Հայաստանի հավաքականի նախկին ֆուտբոլիստ Մարկոս Պիզելին Metaratings.ru-ին տված հարցազրույցում խոսել է Հենրիխ Մխիթարյանի մասին։
-Մխիթարյանը շուտ չավարտե՞ց կարիերան Հայաստանի հավաքականում:
-Կարծում եմ՝ նա շուտ հեռացավ։ Նա դեռ կարող էր օգնել, հատկապես հիմա, երբ լավ երիտասարդ տղաներ են եկել ու լավ թիմ է հավաքվել։ Ճանաչելով Հենրիխին ու նրա կերպարը՝ վստահաբար կարող եմ ասել, որ նա չի վերադառնա։ Ինձ համար անակնկալ էր, երբ Մխիթարյանն ավարտեց կարիերան Հայաստանի հավաքականում, բայց մենք պետք է հարգենք նրա որոշումը։ Հենրիխը զգաց, որ ավարտելու ժամանակն է։ Ափսոս, որ Հայաստանում այլևս չկան նման մակարդակի ու որակավորման խաղացողներ։
Իհարկե, Հայաստանը կկարողանա խաղալ առանց Մխիթարյանի, խաղադաշտում կա 11 խաղացող։ Մխիթարյանի` հավաքականից հեռանալու հետ կապված խնդիր չեմ տեսնում։ Առանց նրա էլ ներկայիս թիմը կարող է շատ բանի համար պայքարել ու շատ լավ ֆուտբոլ խաղալ։
– Հենրիխը գիտի մի շարք լեզուներ, նույնիսկ խոսում է պորտուգալերեն, քանի որ նա իր պատանեկության տարիներին խաղացել է Բրազիլիայում: Ձեզ հետ շփվե՞լ է պորտուգալերենով։
– Ոչ, մենք միշտ հայերեն ենք խոսել (ծիծաղում է): Հիմա էլ, երբ շփվում ենք WhatsApp-ով, նամակագրություն ենք անում անգլերեն, քանի որ հայերեն գրել չգիտեմ, դժվար է կարդալ։ Հենրիխը գիտի պորտուգալերեն, բայց ոչ այնքան լավ, հավանաբար, արդեն շատ բան է մոռացել։ Երբեմն կարող եմ կատակել նրա հետ պորտուգալերենով, բայց հիմնականում նրա հետ շփվում ենք հայերենով կամ անգլերենով։
— Նրան համարո՞ւմ եք հայկական ֆուտբոլի պատմության լավագույն խաղացողը:
— Ես կարծում եմ՝ այո։ Նա մեծ խաղացող է: Նա կարող էր հետևողականորեն պահպանել իր բարձր մակարդակը, չէր լինում, որ մտնեիր խաղադաշտ ու բացահայտ վատ խաղար։ Մխիթարյանը կարող է խաղալ պաշտպանությունում, հարձակման գծում, երբ պետք լինի, իր համար անսովոր դիրք կփակի։ Հավաքականում իմ ելույթներից սկսած մինչև այսօր Հայաստանում Մխիթարյանից լավ խաղացող չկա։ Այո, նրան կարելի է անվանել հայկական ֆուտբոլի պատմության լավագույն խաղացող։
— Բոլորը նշում է իր կրթությունն ու դաստիարակությունը։ Ունե՞ք անձնական պատմություն, որը լավագույնս բնութագրում է Մխիթարյանին:
— Նա հիանալի մարդ է: Երբ ես կարիք ունեի, որ ինչ-որ մեկը պարզապես խոսեր ինձ հետ, Հենրիխը միշտ արձագանքում էր: Նա և իր ընտանիքը աջակցում էին ինձ, նրա մայրը ինձ շատ էր օգնում (Մարինա Թաշչյանն աշխատում էր ՀՖՖ-ում՝ Metaratings.ru), երբ ես խաղում էի Հայաստանում։ Ինձ հետ շփվելիս նա միշտ հրաշալի մարդ է եղել։ Բայց երբ նա սկսեց խաղալ թոփ-ակումբներում, ամբողջ Հայաստանը սկսեց խոսել նրա մասին։ Նրա համար ավելի դժվար դարձավ, բայց ազգային հավաքականի տղաների համար նա ընդհանրապես չփոխվեց։ Նրա մասին վատ բան չեմ կարող ասել։ Նա միշտ աջակցում էր ինձ։
