Լոնդոնի «Տոտենհեմը» պաշտոնապես հայտարարեց «Մանչեսթեր Սիթիի» և Բրազիլիայի ազգային հավաքականի վինգեր Սավինյոյի տրանսֆերի ձեռքբերման մասին։
Ըստ բրիտանական մամուլի՝ 22-ամյա ֆուտբոլիստի տեղափոխության համար լոնդոնյան ակումբը վճարել է շուրջ 85 միլիոն ֆունտ ստերլինգ:
Բրազիլացին հրաժեշտ է տալիս «քաղաքայիններին» թիմում երկու մրցաշրջան անցկացնելուց հետո։ Այս ընթացքում նա «Մանչեսթեր Սիթիի» կազմում ընդհանուր առմամբ մասնակցել է 84 հանդիպման, դարձել 7 գոլի հեղինակ, ինչպես նաև նվաճել Անգլիայի և Լիգայի գավաթները:
«Որոշ ժամանակ պահանջվեց, բայց ես շատ ուրախ եմ այստեղ գտնվելու համար: Սա հիանալի հնարավորություն է՝ հանդես գալու հրաշալի ակումբում՝ աշխարհի լավագույն մարզիչներից մեկի գլխավորությամբ։ Հենց խոսեցի Ռոբերտո Դե Ձերբիի հետ, հասկացա, որ պետք է տեղափոխվեմ այստեղ։ Նա ասաց, որ ցանկանում է օգնել ինձ հասնելու ամենաբարձր մակարդակին, և ես հավատում եմ, որ մենք կարող ենք դա անել միասին՝ որպես թիմ»։
Ֆուտբոլիստը նաև շնորհակալություն է հայտնել «Մանչեսթեր Սիթիին»՝ ընդգծելով, որ ակումբն իրեն շատ բան է տվել, և ինքն այնտեղ ավելի լավ խաղացող ու մարդ է դարձել:
«Տոտենհեմի» գլխավոր մարզիչ Ռոբերտո Դե Ձերբին մեծ ոգևորությամբ է խոսել նորեկի մասին.
«Սավինյոն այն ֆուտբոլիստն է, որն էներգիա, երևակայություն և որակ է հաղորդում եզրերում։ Նա ունի պաշտպանների վրա գրոհելու համարձակություն և իր ստեղծագործականությամբ խաղի ընթացքը բեկելու ունակություն։ Մենք անհամբերությամբ սպասում ենք նրա հետ աշխատանքին»։
Հիշեցնենք, որ մինչև Անգլիա տեղափոխվելը Սավինյոն փայլուն մրցաշրջան (2023/24) էր անցկացրել իսպանական «Ժիրոնայի» կազմում՝ 41 խաղում դառնալով 11 գոլի հեղինակ և օգնելով թիմին պատմության մեջ առաջին անգամ նվաճել Չեմպիոնների լիգայի ուղեգիր։ Բրազիլիայի ազգային հավաքականում վինգերն իր նորամուտը նշել է 2024 թվականի մարտին՝ Անգլիայի դեմ խաղում (1:0), և մինչ օրս գլխավոր թիմի մարզաշապիկով անցկացրել է 13 հանդիպում՝ դառնալով 1 գոլի հեղինակ։
