Մադրիդի «Ռեալի», Վալենսիայի և Իսպանիայի ազգային հավաքականի նախկին դարպասապահ Սանտյագո Կանյիսարեսը մեկնաբանել է «Բարսելոնայից» Ֆերան Տորեսի հնարավոր տեղափոխության մասին տեղեկությունները։ ԶԼՄ-ների տվյալներով՝ 26-ամյա հարձակվողը մոտ է ֆրանսիական ՊՍԺ-ին միանալուն։
«Ինձ զարմացնում է, թե որքան քիչ են նրանք («Բարսելոնան») հավատում Ֆերանին և պատրաստվում են վաճառել նրան առաջին իսկ առաջարկի դեպքում։ Նա անթիվ անգամներ օգտակար է եղել «Բարսելոնային»։ Ստացվում է, որ հենց հիմա, երբ նա, իմ կարծիքով, արժե իր գումարը և առավելագույն օգուտն է բերում, նրան ամենաքիչն են վստահում։ Ես դա չեմ հասկանում»,- Կանյիսարեսի խոսքերն է մեջբերում COPE ռադիոկայանը։
Նշենք, որ Ֆերան Տորեսը հանդես է գալիս «Բարսելոնայում» 2022 թվականի հունվարից՝ տեղափոխվելով «Մանչեսթեր Սիթիից»։ Կատալոնական ակումբի կազմում նա նվաճել է յոթ ներքին տիտղոս։ Ֆուտբոլիստի գործող պայմանագրի ժամկետն ակումբի հետ նախատեսված է մինչև 2027 թվականի ամառը։ Ըստ Transfermarkt-ի տվյալների՝ հարձակվողի տրանսֆերային արժեքը գնահատվում է 50 միլիոն եվրո։
