«Ուրարտուն» Vbet Հայաստանի գավաթի խաղարկության եզրափակչում հանդես կգա 9-րդ անգամ և կպայքարի իր պատմության 4-րդ գավաթը նվաճելու համար։ Մայիսի 8-ին թիմը «Հանրապետական» մարզադաշտում գավաթը կվիճարկի «Նորավանքի» հետ։
Ակումբի մամուլի ծառայությունն առաջարկում է վերհիշել՝ ինչպես «Ուրարտուն» նվաճեց նախորդ 3 գավաթները՝ սկսելով առաջինից, որի կրողը դարձավ 1992-ին։
ԱՄԵՆ ԻՆՉ ՍԿՍՎԵՑ ԳՈՅՈՒԹՅԱՆ ԱՌԱՋԻՆ ՏԱՐՈՒՑ
1992 թվականին անկախ Հայաստանի առաջին առաջնության մասնակից նորաստեղծ թիմերի շարքում էր նաև նույն թվականին ծնունդ առած «Բանանցը» (այժմ՝ «Ուրարտու»):
«Բանանցի» գլխավոր մարզչի պաշտոնն ստանձնել էր Վարուժան Սուքիասյանը, իսկ թիմում հանդես էին գալիս ժամանակաշրջանի լավագույն խաղացողներից Արմեն Գյուլբուդաղյանցը, Արա Նիգոյանը, Աշոտ Բարսեղյանը, Աշոտ Ավետիսյանը, Գևորգ Քամալյանը և այլք։ Թիմն այդ մրցաշրջանում 3-րդ հորիզոնականը գրավեց առաջնությունում և նվաճեց Հայաստանի գավաթը՝ դառնալով նորանկախ Հայաստանի առաջին գավաթակիրը։
ԳԱՎԱԹԸ ՆՎԱՃԵԼՈՒ ՃԱՆԱՊԱՐՀԸ
Գավաթի խաղարկության 1/16 եզրափակչում «Բանանցը» 6 անպատասխան գնդակ ուղարկեց «Ցեմենտի» դարպասը: 1/8 եզրափակչի խաղն ամենաբեկումնայինն էր. թիմը 2-0 հաշվով հաղթեց ուժեղագույններից մեկին՝ Երևանի «Արարատին»:
Քառորդ եզրափակչում մեր թիմը 2-1 հաշվով առավելության հասավ «Կիլիկիայի» նկատմամբ, իսկ կիսաեզրափակչում 6-2 հաշվով հաղթեց «Վանին» ու դուրս եկավ Գավաթի խաղարկության եզրափակիչ:
Վճռորոշ դիմակայությունը «Հրազդան» մարզադաշտում էր, որտեղ Վարուժան Սուքիասյանի տղաները 2-0 հաշվով առավելության հասան ՀՄԸՄ-ի նկատմամբ ու դարձան նորանկախ Հայաստանի առաջին գավաթակիրները։ Գոլերն էլ հեղինակեցին Արա Նիգոյանն ու Աշոտ Ավետիսյանը։
Արա Նիգոյանը պատմել է, թե ինչպիսինն էր գավաթի առաջին խաղարկության եզրափակիչը․
«Գավաթի եզրափակչում հաղթելու շատ մեծ ցանկություն ունեինք։ Ես վստահ էի, որ մենք հաղթելու ենք։ Շատ լավ թիմ ունեինք։ Մինչև եզրափակիչ հասնելը, պայքարից դուրս էինք թողել Երևանի «Արարատին», իսկ բոլորդ էլ լավ եք հասկանում, թե ինչ թիմ էր այդ ժամանակահատվածում։ Ինչ վերաբերում է խփածս գոլին, ապա կասեմ, որ մենք մարզումների ընթացքում շատ էինք աշխատում ստանդարտ իրավիճակների խաղարկման վրա, մշակած մի քանի տարբերակներ ունեինք, որոնց շնորհիվ կարողացել էինք շատ գոլեր խփել առաջնությունում»։
Հետագայում «Բանանցը» (այժմ՝ «Ուրարտու») ևս երկու անգամ դարձավ Հայաստանի գավաթակիր՝ 2007-ին ու 2016-ին: Հաջորդիվ կներկայացնենք, թե ինչպես թիմը նվաճեց գավաթային 2-րդ բարձունքը:
