Vbet ՀՊԼ-ի 26-րդ տուրում «Արարատը» 1-2 հաշվով պարտվեց «Փյունիկին»։
Հանդիպումից հետո իր թիմի ցուցադրած խաղի մասին խոսեց «Արարատի» գլխավոր մարզիչ Էդգար Թորորսյանը։
«Լավ խաղ ստացվեց։ Դաշտում հավասար պայքար էր ծավալվում։ Թե՛ թիմային պաշտպանությունը, թե” հարձակումն այսօր լավ էին գործում։ Առաջին բաց թողած գոլի դրվագում կենտրոնացվածության պակաս կար, ոչ պարտադիր գնդակ էր։ Երկրորդ գոլի դրվագում մի քանի ֆուտբոլիստներ սայթաքեցին, ընկան, որից հետո խփված գոլը որոշեց խաղի ելքը։
Ամեն դեպքում, տղաների կատարած աշխատանքից և պայքարից շատ գոհ եմ, քանի որ ամեն ինչ տվեցին դաշտում»։
Թորոսյանը պատասխանեց նաև ArmSport-ի հարցերին․
-Պարոն Թորոսյան, դուք նշեցիք, որ պաշտպանների ցուցադրած խաղից գոհ եք։ Ամեն դեպքում, եղան մի քանի դրվագներ, որոնց ընթացքում ձեր պաշտպանները թերացան և չէին կարողանում վնասազերծել մրցակցի հարձակվողներին։ Պնդու՞մ եք, որ լավ խաղ եք ցուցադրել պաշտպանությունում։
-Ֆուտբոլ է, չի կարող այնպես դասավորվել, որ մեր դարպասին ընդհանրապես պահ չստեղծվի։ Երկրորդ խաղակեսի վերջնամասում հոգնածության պատճառով որոշ խնդիրներ եղան, բայց ընդհանուր թիմային պաշտպանությունից գոհ եմ։
-Դուք երկրորդ անընդմեջ պարտությունն եք կրում, իսկ երրորդ տեղի համար ձեր սկզբբունքային մրցակից «Ալաշկերտը» տարավ երկրորդ անընդմեջ հաղթանակը։ Այժմ միայն մեկ միավորով եք գերազանցում «Ալաշկերտին»։ Ինչքանո՞վ է թիմը հոգեբանորեն պատրաստ՝ երրորդ տեղի համար պայքար մղելուն։
-Այո, դա մեզ համար շատ դժվարություններ է առաջացնում։ Ունենք նաև կորուստներ։ Այսօր կարմիր քարտ ստացանք, Հրայր Մկոյանը ևս դեղինների պատճառով բաց կթողնի մյուս խաղը։ Բախտը մեզնից երես է թեքել այդ առումով։ Պահեստայինների նստարանը կարճ է, բայց մենք փորձելու ենք։ Միանշանակ թիմը չի հանձնվելու։
