Portal LeoDias-ը մանրամասներ է բացահայտել «Բարսելոնայի» և Բրազիլիայի հավաքականի վինգեր Ռաֆինյայի ենթադրյալ ֆինանսական դժվարությունների և ընտանեկան խնդիրների վերաբերյալ։
Ավելի վաղ Բրազիլիայի հավաքականի նախկին ֆուտբոլիստ Վամպետան հայտարարել էր, որ «Բարսելոնայի» վինգերը ցանկանում է տեղափոխվել Սաուդյան Արաբիա՝ լուրջ ֆինանսական և ընտանեկան խնդիրների պատճառով։ Թեև ֆուտբոլիստի կինը՝ Նատալիան, հերքել էր այդ լուրերը, ԶԼՄ-ները պարզել են խնդրի իրական արմատները։
Ըստ աղբյուրի՝ խաղացողի խնդիրները սկսվել են դեռևս ԱԱ-2022-ից անմիջապես առաջ, երբ Ռաֆինյան «Լիդսից» տեղափոխվեց «Բարսելոնա»։ Տրանսֆերը ենթադրում էր ֆինանսական պայմանների զգալի բարելավում։ Կատալոնիայի մայրաքաղաք տեղափոխվելուց հետո զույգը որոշել է մոտ 10 միլիոն եվրո արժողությամբ առանձնատուն գնել: Սակայն հաշվարկներից հետո Նատալիան հայտնաբերել է, որ իրենք բավարար միջոցներ չունեն նման անշարժ գույք ձեռք բերելու համար: Սա տարօրինակ էր, քանի որ դեռ Անգլիայում Ռաֆինյան բարձր աշխատավարձ էր ստանում և ուներ խոշոր գովազդային պայմանագրեր:
Սկսելով ուսումնասիրել միջոցների սղության պատճառները՝ Նատալիան պարզել է, որ ֆուտբոլիստի վաստակած գումարների մեծ մասը փոխանցվել է այլ անձի։ Մասնավորապես, գովազդային պայմանագրերից ստացված եկամտի շուրջ 80%-ը ստացել է ֆուտբոլիստի հայրը՝ Ռաֆայել Բելոլին, մինչդեռ անձամբ խաղացողին բաժին է հասել միայն 20%-ը:
Բացի այդ, Ռաֆինյայի աշխատավարձի զգալի մասը նույնպես փոխանցվել է հոր հաշիվներին, ով վարում էր որդու գործերը (ֆուտբոլում վճարումները հաճախ բաժանվում են պաշտոնական աշխատավարձի և իմիջային իրավունքների համար նախատեսված գումարների):
Այս իրավիճակը վրդովեցրել է Նատալիային և հանգեցրել հոր ու որդու միջև ֆինանսական հարաբերությունների ամբողջական վերանայմանը։ Այդ ժամանակվանից ի վեր ընտանիքը պառակտվել է և գտնվում է մշտական կոնֆլիկտի մեջ։ Ստեղծված ֆոնին Ռաֆինյան ամբողջությամբ խզել է գործնական հարաբերությունները հոր հետ:
Չնայած շրջանառվող լուրերին՝ Ռաֆինյան և նրա հարազատները կտրականապես հերքում են «Բարսելոնայից» հեռանալու հավանականությունը։ Ավելին, վերջերս ֆուտբոլիստը երկարաձգել է պայմանագիրը կատալոնական ակումբի հետ։ Ինքը՝ բրազիլացին, շահագրգռված չէ Սաուդյան Արաբիա տեղափոխվելով, քանի որ այնտեղ մրցակցության մակարդակը չի համապատասխանում իր սպորտային բարձր հավակնություններին:
