Մյունխենի «Բավարիայի» մարզական տնօրեն Մաքս Էբերլը մեկնաբանել է թիմի կիսապաշտպան Ջամալ Մուսիալայի մասնակցությամբ տեղի ունեցած միջադեպը: Հիշեցնենք, որ 23-ամյա ֆուտբոլիստը մեկ շաբաթվա ընթացքում արդեն երկրորդ անգամ գիտակցությունը կորցրել է խաղադաշտում։
Նոր միջադեպը գրանցվել էր երեքշաբթի՝ օգոստոսի 18 «Հայդենհայմի» դեմ կայացած ընկերական հանդիպման ժամանակ (2-4): Մուսիալան փոխարինման էր դուրս եկել 61-րդ րոպեին և ընդամենը վեց րոպե անց վայր ընկել խոտածածկին: Նմանատիպ դեպք էր գրանցվել նաև ընդամենը օրեր առաջ՝ օգոստոսի 15-ին, «Լայպցիգի» դեմ խաղում (3-1):
Լրագրողների հետ զրույցում Էբերլը խուսափել է հստակ պարզաբանումներից և նշել, որ ֆուտբոլիստն ինքը կխոսի այդ մասին.
— Կարո՞ղ եք ասել, թե ինչ է տեղի ունեցել:
«Ջամալն առաջիկայում կխոսի այդ մասին: Մենք գիտեինք և տեղյակ էինք իրավիճակին: Ջամալն անպայման կարտահայտվի»:
— Եթե տեղյակ էիք, ապա ինչո՞ւ նա այսօր խաղաց:
«Ջամալը կպատմի այդ մասին»:
— Ինչպե՞ս է նա իրեն զգում հիմա:
«Նա հանդերձարանում է. զգեստափոխվում է և ցնցուղ ընդունում»,- Էբերլի խոսքերն է մեջբերում Bayern & Germany-ն:
Հավելենք, որ շաբաթ՝ օգոստոսի 22-ին, «Բավարիային» կարևոր հանդիպում է սպասվում. մյունխենցիները Գերմանիայի Սուպերգավաթի շրջանակում ուժերը կչափեն Դորտմունդի «Բորուսիայի» հետ:
