Կատալոնական «Բարսելոնան» չի հրաժարվում «Մանչեսթեր Սիթիի» և Իսպանիայի հավաքականի կիսապաշտպան Ռոդրիին ձեռք բերելու մտքից: Հայտնի ինսայդեր Ֆաբրիցիո Ռոմանոյի փոխանցմամբ՝ «կապտանռնագույնները» պատրաստվում են երրորդ պաշտոնական առաջարկն անել անգլիական ակումբին։
Ավելի վաղ «քաղաքայինները» մերժել էին կատալոնացիների երկու մեկնարկային առաջարկները՝ համապատասխանաբար 50 և 60 մլն եվրոյի չափով: Աղբյուրի համաձայն՝ «Մանչեսթեր Սիթին» իր աստղային կիսապաշտպանի դիմաց պահանջում է նվազագույնը 80 միլիոն եվրո, և ակումբների միջև ուղիղ բանակցությունները կշարունակվեն։
Իսպանական AS պարբերականն իր հերթին հայտնում է, որ այս տրանսֆերը կարող է աստղաբաշխական արժեք ունենալ «Բարսելոնայի» համար՝ ընդհանուր առմամբ գերազանցելով 210 մլն եվրոն։
Բանն այն է, որ կատալոնացիները 30-ամյա ֆուտբոլիստին առաջարկել են 4 տարվա պայմանագիր՝ տարեկան 15 մլն եվրո մաքուր աշխատավարձով։ Հարկերը ներառյալ՝ Ռոդրիի աշխատավարձը ակումբի վրա կարժենա մրցաշրջանում 34 մլն եվրո (4 տարվա կտրվածքով՝ 136 մլն): Գումարելով սրան ակնկալվող 80 մլն եվրո տրանսֆերային արժեքն ու գործակալներին տրվելիք միջնորդավճարները՝ ընդհանուր ծախսերը հասնում են վերոնշյալ 210 միլիոնին։
Լրատվամիջոցը նաև ընդգծում է, որ պայմանագրի ավարտից մեկ տարի առաջ ֆուտբոլիստներին ցածր գնով ձեռք բերելու պրակտիկան այլևս անցյալում է։ Նման վերջին խոշոր և հաջողված գործարքներից էր Տոնի Կրոսի տեղափոխությունը «Բավարիայից» Մադրիդի «Ռեալ», որն արժեցավ ընդամենը 20 մլն եվրո գերմանացու պայմանագրի ավարտից 12 ամիս առաջ:
Հավելենք, որ Անգլիայի Պրեմիեր լիգայի 2025/2026 մրցաշրջանում Ռոդրին անցկացրել է 21 հանդիպում և դարձել մեկ գոլի հեղինակ։ Չեմպիոնների լիգայում նա մասնակցել է 5 խաղի, որտեղ արդյունավետ գործողություններով աչքի չի ընկել։
