Հայաստանի բռնցքամարտի հավաքականի գլխավոր մարզիչ Կարեն Աղամալյանը ամփոփել է հայ բռնցքամարտիկների ելույթները Լեհաստանում անցկացված Եվրոպական ամառային երրորդ խաղերում:
Հիշեցնենք՝ մրցումային 8-րդ օրվա արդյունքներով բռնցքամարտիկներ Արթուր Բազեյանն ու Գուրգեն Մադոյանը դուրս եկան քառորդ եզրափակիչ: Դեռևս քառորդ եզրափակչի ուղեգիր է նվաճել նաև Համբարձում Հակոբյանը:
«Իհարկե, հեշտ չէր, բայց երբ մարզիկը գործում է ազատ, ամեն ինչ ավելի դյուրին է ստացվում: Մադոյանին առհասարակ ասել էի դուրս գալ ռինգ ու անել այն, ինչ կարողանում է, ասել էի, որ իրեն ազատ զգա, չանհանգստանա, եթե պարտվի ու ավելորդ պատասխանատվություն չզգա: Ասել էի, որ իր բոքսը ցույց տա: Առանց որևէ խնդրի հաղթանակ տարավ: Ինքն էլ, Արթուրն էլ ցույց տվեցին իրենց կարգը: Ապրեն իրենք: Բազեյանն առաջին ռաունդի վերջից, և արդեն երկրորդ ու երրորդ ռաունդներում արեց այն, ինչ պետք էր ու այն, ինչ սպասում էինք իրենից: Վերջում մի փոքր շտապողականություն կար իր գործողություններում, բայց կարելի է ասել՝ էյֆորիայի մեջ էր: Լավ մենամարտ էր. հաղթեց առանց որևիցե կասկածի»,- ասում է մարզիչը:
Քառորդ եզրափակչում Բազեյանը վաղը կմենամարտի Բուլղարիայի ներկայացուցիչ Խավյեր Իբանեսի, իսկ Գուրգեն Մադոյանը՝ սերբ Վախիդ Աբասովի հետ: Հաղթանակների դեպքում՝ հայ բռնցքամարտիկները կապահովեն առնվազն բրոնզե մեդալ և օլիմպիական ուղեգիր: Անդրադառնալով այդ մենամարտերին՝ Կարեն Աղամալյանն ընդգծում է՝ տղաները լավ մարզավիճակում են ու կարող են շարունակել պայքարը:
Գլխավոր մարզիչն ամփոփել է նաև հայ մարզիկների՝ մինչ այս գրանցած արդյունքները: Հիշեցնենք՝ երեկ իրենց մեկնարկային մենամարտերն են անցկացրել Ռուդոլֆ Գարբոյանը (51 կգ) և Եվրոպայի առաջնության բրոնզե մեդալակիր Նարեկ Մանասյանը (92 կգ), որոնք, սակայն, պարտվել են ու դուրս մնացել հետագա պայքարից. «Նարեկը սխալ աշխատեց. մեկ ամիս առաջ հաղթել էր իսպանացուն,լավ մարզավիճակում էր՝ թե՛ ֆիզիկապես, թե՛ հոգեբանորեն, պարզապես սխալ աշխատեց: Գարբոյանի պարագայում մեք չենք պարտվել ոչ մի տեսանկյունից: Պարզապես մրցավարներն ուրիշ կերպ են մտածում: Նարեկն էլ, Գարբոյանն էլ պետք է հաղթեին իրենց մենամարտերում: Այսօր ոչ թե չորս-հինգ ներկայացուցիչ պետք է ունենայինք, այլ լինեինք ամբողջ կազմով: Ամեն դեպքում, ունենք այն, ինչ ունենք»:
Հիշեցնենք՝ այսօր երեկոյան Եվրոպական խաղերի 1/8 եզրափակչի իր մենամարտը կանցկացնի նաև աշխարհի փոխչեմպիոն, +92 կգ քաշային Դավիթ Չալոյանը՝ մենամարտելով չեխ Մարտին Պինչի հետ: Իսկ մինչ այդ պայքարի դուրս կգա Հայաստանի կանանց հավաքականի անդամ Տաթև Խաչատրյանը. նրա մրցակիցը կլինի ադրբեջանցի Մահսաթի Համզաևան:
