«Բարսելոնայի» նորեկ, «Ոսկե գնդակի» 2024 թվականի դափնեկիր Ռոդրին պաշտոնական նորամուտը նշեց կատալոնական ակումբի կազմում՝ Լա Լիգայի շրջանակում Բիլբաոյի «Ատլետիկի» դեմ տնային խաղում (2:0): Այս հաղթանակի շնորհիվ Հանսի Ֆլիկի թիմը պահպանում է 100 տոկոսանոց ցուցանիշն Իսպանիայի ընթացիկ առաջնությունում։
Իսպանացի կիսապաշտպանը խաղադաշտ դուրս եկավ 62-րդ րոպեին՝ փոխարինելով Մարկ Բեռնալին և կենտրոնում միանալով Պեդրիին ու Դանի Օլմոյին։ «Սփոտիֆայ Կամպ Նոուի» տրիբունաներում հավաքված 59,326 երկրպագուները բուռն ծափահարություններով ողջունեցին աշխարհի չեմպիոնին, ինչին Ռոդրին արձագանքեց դեռևս նախավարժանքի ժամանակ՝ ծափահարելով երկրպագուներին։
Խաղից հետո Ռոդրին չի թաքցրել իր ոգևորությունը նոր ակումբում առաջին րոպեներն անցկացնելու կապակցությամբ.
«Շատ երջանիկ եմ նորամուտիս և թիմի հաղթանակի համար։ Երկուսից երկուս՝ սա կարևոր է։ Հիմա պետք է ռիթմ հավաքել ու հարմարվել այս հիանալի թիմին։ Իմ առաջին րոպեներն էին, և զգացողությունները հիանալի են։ Ամառը բավականին երկար ստացվեց, սովորականից ավելի, ուստի պետք է արագ մարզավիճակ ձեռք բերել։ Ես այնտեղ եմ, որտեղ ցանկանում էի լինել, ուրախ եմ, որ ամեն ինչ այսպես դասավորվեց։ Հիմա միայն աշխատել է պետք»։
Ռոդրին հատուկ անդրադարձել է նաև թիմակցին՝ Լամին Յամալին, որն աչքի ընկավ մեծ ակտիվությամբ, սակայն Ունայ Սիմոնի, Էմերիկ Լապորտի և դարպասաձողի պատճառով այդպես էլ չկարողացավ գոլի հեղինակ դառնալ․
«Նա փոքր-ինչ ընկճված շրջանից էր գալիս, բայց մենք նրան ոգևորեցինք, և նա ցույց տվեց իր լավագույն տարբերակը։ Մեզ հենց դա է պետք նրանից՝ աշխատանք ու կայունություն։ Տաղանդը կա, իսկ գոլերն անպայման կգան»։
Հատկանշական է, որ սա Ռոդրիի առաջին խաղն էր «Կամպ Նոուում» «կապտանռնագույնների» մարզաշապիկով, սակայն մինչ այս նա 3 անգամ հանդես էր եկել այս մարզադաշտում՝ որպես հյուր ներկայացնելով «Վիլյառեալն» ու Մադրիդի «Ատլետիկոն»։ Նրա վերջին հանդիպումն այստեղ կայացել էր ուղիղ 7 տարի առաջ՝ 2019 թվականի ապրիլին, երբ «Ատլետիկոն» 2:0 հաշվով պարտվեց Լիոնել Մեսսիի և Լուիս Սուարեսի խփած գոլերի պատճառով:
Լա Լիգայի մրցաշարային աղյուսակն այս պահին
