Մադրիդի «Ռեալի» գլխավոր մարզիչ Ժոզե Մոուրինյուն վերլուծել է Իսպանիայի Լա Լիգայի նոր մրցաշրջանի մեկնարկային խաղում «Էսպանյոլի» նկատմամբ տարած դժվարին հաղթանակը (2։1): Պորտուգալացի մասնագետն անդրադարձել է մրցակցի դիմադրությանը, իր թիմի աստղերի ելույթներին և խաղավարությանը։
Խաղի և դրամատիկ հաղթանակի մասին
«Կարծում եմ՝ մենք արժանի էինք հաղթանակի, բայց «Էսպանյոլն» էլ արժանի չէր պարտության։ Հատկապես երկրորդ խաղակեսում մենք վերահսկում էինք գնդակն ու մեծ ճնշում գործադրում։ Շատ ռիսկի դիմեցինք և, ի վերջո, հասանք մեր ուզածին: Սակայն մի թիմ, որն այսպես է պաշտպանվում, վտանգավոր հակագրոհներ կազմակերպում և գործում իր հնարավորությունների սահմանագծին, իսկապես ցավալի է տուն վերադառնալ դատարկաձեռն։
Ես բարձր եմ գնահատում այս հաղթանակը, քանի որ այն ձեռք բերվեց հոգով և բնավորությամբ, որին մեծապես նպաստեց նաև պահեստայինների նստարանը։ Հիասթափված պահեստայինները երբեք չեն օգնում, բայց երբ կա թիմային ոգի, նրանք կարող են հաղթանակ բերել»,- նշել է Մոուրինյուն։
Վինիսիուսի և նրա նկատմամբ կոպիտ խաղի մասին
«Վինին սուրբ չէ, բայց այն, ինչ անում են նրա հետ, արդեն չափազանց է։ Ամեն ինչ սկսվում է առաջին իսկ րոպեից։ Դա կարծես կրկնվող սցենար լինի՝ մրցակցից մրցակից. մեկը հարվածում է նրան, հետո մյուսը։ Երբ մեկը դեղին է ստանում, նրան փոխարինում են, ու դաշտ մտած նոր խաղացողն է սկսում հարվածել Վինիին։
vinicius júnior já começou a ser chutado kkk emmmenos de 4 minutos de jogo pic.twitter.com/10tedweLHv
— ✴︎ kyky (@hylzay) August 22, 2026
Դա հիասթափեցնող է նրա համար։ Նա պետք է էմոցիոնալ մեծ վերահսկողություն ունենա։ Ընդմիջմանը խոսել եմ նրա հետ և ասել. «Եթե գոլ խփես, զգույշ եղիր, թե ինչպես ես տոնում, որպեսզի մնաս դաշտում»։ Մենք ապրում ենք հակաբուլինգի սոցիալական դարաշրջանում, բայց Վինիսիուսի նկատմամբ դեռևս բուլինգ է կիրառվում՝ լինի դա մրցակիցների, թե հանդիսատեսի կողմից։ Մենք պետք է առավելագույնս աջակցենք և նախապատրաստենք նրան»։
Բելինգհեմի և «Ռեալի» աստղային հարձակման մասին
«Չէի սպասում, որ Ջուդը կարող է այդքան երկար խաղալ: Ունեի կասկածներ՝ արդյոք ճիշտ էր նրան մեկնարկային կազմում դաշտ դուրս բերելը, թե ավելի լավ էր սպասել երկրորդ խաղակեսին, բայց նա ֆիզիկապես և հոգեբանորեն շատ ուժեղ է: Բելինգհեմն ինձ համար այն ֆուտբոլիստն է, որը պետք է կապող օղակ հանդիսանա հարձակվողների հետ։ Նա կարող է խաղալ խորքից, բայց այդ դեպքում մենք կկորցնենք նրա դիպուկությունը դարպասի մոտ։ Մենք ունենք աշխարհի լավագույն խաղացողներին։ Մբապեն, Վինին և Ջուդը անհավանական ֆուտբոլիստներ են»։
Նորեկ Կառլոս Էսպիի մասին
«Նա հիանալի երիտասարդ է։ Մենք միասին ենք ապրում Վալդեբեբասում. նախաճաշում ենք, ճաշում, ընթրում։ Նա ապրում է իր երազանքով, բայց ոչ թե «լուսնի վրա է», այլ քրտնաջան աշխատում է թիմի համար: Ճիշտ է, գոլն է ամեն ինչ որոշում, բայց նա նաև հիանալի փոխանցում կատարեց Մբապեին՝ մեջքով դեպի դարպասը գտնվելով: Նա այն խաղացողի պրոֆիլն ունի, որը մեզ հենց այսպիսի հանդիպումների համար է պետք»։
Մրցավարության և ռոտացիայի մասին
«Էսպանյոլի» մարզիչն իր դժգոհությունն է հայտնել մրցավարից, բայց ես համաձայն չեմ։ Իմ կարծիքով՝ մրցավարը հիանալի աշխատանք կատարեց. չկար VAR-ի երկարատև սպասում կամ որևէ կասկածելի դրվագ տուգանային հրապարակում, որը կարող էր որոշել հանդիպման ելքը։
Ինչ վերաբերում է կազմին, ապա ամենադժվարն այն է, երբ սկսում ես 11 հոգով, իսկ պահեստայինների նստարանին ևս 12-ն են։ Ես չեմ կարող հրաշքներ գործել և 15 հոգով խաղալ։ Նրանք պետք է պայքարեն չխաղալու հիասթափության դեմ։ Եթե ես տեսնեմ, որ նրանք կորցրել են մոտիվացիան, շատ հեշտությամբ դուրս կթողնեմ կազմից, բայց այսօր փոխարինման դուրս եկած հինգ ֆուտբոլիստներն էլ մտան մեծ նվիրումով: Այդպես էլ պետք է լինի. մենք չորս ճակատով ենք պայքարելու, և մեզ պետք է ամբողջ թիմը»,- ամփոփել է Մոուրինյուն։
