Լեհական Կրակովում մեկնարկել են Եվրոպական ամառային երրորդ խաղերը, որին Հայաստանը մասնակցում է ռեկորդային՝ 57 մարզիկով:
ArmSport-ը ևս Լեհաստանում է՝ հետևելու եվրոպական ամենամեծ մրցաշարերից մեկին:
Թեև մրցաշարն անցկացվում է Լեհաստանի 13 քաղաքներում, գլխավոր իրադարձությունները ծավալվելու են երկրի ամենահայկական ու գեղեցիկ քաղաքներից մեկում՝ Կրակովում: Ընդհանուր առմամբ Լեհաստանն այս 12 օրերի ընթացքում կհյուրընկալի շուրջ 50 երկրի ավելի քան 7 հազար մարզիկների:
Շուրջ 13 ժամ՝ դեպի Կրակով
Հենց այսքան պահանջվեց մրցավայր հասնելու համար. Հայաստանից մեկնած լրագրողներս նախ մեկնեցինք Վարշավա, որտեղ շուրջ 6 ժամ սպասելուց հետո ուղևորվեցինք Կրակով. Ճանապարհն, իհարկե, հոգնեցնող էր, բայց ամենադժվարներից չէր:
Ի դեպ, «Զվարթնոցում» հանդիպեցինք նաև Հայաստանի բռնցքամարտի հավաքականին, որը Կարեն Աղամալյանի գլխավորությամբ Կրակովում պայքարելու է Օլիմպիական վարկանիշների համար: Այո, Եվրոպական ամառային երրորդ խաղերը բռնցքամարտիկների համար վարկանիշային են Փարիզի ՕԽ-ի համար: Հավաքականի գլխավոր մարզչի խոսքով՝ սպասելիքները մեծ են , թեև ժամանակից առաջ ընկնել և կոնկրետ կանխատեսումներ անել չի ցանկանում:
Վարշավայից Կրակով մեկնող օդանավի ուղևորները գլխավորապես Եվրոպական խաղերի մասնակիցներն էին՝ այդ թվում Մեծ Բրիտանիայից, Բելգիայից, Շվեյցարիայից և եվրոպական մի շարք այլ երկրներից: Օդանավակայանում արդեն մեզ դիմավորեցին կամավորները, որոնք, իհարկե, պատրաստակամ էին օգնելու՝ հյուրանոց հասնելու համար, բայց միայն նշում էին, որ իրենք շատ ծանրաբեռնված են, չէին սպասում միաժամանակ այսքան մեծ թվով հյուրերի, իսկ հյուրանոցներ տեղափոխող ավտոբուսների վարորդները «անհետացել են և կապի դուրս չեն գալիս»: Լավ է, որ Կրակովում հասարարակական տրանսպորտն աշխատում է ժամացույցի ճշգրտությամբ, ամբողջական ինֆորմացիան հասանելի է նաև օնլայն, և հեշտությամբ կարողացանք հասնել քաղաք:
Մրցաշարի կազմակերպիչները հոգացել են ամեն ինչի մասին՝ ստեղծելով գրեթե բոլոր պայմանները լրագրողների աշխատանքն անխոչընդոտ կազմակերպելու համար: Միակ խնդիրը, թերևս, ավտոբուսներն են ու անընդհատ տեղափոխությունները՝ բոլոր մարզաձևերի մրցումներին հետևելու համար: Սա, իհարկե, ոչ միշտ հնարավոր կլինի, քանի որ քաղաքներն իրարից նվազագույնը 100 կմ հեռավորության վրա են գտնվում, և շատ հաճախ մրցումները մեկնարկելու են միաժամանակ:
Այսօրինակ խնդիրները փոքր-ինչ կարգավորելու նպատակով Կրակովի գլխավոր մեդիա կենտրոնում տեղադրված են շուրջ 10 էկրաններ, որոնց միջոցով ուղիղ հեռարձակմամբ ցուցադրվում են բոլոր մրցումները:
Կրակովի հանգստությունն ու ոչինչ «չկասկածող» բնակիչները
Կրակովում որպես այդպիսին հանդիպեցինք միայն մեկ ֆան-գոտու, որտեղ որոշակի ակտիվություն զգացվում էր, բայց ընդհանուր առմամբ քաղաքն ապրում է իր սովորական կյանքով, չկան որևէ հուշող պաստառներ, ցուցանակներ այն մասին, որ Լեհաստանում, ու մասնավորապես Կրակովում այսօր մեկնարկելու են Եվրոպական երրորդ խաղերը: Բնակիչները ևս անտեղյակ են, կամ էլ հետաքրքրված չեն. փաստն այն է, որ մեզ հանդիպած քաղաքացիները կա՛մ տեղյակ չէին սպասվող մրցաշարից, կա՛մ իրենք, տեսնելով մեր մարզահագուստներն ու բեյջերը, մոտենում էին մեզ ու հարցնում, թե այս ինչ է կատարվում ու ովքեր ենք մենք: Ի դեպ, այսպիսի հարց ստացել ենք նաև Վարշավայի օդանավակայանում՝ անձնագրերի ստուգման բաժնում:
Բացման արարողությունը
Արդեն այսօր Երևանի ժամանակով 22:30-ին կկայանա Եվրոպական ամառային երրորդ խաղերի բացման հանդիսավոր արարողությունը: Հայաստանի թիմի դրոշակակիրները կլինեն աթլետներ Լևոն Աղասյանն ու Գայանե Չիլոյանը:
Առաջին հաղթանակները Կրակովում
Թեև Եվրոպական ամառային երրորդ խաղերի բացումը դեռևս չի կայացել, այդուհանդերձ մի քանի մարզաձևերում արդեն կայացել են մրցումները: Մասնավորապես, Կրակովում արդեն իսկ անցկացվել է կայծակնային շախմատի Եվրոպայի զույգերի առաջնությունը, որտեղ Հայաստանի թիմն՝ ի դեմս Էլինա Դանիելյանի և Շանթ Սարգսյանի, նվաճել են չեմպիոնի տիտղոսը: Անհատական հաշվարկում Էլինան գրավել է առաջին, իսկ Շանթը՝ երկրորդ տեղը: Առաջնությանը մասնակցել են նաև Լեհաստանի, Ռումինիայի, Ուկրաինայի, Իսպանիայի և Իսրայելի թիմերը: Յուրաքանչյուր թիմ ուներ մեկ տղամարդ և մեկ կին մասնակից:
Մեր պատվիրակներից պայքարի են դուրս եկել նաև աթլետները, որոնք մասնակցում են թիմային պայքարի երրորդ դիվիզինում։
Մրցումային առաջին օրը հավաքականի առաջատար Լևոն Աղասյանը դարձել է եռամարտի երրորդ դիվիզիոնի հաղթող՝ 16,36 մ. արդյունքով զբաղեցնելով առաջին հորիզոնականը: Վազորդ Երվանդ Մկրտչյանն էլ այսօր 1500 մետր մրցատարածությունում 3:44:11 արդյունքով երրորդ դիվիզիոնում զբաղեցրել է 3-րդ հորիզոնականը:
