«Բարսելոնայի» գլխավոր մարզիչ Հանս-Դիտեր Ֆլիկը կիսվել է կատալոնական ակումբի կազմում Կարիմ Ադեյեմիի նորամուտի խաղի տպավորություններով։ Գերմանացի մասնագետը որոշակի դժգոհություն է հայտնել հարձակվողի գործողություններից, սակայն վստահեցրել է, որ ֆուտբոլիստը դեռ լիովին կբացահայտի իր ներուժը։
Հիշեցնենք, որ «Բիրմինգհեմի» հետ ընկերական հանդիպման հիմնական ժամանակն ավարտվել էր մարտական՝ 2:2 հաշվով, ինչից հետո հետխաղյա 11-մետրանոցներով առավելության էին հասել անգլիացիները (3:2)։ Այս խաղում կայացավ վերջերս «Բարսելոնա» տեղափոխված Ադեյեմիի նորամուտը։
«Մի շարք դրվագներում Կարիմն իրեն լավագույնս չդրսևորեց։ Կարծում եմ՝ նա դեռ ցույց չի տվել այն ամենը, ինչի ընդունակ է։ Նա ընդամենը մեկ շաբաթ է, ինչ մարզվում է թիմի հետ, ուստի սա նորմալ է»,- Ֆլիկի խոսքերն է մեջբերում Goal-ը։
Կատալոնական թիմի մարզիչը հավելել է նաև, որ սպասելիքները մեծ են․ «Մարզումների ժամանակ ես բոլորովին այլ Կարիմի էի տեսնում՝ շատ ավելի արագ և վտանգավոր գրոհների եզրափակիչ փուլում։ Նա հսկայական ներուժ ունի և ի զորու է մեզ շատ բան տալ»։
Նախորդ մրցաշրջանում Ադեյեմին հանդես էր գալիս Դորտմունդի «Բորուսիայում»՝ 39 խաղում դառնալով 10 գոլի և 6 գոլային փոխանցման հեղինակ։ Նրա տրանսֆերի համար «Բարսելոնան» վճարել է 22 միլիոն եվրո։
