Իսպանիայի Լա Լիգայի առաջին տուրի հետաձգված խաղում Մադրիդի «Ռեալը» «Սանտիագո Բեռնաբեու» մարզադաշտում ընդունել էր «Ռեալ Սոսյեդադին» և վստահ հաղթանակ տոնեց՝ 4:1 հաշվով:
Հանդիպման գլխավոր հերոսը դարձավ Կիլիան Մբապեն: Ֆրանսիացի հարձակվողը, ով ընթացիկ մրցաշրջանի մեկնարկային խաղում «Էսպանյոլի» դեմ աչքի չէր ընկել, այս անգամ փայլեց ողջ շքեղությամբ՝ դառնալով հեթ-տրիկի հեղինակ: Նա հյուրերի դարպասը գրավեց 40-րդ, 60-րդ և 80-րդ րոպեներին: Մադրիդցիների կազմում ևս մեկ անգամ աչքի ընկավ Վինիսիուս Ժունիորը (68′):
Բասկյան ակումբի հեղինակության գնդակը առաջին խաղակեսի վերջնամասում (44′) հեղինակեց Լուկա Սուչիչը: Հյուրերի կազմում հայտավորված կիսապաշտպան Արսեն Զախարյանը այդպես էլ խաղադաշտ դուրս չեկավ՝ հանդիպմանը հետևելով պահեստայինների նստարանից:
Սա Մբապեի առաջին հեթ-տրիկն էր 2026 թվականին և վեցերորդը՝ «արքայական» ակումբի մարզաշապիկով (նախորդ 5-ը գրանցվել են 2025-ին՝ «Կայրաթի», «Բարսելոնայի», «Մանչեսթեր Սիթիի», «Վալյադոլիդի» և «Օլիմպիակոսի» դարպասը):
Ֆրանսիացին աներևակայելի վիճակագրություն ունի «Սոսյեդադի» դեմ. 7 խաղում նա խփել է արդեն 10 գոլ: Իսպանական ակումբներից նա ավելի շատ գրավել է միայն «Բարսելոնայի» դարպասը (12 գոլ՝ 10 խաղում):
Ընդհանուր առմամբ, Լա Լիգայում անցկացրած 67 խաղում Մբապեն խփել է 59 գնդակ՝ դառնալով թիմի լավագույն ռմբարկուն Մադրիդում անցկացրած իր բոլոր մրցաշրջաններում:
Այս հաղթանակից հետո Ժոզե Մոուրինյուի գլխավորած թիմը վաստակեց 6 միավոր և գլխավորում է Լա Լիգայի մրցաշարային աղյուսակը: Մինչդեռ «Ռեալ Սոսյեդադը», որը նախորդ տուրում էլ զիջել էր «Բետիսին» (0:1), կրեց երկրորդ անընդմեջ պարտությունը և եզրափակում է աղյուսակը:
Հաջորդ տուրում՝ օգոստոսի 30-ին, «Ռեալը» սեփական հարկի տակ կընդունի «Մալագային», իսկ «Սոսյեդադը» մեկ օր շուտ տանը կմրցի «Էսպանյոլի» հետ։ Նշենք նաև, որ հինգշաբթի օրը կայանալիք մյուս հանդիպումներում «Սելտան» կմրցի «Օսասունայի», իսկ «Բարսելոնան»՝ «Ատլետիկի» հետ:
Հանդիպումից առաջ «Սանտիագո Բեռնաբեուում» հուզիչ մթնոլորտ էր: Խաղը մեկնարկեց մեկ րոպե լռությամբ՝ ի հիշատակ նախորդ մրցաշրջանի ընթացքում կյանքից հեռացած ակումբի անդամների և երկրպագուների: Բացի այդ, ակումբը հարգանքի տուրք մատուցեց աշխարհի վերջին առաջնության չեմպիոններին. թիմերը պատվո միջանցքով դիմավորեցին Կուկուրելյային, ով խաղադաշտ դուրս եկավ Աշխարհի գավաթով, իսկ նրան միացավ նաև Օյարսաբալը՝ արժանանալով մարզադաշտի բուռն ծափահարություններին:
Մրցաշարային աղյուսակն այս պահին
