Առաջին խմբի ընթացիկ առաջնության չեմպիոնությունը նվաճեց «Վեստ Արմենիան», որն առաջնության ավարտից 1 տուր առաջ անհասանելի դարձավ մյուս թիմերի համար։
«Վեստ Արմենիան» արդեն ստացել է Fastex Հայաստանի Պրեմիեր լիգային մասնակցելու արտոնագիր ու հաջորդ մրցաշրջանում ուժերը կփորձի Բարձրագույն լիգայում։
2022–ին «Վեստ Արմենիան» մեկամյա դադարից հետո վերսկսեց իր ելույթները Առաջին խմբի առաջնությունում: Թիմի նորամուտը Հայաստանի առաջնությունում եղավ 2019 թվականին, սակայն այդ մրցաշրջանը մնաց անավարտ՝ կապված Առաջին խմբի մի շարք թիմերի կողմից պայմանավորված խաղեր անցկացնելով: 2020/21 մրցաշրջանում «Վեստ Արմենիան» զբաղեցրեց 4-րդ տեղը՝ իրենից առաջ թողնելով «Սևանին», ԲԿՄԱ-ին ու «Նորավանքին», իսկ նախորդ առաջնությանը չմասնակցեց:
ArmSport-ը զրուցել է թիմի գլխավոր մարզիչ Խորեն Վերանյանի հետ։
«Նախ ցանկանում եմ շնորհավորել «Վեստ Արմենիային» չեմպիոնության ու Պրեմիեր լիգայի ուղեգիր նվաճելու համար։ Շնորհակալություն եմ հայտնում իմ ֆուտբոլիստներին՝ իրենց կատարած աշխատանքի համար, մարզչական շտաբին՝ բարձր պրոֆեսիոնալիզմի համար, ադմինիստրատիվ կազմին, բժշկական անձնակազմին, հովանավորներին, նախագահին, տնօրինությանն ու բոլոր այն մարդկանց, ովքեր ջանք ու եռանդ չեն խնայել թիմի հաջողության համար»,–մեզ հետ զրույցում ասում է գլխավոր մարզիչ Խորեն Վերանյանը։
-Ինչպե՞ս կամփոփեք Առաջին խմբի առաջնությունը:
–Առաջնությունն անցավ լարված պայքարում։ Դիտարժան խաղեր շատ եղան ու մեզ հաջողվեց նվաճել չեմպիոնությունը։ Իմ կարծիքով ամենադիտարժան ֆուտբոլը մեր թիմն էր խաղում, ու մենք արժանիորեք գրավեցինք առաջին տեղը։
-Ինչո՞վ էր առանձնանում Առաջին խմբի այս առաջնությունը նախորդից, որին մասնակցել եք:
–Նախորդ առաջնությունն ավելի ուժեղ էր, քանի որ ավելի փորձառու ֆուտբոլիստներ էին խաղում։
— Ի՞նչ խնդիրներ եք տեսնում Առաջին խմբում, որ ձեր կարծիքով այսօր առաջնային ուշադրություն են պահանջում։
–Խնդիրն այն է, որ պետք է դուստր թիմերն ավելի շատ ժամանակ տան իրենց սաներին, որպեսզի ֆուտբոլիստներն ավելի շատ աճ գրանցեն։ Հուսով եմ, որ մի օր մեր ակումբն էլ կունենա ակադեմիա, ու մեր սաները կհամալրեն առաջին թիմը;
— Առաջին խմբի և Բարձարագույն խմբի խնդիրները տարբերվու՞մ են։
–Միանշանակ շատ են տարբերվում։ Պետք է շատ ավելի լավ սելեկցիոն աշխատանք տանել, որպեսզի պատշաճ ներկայանանք Պրեմիեր լիգայում։
— Մրցավարության մակարդակից ի՞նչ կասեք։
–Մրցավարությանն ընդհանրապես չեմ ցանկանա անդրադառնալ, ուղղակի կուզեմ շնորհակալություն հայտնել իրենց կատարած աշխատանքի համար։
-ՀՊԼ-ում մակարդակը անհամեմատ բարձր է Առաջին խմբից: Ի՞նչ փոփոխություններ են լինելու թիմում Պրեմիեր Լիգայում մրցունակ լինելու համար:
–Այո, մակարդակների տարբերությունը անհամեմատելի է։ Մենք կփորձենք պահել հիմնական կորիզն ու ուժեղացնել դիրքերը տեղացի ու արտասահմանցի ֆուտբոլիստներով։ Մի քանի օրից մեկնելու ենք արտասահաման, նախնական պայմանավորվածություն ունենք գործակալների ու ֆուտբոլիստների հետ։
-Ի՞նչ խնդիր է դրված թիմի առաջ:
–Թիմի առաջ խնդիր կա, որպեսզի առաջին տարում ամրապնդվենք Պրեմիեր լիգայում, բայց որպես մարզիչ մենք կանենք հնարավորն ու անհնարը, որպեսզի լավ հանդես գանք ու ուրախացնենք մեր երկրպագուներին։
— Լեգիոներների թվի սահմանափակման թեման անընդհատ քննարկվում է, հայ ֆուտբոլիստներն այսօր, ըստ ձեզ, տեղական ֆուտբոլում բավարար խաղաժամանակ ստանում են և մյուսը հարցը՝ մրցունա՞կ են։
–Այն տեղացի ֆուտբոլիստները, որոնք ընգրկված են թիմում, ստանում են այնքան խաղաժամանակ, որքան որոշում է մարզիչը։ Միանշանակ, կան շատ լավ հայ ֆուտբոլիստներ, ովքեր ավելի բարձր են կարգով շատ արտասահմանցիներից։
— Ֆուտբոլի զարգացման գործում նոր դաշտեր կառուցելուն զուգահեռ լսում ենք, որ որակյալ կադրերի, մարզիչների պակաս կա։ Դուք որպես մարզիչ ինչ գնահատական կտաք, նոր մարզիչներ պատրաստելուց բացի, մեր երկրում ունե՞նք պայմաններ, որ գործող մարզիչները պարբերաբար բարձրացնեն իրենց որակավորումը, ժամանակակից ֆուտբոլի պահանջներին համընթաց քայլեն։
–Պետք է հայ մարզիչների համար շատ սեմինարներ կազմակերպել արտերկրում, որպեսզի փորձենք քայլել ժամանակակից ֆուտբոլին համահունչ։ Պետք է կրթվել ու զբաղվել ինքնազարգացմամբ։
Երվանդ ՀԱԿՈԲՅԱՆ
