Մեկ ամիս «Արմենիա» հեռուստաընկերության եթերը ֆուտբոլային է լինելու. հունիսի 14-ից հուլիսի 14-ը ցուցադրության բացառիկ իրավունքով «Արմենիա TV»-ն և Armenia Premium-ը հայ հեռուստադիտողին կներկայացնեն Եվրո-2024-ի՝ ֆուտբոլի Եվրոպայի առաջնության բոլոր 51 հանդիպումներն՝ ուղիղ հեռարձակմամբ:
Ֆուտբոլային, ուրախ և հագեցած եթերի սպասումով
«Արմենիա TV»-ի պրոդյուսեր Ռոբերտ Մարտիրոսյանի խոսքով՝ բացի բուն ֆուտբոլային հանդիպումներից հունիսի 14-ին՝ բացման խաղից առաջ, հեռուստատեսության եթերում կլինի talk show՝ հայտնի աստղերի և մեկնաբանների մասնակցությամբ, որով կազդարարվի Եվրո-2024-ի բացումը: Նմանօրինակ հաղորդում նախատեսված է նաև հուլիսի 14-ին՝ եզրափակիչ խաղից առաջ, որի ընթացքում հայտնի հյուրերն ու մասնագետները կամփոփեն Եվրոպայի առաջնությունը, կանեն իրենց կանխատեսումները՝ Եվրոպայի ուժեղագույն թիմի վերաբերյալ:
«Ընդ որում, նախատեսում ենք, որ հաղորդմանը ներկա լինեն նաև եզրափակիչ անցած թիմերի երկրպագուները: Վստահ ենք՝ ֆուտբոլային հիանալի մթնոլորտն ապահովված կլինի: Մեկ ամիս մենք ապրելու ենք ֆուտբոլով: Խաղերը մեկնարկելու են ժամը 17:00-ից: Բոլորին սպորտային, ուրախ և հագեցած եթեր ենք խոստանում»,- ասում է Ռոբերտ Մարտիրոսյանը:
Նրա խոսքով՝ Եվրո-2024-ի շրջանակում յուրաքանչյուր օր՝ ժամը 22:00-ին, «Արմենիա TV»-ի ուղիղ եթերում կլինի «Ֆուտբոլի ժամը» հաղորդումը, որը կվարի մարզական մեկնաբան, լրագրող Ռոբերտ Գասպարյանը:
«Հյուրընկալելու ենք տարբեր փորձագետների, հայտնի հյուրերի, որոնց հետ քննարկելու ենք օրվա ֆուտբոլային հանդիպումները, սպասվող և արդեն կայացած խաղերը: Դիտելու ենք նաև օրվա հանդիպումների գոլերի տեսանյութը»,- պատմում է Ռոբերտ Մարտիրոսյանը:
Եվրո-2024-ի մեկնաբանական քառյակը
Եվրոպայի 2024 թվականի առաջնության հանդիպումների ընթացքում կաշխատի 4 մեկնաբան՝ Էդուարդ Քալանթարյան, Արմեն Գարամյան, Արման Աբելյան և Էռնեստ Շաբոյան: Մինչև կիսաեզրափակիչ փուլը՝ մեկնաբանները կաշխատեն առանձին, իսկ կիսաեզրափակիչներում ու եզրափակչում՝ զույգերով:
Մարզական մեկնաբան Էդուարդ Քալանթարյանը հույս է հայտնում՝ ֆուտբոլի երկրպագուները լավագույնս կվայելեն Եվրոպայի առաջնությունը:
«Կարծում եմ՝ բավականին լավ կազմ ենք հավաքել ու կկարողանանք երկրպագուներին գոհացնել: Յուրաքանչյուր խոշոր մրցաշար ինքնին առանձնահատուկ է, որովհետև ոչնչով նման չի լինում նախորդներին: Տեսնում ենք նոր թիմեր ու մեզ համար նոր մարտահրավեր է՝ այդ թիմերին ներկայացնել յուրովի: Շատ բարձր տրամադրությամբ պատրաստվել ենք ու մենք ևս, հուսով եմ, կվայելենք մեր աշխատանքը Եվրո-2024-ի ընթացքում: Բոլոր ֆուտբոլասերներին հաճելի մեկ ամիս եմ մաղթում: Հուսով եմ՝ կվայելեն Եվրոպայի առաջնությունը, մենք էլ ամեն ինչ կանենք դրա համար: Բոլոր հավաքականներն արժանի են, որպեսզի իրենց խաղը դիտվի, քանի որ Եվրոպայի առաջնության եզրափակիչ փուլերում թույլ թիմեր և թույլ հանդիպումներ չեն լինում»,- ասում է Էդուարդ Քալանթարյանը:
Նրա խոսքով, խոշոր մրցաշարերը՝ անկախ նրանից Չեմպիոնների լիգա է, թե Եվրոպայի կամ աշխարհի առաջնություն, առանձնահատուկ են մեկնաբանների համար, քանի որ նմանօրինակ մրցաշարերը, թերևս, այն գագաթնակետն է, որին մեկնաբանները կարող են հասնել իրենց աշխատանքային գործունեության ընթացքում:
Էդուարդ Քալանթարյանն անդրադարձել է նաև Եվրոպայի առաջնությունից ունեցած սպասելիքներին:
«ԵԱ-ի հայտացուցակներն արդեն վերջնականանում են, սկսում ենք ուսումնասիրել ու աշխատել կազմերի շուրջ: Հայտացուցակներն ուսումնասիրելուց հետո Անգլիայի հավաքականն ինձ համար դադարել է ակնհայտ ֆավորիտ լինելուց, քանի որ տարօրինակ ընտրություններ կան մարզչի կողմից: Կարծում եմ՝ Ֆրանսիայի և Պորտուգալիայի հավաքականներն այս պահի դրությամբ գլխավոր ֆավորիտներն են:
Որ թիմն ամենամեծ անակնկալը կմատուցի՞. հավակնորդներ շատ կան, բայց կարծում եմ՝ ինչ-որ առումով այս առաջնությունում «կկրակի» Հունգարիայի հավաքականը»,- եզրափակում է Էդուարդ Քալանթարյանը:
Վիկտորինա՝ Play Station 5 շահելու հնարավորությամբ
ԵԱ-ից անմասն չեն մնա նաև սոցիալական ցանցի օգտատերերը: Առաջնության շրջանակում՝ Ucom ընկերության հետ համատեղ, «Արմենիա TV»-ն ֆեյսբուքյան էջում կազմակերպելու է վիկտորինա-մրցույթ: 20 օր շարունակ «Արմենիա»-ի հեռուստաեթերի սիրված դերասաններն ու հայտնի դեմքերը հարցեր են ուղղելու երկրպագուներին: Մրցույթին լավագույնս մասնակցած 10 օգտատերերն այնուհետև հյուրընկալվելու են «Բարի լույս» հաղորդաշարին, իսկ ուղիղ եթերում հարցերի միջոցով ընտրվելու է մեկ մասնակից, որը Ucom ընկերության կողմից արժանանալու է գլխավոր մրցանակին՝ Play Station 5 խաղային համակարգին:
«Արմենիա TV»-ն՝ Magic Moments LLC-ի հետ համատեղ, Եվրո-2024-ի առաջնության հանդիպումների համար կազմակերպելու է նաև համատեղ դիտումներ Անգլիական այգում՝ մեծ էկրանին: Այստեղ հավաքված երկրպագուներին նաև անակնկալ է սպասվում. «Արմենիա TV»-ի «դեմքերի հավաքականը»՝ 10 հայտնի ու սիրված կերպարների լուսանկարներով պաստառ … ինչո՞ւ 10, որովհետև 11-րդ խաղացողը կարող եք հենց Դուք լինել: Պաստառի մեկ կերպարը բաց է լինելու՝ լուսանկարվելու համար:
Հիշեցնենք՝ Եվրո-2024-ը կանցկացվի հունիսի 14-ից հուլիսի 14-ը Գերմանիայի 10 քաղաքներում։
