Մոսկվայի «Դինամոյի» և «Զենիթի» նախկին դարպասապահը, իսկ այժմ՝ Հայաստանի հավաքականի դարպասապահների մարզիչ Ռոման Բերեզովսկին MatchTV-ի հետ հարցազրույցում խոսել է մարզչական կարիերայի սկզբի, ինչպես նաև Հայաստանի հավաքականի՝ Եվրո-2024-ի ընտրական փուլում գրանցված արդյունքների մասին։
— Ինչպե՞ս առաջարկ ստացաք Հայաստանի հավաքականից:
— «Փյունիկում» աշխատելու ժամանակ էր։ Ինձ ծանոթացրեցին մարզիչների հետ, և ես դեմ չէի։ Միաժամանակ սկսեցի սովորել մարզչական արտոնագրի համար, իսկ ակումբի համար ժամանակ չմնաց։
Ուսումս ավարտելուց հետո ազգային հավաքականի և ֆեդերացիայի մարզիչներին հարցրեցի՝ արդյոք դեմ չեն, որ նորից աշխատեմ ակումբում։ Հիմա մի քանի ամիս է, ինչ աշխատում եմ «Նոա» ֆուտբոլային ակումբում։
— Որտե՞ղ եք վերապատրաստում և պրակտիկա անցել։
— Մենք գնացինք Իսպանիա UEFA Pro արտոնագրի համար: Մենք հետևել ենք ինչպես իսպանական գրանդ ակումբների, այնպես էլ միջին մակարդակի ակումբների աշխատանքին ու ենթակառուցվածքներին։ «Ռեալն» այս առումով ամենամեծ ակումբն է՝ ենթակառուցվածքների գերազանց մակարդակ, դաշտերի քանակ և աշխատակիցների ընտրություն:
— Ռուսաստանում կա՞ն նմանատիպ ենթակառուցվածք ունեցող ակումբներ:
— ԱԱ-2018-ից հետո շատ լավ ստադիոններ են մնացել։ «Կրասնոդարն» իմ կարծիքով մյուսներից ուժեղ է զարգանում։ Տեսեք, թե որ մարզադաշտում է խաղում երկրորդ թիմը։
— Գլխավոր մարզիչ լինելուց հետո դարձաք դարպասապահների մարզիչ։ Սա հետքա՞յլ է ձեզ համար:
— Ոչ, ես դրա վրա չեմ կենտրոնանում: Ինձ համար կարևոր է թիմն ու մարզչական շտաբը։ Շրջապատում պետք է լինեն մարդիկ, ում հետ ես ինձ հարմարավետ եմ զգում և որոնցից կարող եմ ինչ-որ բան սովորել։
— Շա՞տ էիք հիասթափվել, երբ Հայաստանի հավաքականը չկարողացավ Եվրո-2024-ի ուղեգիր նվաճել։
— Մի քիչ դժվար էր, քանի որ շանսերը կային մինչև վերջին տուրերը։ Վառ հանդիպումներ ունեցանք, օրինակ՝ Ուելսի հետ արտագն խաղը։ Եղավ նաև ձախողում Լատվիայի հետ (պարտություն՝ 0:2)։ Ցավալի է։ Լատվիայի հետ հանդիպումը բեկումնային դարձավ, ես ինքս չհասկացա, թե ինչպես դա եղավ։ Ես զգում էի, որ մենք ավելի ուժեղ ենք, բայց դա մեր օրը չէր։ Գլխավոր մարզիչն էլ հիվանդացել էր ու չկարողացավ կիրք փոխանցել թիմին։
— Կա նաև Ազգերի լիգան։ Ինչպե՞ս եք վերաբերվում այս մրցաշարին։
— Հայաստանի հավաքականի համար սա արդյունքի մրցաշար է, եթե հաշվի առնենք, որ մենք այժմ իջել ենք ցածր խումբ։ Նաև անհրաժեշտ է սերնդափոխություն իրականացնել ու շանս տալ երիտասարդ ֆուտբոլիստներին։ Բայց այնպիսի թիմի համար, ինչպիսին մերն է, արդյունքն առաջին տեղում է:
