Իտալական Ուդինե քաղաքում մեկնարկել է «Friuli Venezia Giulia Cup» մեկօրյա ընկերական մրցաշարը, որտեղ իսպանական «Բարսելոնան» եզակի ձևաչափով հանդիպում է անցկացրել անգլիական «Նոթինգհեմ Ֆորեսթի» հետ:
Խաղը տևել է ընդամենը 45 րոպե (մեկ խաղակես). նման մինի-ձևաչափով կատալոնական ակումբը հանդես չէր եկել վերջին 25 տարվա ընթացքում՝ սկսած 2001 թվականից։
Մինչև մրցավարի սուլիչը «Բլյուէներջի» մարզադաշտում հուզիչ պահ է արձանագրվել։ Ֆուտբոլիստները մեկ րոպե լռությամբ հարգել են «Բարսելոնայի» լեգենդար ռմբարկու Լիոնել Մեսսիի հոր՝ 68 տարեկանում կյանքից հեռացած Խորխե Մեսսիի հիշատակը։
Ինչ վերաբերում է բուն խաղին, ապա 2026/2027 մրցաշրջանին նախապատրաստվող և Իսպանիայի գործող չեմպիոնի կարգավիճակում հանդես եկող «Բարսելոնան» առավելության է հասել 1:0 հաշվով։ Հանդիպման միակ գնդակը հեղինակել է հարձակվող Ռաֆինյան՝ 45+2-րդ րոպեին անվրեպ իրացնելով 11-մետրանոց հարվածը։
Այս եռակողմ մինի-մրցաշարին մասնակցում է նաև իտալական «Ուդինեզեն», որի հետ Հանսի Ֆլիկի գլխավորած թիմը կանցկացնի իր հաջորդ 45-րոպեանոց հանդիպումը։ Այդ խաղում գերմանացի մասնագետը խաղադաշտ դուրս է բերել բոլորովին այլ մեկնարկային կազմ։ Մրցաշարի հաղթողը հայտնի կդառնա այն բանից հետո, երբ երեք թիմերը միմյանց հետ կանցկացնեն երկուական հանդիպում։
Հիշեցնենք, որ Իսպանիայի Լա Լիգայի ավարտված մրցաշրջանում «Բարսելոնան» վաստակել էր 94 միավոր՝ 8 միավորով գերազանցելով Մադրիդի «Ռեալին» և նվաճելով չեմպիոնական տիտղոսը, իսկ «Նոթինգհեմ Ֆորեսթը» Անգլիայի Պրեմիեր լիգայում 44 միավորով զբաղեցրել էր 16-րդ հորիզոնականը։
