագետներ մրցաշարի ֆավորիտ էին համարում Անգլիային և Ֆրանսիային։ Սակայն այս երկուսը, մեղմ ասած, չարդարացրեցին սպասելիքները՝ ունենալով լավագույն երկու կազմերը։ Պատկերացնու՞մ եք՝ Ֆրանսիան և Անգլիան ամբողջ խմբային փուլի ընթացքում միասին խփել են ընդամեը 4 գոլ․ այո-այո ձեր աչքեր ձեզ չեն խաբում՝ 4 գոլ։ Ավելին, ֆրանսիացիները դեռևս խաղից չեն կարողացել դառնալ գոլի հեղինակ։ «Եռագույնների» կազմում միակ գոլը հեղինակել է Մբապեն՝ 11 մետրանոցից, իսկ մյուս գոլն էլ եղել է ինքնագոլ։
Շոտլանդական անեծքը դեռևս շարունակվում է․ Շոտլանդացիները շարունակում են իրենց տխուր ավանդույթները՝ երբեք չհաղթահարելով որևէ խոշոր մրցաշարի խմբային փուլի արգելքը։
Իտալիան ևս որոշեց աչքի ընկնել ԵՎՐՈ-2024-ում որևէ նոր ու արտասովոր բանով։ «Սկուադրա աձուրայի» պաշտպան Ռիկարդո Կալաֆյորին ԵՎՐՈ-ների պատմության առաջին ինքնագոլը «պարգևեց» իր թիմին՝ գրավելով սեփական դարպասը։
Իսպանիան դարձավ ընթացիկ ԵՎՐՈ-ի միակ թիմը, որն առանց բաց թողած գոլերի և ցնցումների մի շնչով հաղթահարեց խմբային փուլի արգելքն ու դուրս եկավ փլեյ-օֆֆ։
Չմոռացվող միջադեպեր
Ֆրանսիայի հավաքականի առաջատարը և միգուցե Եվրո-2024-ի գլխավոր աստղը՝ Մբապեն, առաջնության առաջին տուրի՝ Ավստրիայի հետ խաղում կոտրեց քիթն ու դուրս մնաց շարքից։ Ֆրանսիացուն նույնիսկ նորմալ քթով չէին տրվում գոլերը ԵՎՐՈ-ներում, էլ ուր մնաց ստացած վնասվածքից հետո։ Սակայն Մբապեն վերադարձավ ու կոտրեց այդ սառույցը՝ Լեհաստանի դեմ խաղում խփելով իր առաջին գոլը Եվրոպայի առաջնություններում։
Համացանցում օրեր առաջ հայտնվել էր մի տեսանյութ, որում Ֆիլիպ VI-րդը՝ տպավորված Լամին Յամալի խաղից, խաղացողին հանդերձարանում հարցնում է, թե քանի՞ տարեկան է, իսկ պատասխանը լսելուց հետո ուղղակի չի կարողանում թաքցնել զարմանքը։ Այո, Եվրոպայի առաջնությանը նաև հետևում են թագավորները։
Ավստրիայի կանցլեր Կառլ Նեհամերը չցանկացավ հետ մնալ Ֆիլիպ VI-րդից։ Հավաքականի՝ խմբային փուլը առաջին տեղով հաղթահարելուց հետո Նեհամերը այցելեց ազգային թիմի հանդերձարան և սելֆի արեց ֆուտբոլիստների հետ։
Երկրպագուները ֆուտբոլի գույնն ու շուք հաղորդողն են
Ալբանական պարն ու գերմանացի ոստիկանները․ Հավաքականների մակարդակում ցանկացած խոշոր մրցաշար սպորտային համատեքստից զատ տարբեր ազգերի ու ժողովուրդների միավորող մեծ ուժ ունի։ Օրինակ՝ էլ ե՞րբ կարող էիք Գերմանիայի պես կարգապահ երկրում տեսնել, որ ոստիկանները պարում են օտարերկրացիների հետ։ Հենց այս համընդանուր ֆուտբոլային կիրքն է, որը միավորում է մարդկանց և պարգևում դրական էմոցիաներ։
Թուրք-վրացական բախում Գերմանիայում․ ԵՎՐՈ-2024-ը ամեն առումով պատմական ստացվեց Վրաստանի համար։ Վրացիները բացի դինամիկ ֆուտբոլից հասցրեցին նաև աղաղակել խաղադաշտի սահմաններից դուրս։ էլ ի՞նչ խոշոր մրցաշար առանց ծեծ ու ջարդի։
«Սիգնալ Իդունա Պառկը» Թուրքիա-Վրաստան (3։1) խաղի ժամանակ վերածվել էր թուրք-վրացական ռազմադաշտի։ Համաձայնվեք, որ նման բան ամեն օր չի, որ կտեսնես։
Գինովցած անգլիացու արկածները․ ԵՎՐՈ-2024-ի Անգլիա — Սերբիա խաղից (1։0) հետո անգլիացի գինովցած երկրպագուն գիշերեց Գելզենկիրխենի «Վելտինս Արենա» մարզադաշտում։ Տեսանյութում նա արթնանում է առավոտյան ժամը 4։00-ին ու հասկանում, որ միայնակ է մնացել։ Զարմանալի է, թե ինչպե՞ս ստյուարդներն ու ոստիկանները չեն նկատել նրան։
Շոտլանդացիները Գերմանիայում անգլիացիներին թողեցին առանց գարեջրի․ Շոտլանդացիները դժգոհ են իրենց հավաքականից, բայց ոչ գերմանական գարեջրից։ Շոտլանդիայի հավաքականը Եվրո-2024-ում աչքի ընկավ թույլ և անատամ խաղով ու կրկին չկարողացավ հաղթահարել խմբային փուլի արգելքը։ Ֆուտբոլիստների փոխարեն իրենց մասին խոսել տվեցին երկրպագուները։ Շոտլանդացիները Քյոլնում ընդամենը 3 օրում սպառեցին գարեջրի ամբողջ պաշարը՝ մոտ մեկ միլիոն լիտր գարեջուր։
Հունգարական երկրաշարժ․ ԵՎՐՈ-2024-ի խմբային փուլի վերջին տուրի խաղում Հունգարիան խաղի հիմնական ժամանակին ավելացված 9-րդ րոպեին ուղղակի պոկեց հաղթանակը շոտլանդացիներից։ Հաղթական գոլից հետո այնքան մեծ էր հունգարացի երկրպագուների ցնծությունը, որ «Շտուտգարտ Արենան» բառից բուն իմաստով սկսեց ցնցվել ու շատերին թվաց, թե երկրաշարժ է։
Վրացի երկրպագուները ոչ միայն կարողանում են մասնակցել ծեծ ու ջարդի, այլ նաև կարողանում են հաղթանակները բուռն նշել։ Վերջիններս անցած ամբողջ գիշերը Թբիլիսիում մեծ խանդավառությամբ տոնել են ԵՎՐՈ-2024-ի փլեյ-օֆֆ դուրս գալն ու Պորտուգալիայի նկատմամբ տարած պատմական հաղթանակը։
Դե ինչ, արդեն հայտնի են փլեյ-օֆֆի բոլոր զույգերը։ Շատ հավաքականներ իրենց աստղերի հետ արցունքն աչքերին հրաժեշտ տվեցին ԵՎՐՈ-ին։ Շատերի համար սա վերջինն էր, իսկ շատերի համար առաջինը։ Այսպիսին է սպորտը՝ եթե չլինեն պարտվողներ, չեն լինի նաև հաղթողներ։ Իսկ մեզ՝ երկրպագուներիս համար ֆուտբոլային տոնը շարունակվում է․․․
Սուրեն Սահակյան