Անկախատեսելի մրցաշրջանի էֆեկտը․ Եվրոպա Լիգայի անոնս

Այսօր՝ փետրվարի 25-ին կկայանան Եվրոպա Լիգայի 1/16-րդ եզրափակչի պատասխան հանդիպումները և մենք կիմանանք այն 16 հաջողակների անուները, ովքեր գարնանը կշարունակեն պայքարը կարևորությամբ երկրորդ ակումբային մրցաշարում։

Նախ անդրադառնանք այն թիմերին, որոնք մեծ հաշվով արդեն ապահովել են իրենց մուտքը հաջորդ փուլ։ Այդպիսի թիմերի ցուցակում կարելի է ներառել, օրինակ, Մանչեսթեր Յունայթեդին, որը առաջին խաղում 4 անպատասխան գնդակ ուղարկեց «Ռեալ Սոսեյդադի» դարպասը։ Դժվար թե իսպանական ակումբը կարողանա ետ բերել այդքան մեծ տարբերությունը։

Նույնը կարելի է ասել «Ռոմայի» մասին, որը արտագնա խաղում 2 անպատասխան գնդակ ուղարկեց «Բրագայի» դարպասը, ինչու և ոչ՝ նաև «Գրանադայի» մասին, որը նույն հաշվով հաղթեց «Նապոլիին»․ վերջինս կադրային լուրջ խնդիրներ ունի, և դժվար է պատկերացնել, որ կարող է բեկել դիմակայության վերջնական ելքը։ Մխիթարյանի «Ռոման» ևս դժվար թե բաց թողնի առաջին խաղում ստացված առավելությունը, նամանավանդ, երբ պատասխան հանդիպումը սեփական հարկի տակ է։ «Շախտյոր»-«Մակքաբի» խաղում ևս անակնկալներ չեն սպասվում․ առաջին խաղում «հանքափորները» առանց դժվարության հաղթեցին իսրայելական թիմին և երկրորդ խաղում հանգիստ ավարտին կհասցնեն իրենց առաքելությունը։

Պատասխան խաղից առաջ «Վիլյառեալը» նկատելի առավելություն ունի «Զալցբուրգի» նկատմամբ (2-0 առաջին խաղում), սակայն ավստրիական գրանդից ամեն ինչ սպասել է, և ասել, որ իսպանական ակումբը արդեն հաջորդ փուլում է, դա այդքան էլ ճիշտ չի լինի։ Նույնը վերաբերվում է «Օլիմպիակոսին»․  ՊՍՎ-ի հետ նախորդ խաղում գրանցված գոլային հրավառությունը (4-2 հօգուտ հունական թիմի) հաշվի առնելով, կարելի է ասել, որ պատասխան խաղում էլ կարող է նման խելահեղություն գրանցվել, և դեռ հարցական է ՝ ում օգտին։

Դժվար հանդիպում է սպասվում «Կրասնոդարին»․ առաջին խաղում սեփական հարկի տակ «ցուլերը» ցավալի պատմություն կրեցին Զագրեբի «Դինամոյից» (2-3)․ Հայաստանի հավաքականի նորեկ Էդուարդ Սպերցյանի թիմը պատասխան խաղում պետք է երկու գնդակի առավելությամբ հաղթի մրցակցին, որպեսզի շարունակի պայքարը եվրագավաթներում։

Մնացած խաղերում ակնհայտ ֆավորիտ միգուցե և կա, բայց առաջին խաղերից ելնելով, դժվար է վաղաժամ ինչ-որ մեկին դիտարկել որպես հաջորդ փուլի մասնակից։ Կարող է սայթաքել յուրաքանչյուրը, թե՛ «Լեսթերը», թե՛ «Միլանը», և թե՛ Սարգիս Ադամյանի «Հոֆենհայմը», որոնք իրենց առաջին հանդիպումներում չկարողացան հաղթանակի նժարը թեքել իրենց կողմը։ Հավանաբար համառ պայքար կտեսնենք «Արսենալ»-«Բենֆիկա», «Այաքս»-«Լիլ» և «Ռեյնջերս»-«Անտվերպեն» հանդիպումներում․ մասնավորապես վերջին զույգը բավականին ուրախացրեց երկրպագուներին նախորդ շաբաթ՝ խաղալով բաց հարձակվողական ֆուտբոլ (4-3` հօգուտ շոտլանդական թիմի)։

Ընդհանրապես, նախորդ շաբաթը ԵԼ պատմության մեջ ամենաարդյունավետն էր․ ընդհանուր առմամբ 16 խաղում գրանցվել է 59 գոլ: Ակնկալում ենք, որ այս շաբաթ թիմերը կանցնեն 6 տասնյակ գոլերի շեմը․․․

🕰 Ժամանակացույց

Արսենալ-Բենֆիկա․ 21:55
Ռեյնջերս-Անտվերպեն․ 21:55
Վիլյառեալ-Զալցբուրգ․ 21:55
Հոֆենհայմ-Մոլդե․ 21:55
Նապոլի-Գրանադա․ 21:55
Շախտյոր- Մաքքաբի․ 21:55
Այաքս-Լիլ․ 21:55
Բրյուգե-Կիևի Դինամո․ 00:00
Մանչեսթեր Յունայթեդ-Ռեալ Սոսյեդադ․ 00:00
Միլան-Ցրվենա Զվեզդա․ 00:00
Լեսթեր-Սլավիա Պրահա․ 00:00
Ռոմա-Սպորտային Բրագա․ 00:00
Դինամո Զագրեբ-Կրասնոդար․ 00:00
Բայեր-Յանգ Բոյզ․ 00:00
ՊՍՎ-Օլիմպիակոս․ 00:00