VBET Հայաստանի Պրեմիեր լիգայի 27-րդ տուրում «Նորավանքը» հյուրընկալվել էր ԲԿՄԱ-ին ու նվազագույն հաշվով հաղթանակ տարավ։ Խաղից հետո լրագրողների հարցերին պատասխանեց հյուրերի գլխավոր մարզիչ Վահե Գևորգյանը։
-Գրեթե ամբողջ հանդիպման ընթացքում ԲԿՄԱ-ի հարձակվողները խնդիրներ էին ստեղծում Ձեր պաշտպանության համար։ Ի՞նչ կասեք Ձեր պաշտպանների ցուցադրած խաղի մասին։
-Խաղասկզբում մի փոքր լավ չէինք մտել խաղի մեջ․ ԲԿՄԱ-ն հասցրեց գոլային պահեր ստեղծել մեր դարպասի մոտ, հետո եղավ մեր գոլը ստանդարտից, հետո մենք ունեցանք պահ, ու ես չեմ հիշում պահ, որ ԲԿՄԱ-ի հարձակվողների կողմից խնդիրներ են ստեղծվել մեր պաշտպանների համար, այսինքն՝ տուգանայինում կամ տուգանայինի մատույցների մոտ։ ԲԿՄԱ-ն շատ լավ թիմ է, շատ լավ հարձակվողներ ունի, ու գրեթե անհնար է նրանց դեմ այնպես խաղալ, որ նրանք արագացումներ չանեն ու չմոտենան մեր տուգանայինի մատույցներին։ Ինչպես շեշտեցի՝ միակ խնդիրն այն էր, որ մենք խաղի սկզբում չէինք հասցրել մտնել խաղի մեջ։ Եթե Դուք խաղասկզբի առաջին երկու, երեք հարվածների մասին եք խոսում, համաձայն եմ Ձեզ հետ։ Բայց գոյություն ունի դաշտ, գոյություն ունի մրցակցին հարմարվել, նշանակություն ունի նաև այն, որ մենք մեկ օր քիչ էինք հանգստացել, իսկ այս 4-5-օրանոց ցիկլներում դա մեծ նշանակություն ունի։ Մրցակիցն ավելի թեթև էր, երևի դա եք ուզում ասել, այո, ես Ձեզ հետ համամիտ եմ։ Մեզ ժամանակ էր պետք, ու դրանից հետո՝ երկրորդ կեսում, ես մեր դարպասի մոտ վտանգավոր պահեր չեմ նշմարել։ Մենք երևի թե 4 ռեալ գոլային հնարավորություն ունեցանք։
-Պարո՛ն Գևորգյան, սովորաբար «Նորավանքի» խաղային ձեռագիրն այնպիսին է, որ գնդակ կորցնելիս, փորձում են արագ այն վերադարձնել, այսօր, կարծես, որոշակի խնդիրներ կային․․․
-Ճիշտ եք, ԲԿՄԱ-ն ինձ համար առաջնության ամենամոբիլ թիմերից մեկն է։ Հենց իրենք էլ կոնտրպրեսինգի վրա շատ լավ են աշխատում, շատ լավ են երկրորդ գնդակները հավաքում ու դրանից հետո իրենց մոտ անցումները շատ լավ են ստացվում։ Դժվարություններ կային․ դրանք կապում եմ ինչպես մրցակցի որակների, այնպես էլ մեր մինչև վերջ չվերականգնվելու հետ։ Բայց, կարծում եմ, երկրորդ կեսում նրանց մոտ այդ անցումները նրանց մոտ այնքան էլ չստացվեցին, մենք, երևի թե, խանգարեցինք։ ԲԿՄԱ-ն վերջին տեղերում է, բայց տակտիկական որոշ առումներով չի զիջում ոչ մի մրցակցի ու շատ լավ թիմ է։
-Եթե ճիշտ եմ նկատել, առաջին կեսում հատկապես Նորայր Նիկողոսյանի գործողություններից այնքան էլ գոհ չէիք, բայց այդպես էլ չփոխարինեցիք նրան։ Ի՞նչ կասեք նրա խաղի մասին։
-Առաջին կեսում դժգոհ էի։ Բնականաբար, մրցակցի մարզիչներն էլ են մեր խաղը վերլուծում ու պրեսինգ էին կիրառում հենց Նորայր Նիկողոսյանի վրա, որովհետև նա բացի երիտասարդ ֆուտբոլիստ լինելուց, նաև աջլիկ է, նրա ուժեղ ոտքը աջն է, բայց խաղում էր ձախ կենտրոնական պաշտպանի դիրքում, մենք մարզչական շտաբով որոշեցինք ոչ թե փոխարինել իրեն, այլև Ռուդոսելսկու հետ դիրքային փոփոխություն անել, ինչից հետո նրա մոտ վստահություն եկավ ու խաղն ավարտին հասցրեց։ Միգուցե մեկ այլ պարագայում փոխարինեի, բայց այսօր մենք առաջնությունում լիմիթ ունենք ու այս խաղին տեխնիկական խնդիրներով էինք մոտեցել՝ որոշ խաղացողներ նախորդ խաղին վնասվածք էին ստացել, եթե փոխարինեինք Նորայրին, դաշտ պիտի մտներ լիմիթներին համապատասխանող հայ ֆուտբոլիստ։ Մյուս կողմից շատ լավ եղավ, որ չփոպարինեցինք, որովհետև երկրորդ կեսում լավ ֆուտբոլ խաղաց ու դա նրան հետագայում ավելի շատ վստահություն կտա։
-Մրցավարի գործողություններից ամբողջ խաղի ընթացքում դժգոհ էիք, եթե կցանկանաք մեկնաբանել նրանց որոշումները․․․
-Զավեն Հովհաննիսյանը մեր ամենափորձառու մրցավարներից մեկն է, իհարկե, չեմ ցանկանա։ Բայց դա էմոցիա է․ պահ կա, որ ինքը կարող է սխալվել, պահ կա, որ ես կարող եմ այլ կերպ հասկանալ։ Բայց չեմ կարծում՝ այդքան շատ եմ դժգոհել։
-Խոսքը կարմիր քարտ պահանջելու դրվագի մասին է։
-Այո, ես էլի իմ կարծիքին եմ մնում, որ կար կարմիր քարտ։ Բայց գլխավոր մրցավարը նա էր, որոշում կայացնողն ինքն էր ու որոշեց, որ չկար։ Այդ դրվագն ավարտվել է։
-Արթուր Ավագյանի վնասվածքը որքանո՞վ ազդեց խաղի հետագա ընթացքի վրա։
-Չի կարող չազդել, որովհետև Արթուր Ավագյանը մեր ավագն է, մեր ամենափորձառու ֆուտբոլիստն է, երբ նա դաշտում է, թիմն ավելի հանգիստ է, նա ավելի շատ է զրուցում ֆուտբոլիստների հետ, ավելի շատ է կազմակերպում խաղը։ Բայց փոխարինման մտած ֆուտբոլիստները լավ աշխատեցին, հատկապես՝ Յեննե Տենտոնը, Էբերտն էլ լավ աշխատեց։ Ամեն դեպքում, Արթուրը մեր ավագն է, դրանով ամեն ինչ ասված է, չէր կարող չազդել։
-Գավաթի կիսաեզրափակչում հաղթանակն ի՞նչ ազդեցություն է ունեցել թիմի վրա։
-Կիսաեզրափակչից առաջ էլ թիմը շատ լավ հաղթանակ էր տարել։ Բայց կիսաեզրափակչում հաղթանակը թիմին վստահություն է տվել, բայց, կարծում եմ, ձմեռվանից հետո առհասարակ մենք շատ լավ ենք հանդես գալիս։ Ճիշտ է, պարտություններ ունենք, բայց խաղեր են եղել, որոնք պետք է անպայման հաղթած լինեինք։ Վերջին 5 խաղում մենք շատ լավ ենք հանդես եկել։ Թիմի պրոգրեսը շարունակական է ու կախված չէ կիսաեզրափակչից։
-Բազմիցս նշել եք, որ «Նորավանքի» համար Գավաթին տիրելը գլխավոր նպատակն է այս պահի դրությամբ, բայց չի բացառվում, որ նույնիսկ Գավաթին տիրելուց հետո չկարողանաք մասնակցել եվրագավաթներին՝ հաշվի առնելով ՈՒԵՖԱ-ի նոր կանոնակարգը։ Տեղյա՞կ եք այդ մասին, եթե այո, ե՞րբ եք տեղեկացվել։
-Ես նշել եմ, որ գործնականում մրցանակային տեղերի համար այլևս չենք կարող պայքարել ու հասկանում ենք, որ որպես եվրագավաթների համար պայքարելու միակ ճանապարհ մնում է Գավաթը, բայց դա չի նշանակում, որ առաջնության խաղերը մեզ համար պակաս կարևոր են, ու մենք ամեն խաղի դաշտ ենք դուրս գալու հաղթանակի համար։ Կարծում եմ՝ դա չի նշանակում, որ մեզ համար Գավաթի խաղերն ավելի կարևոր են, քան առաջնության խաղերը։ Ինչ վերաբերում է հարցին, ապա երևի թե 5-րդ 6-րդ անգամ մեդիայի հետ խոսում եմ այդ հարցի շուրջ․․․մենք դիմել կամ դիմելու ենք ՈՒԵՖԱ-ին, ես չեմ զբաղվում թղթաբանությամբ, որովհետև աշխարհում եթե ինչ-որ բանի նախադեպ կա, հնարավոր է, որ դա կրկնվի։ Կրկին մանրամասնեմ․ Հայաստանի առաջնության 2018/19 մրցաշրջանում մեր չեմպիոն «Արարատ-Արմենիան» ուներ պորֆեսիոնալ առաջնությունների մասնակցության ընդամենը երկու տարվա փորձ, «Նորավանքը» ևս երկու տարվա փորձ ունի, ո՞րն է այս երկու ակումբների տարբերությունը, ինչո՞ւ պիտի չմասնակցի։ Մենք սպասելիքներ ունենք։ ՈՒԵՖԱ-ն կորոշի, որ պիտի մասնակցենք, կմասնակցենք։ Կորոշի, որ չպետք է մասնակցենք, չենք կարող ՈՒԵՖԱ-ի հետ կռիվ անել, կհամակերպվենք որոշման հետ։ Սա է մեր դիրքորոշումը։ Բայց մեզ համար բոլոր խաղերը հավասարաչափ կարևոր են։ ԲԿՄԱ-ի հետ այսօրվա խաղն ինձ համար հավասար կարևոր էր, որքան ամսի 8-ի Գավաթի եզրափակիչը։ Հիմա մեր ամենակարևոր խաղը, մեր թիմի հաջորդ խաղն է։