Իսպանիայի հավաքականի կիսապաշտպան Ռոդրին մեկնաբանել է ազգային ընտրանու մարզման ժամանակ թիմակից Գավիի կոպիտ խաղը։
Ավելի վաղ համացանցում և լրատվամիջոցներում տարածվել էին վախեցնող կադրեր, որտեղ երևում է, թե ինչպես է 21-ամյա Գավին մարզման ժամանակ քիչ մնում ծանր վնասվածք հասցնի 29-ամյա հայրենակցին։
«Գավին չափազանց եռանդուն է։ Նա չի զսպում իրեն արտահայտություններում և գործողություններում, նրան միևնույն է։ Մեզ շատ է դուր գալիս նրա բնավորությունը, թեև մենք փորձում ենք բացատրել նրան, որ մարզումների ժամանակ ամեն ինչ պետք է այլ կերպ լինի։ Ես չգիտեի, որ մեր մարզումը նկարահանվում է, բայց բախման ժամանակ վախից քիչ էր մնում տակս անեի»,- Ռոդրիի խոսքերը սոցցանցերում մեջբերում է ինսայդեր և լրագրող Ֆաբրիցիո Ռոմանոն։
Ռոդրին Իսպանիայի հավաքականի կազմում անցկացրել է 62 հանդիպում և դարձել 4 գոլի հեղինակ։ Ավարտված ակումբային մրցաշրջանում նա բոլոր մրցաշարերում մասնակցել է 33 հանդիպման՝ դառնալով 2 գոլի հեղինակ։
Գավիի ակտիվում ազգային թիմում կա անցկացրած 30 հանդիպում և 5 գոլ, իսկ ակումբային մրցաշրջանում նա մասնակցել է 13 խաղի՝ դառնալով 1 գոլային փոխանցման հեղինակ։
Աշխարհի 2026 թվականի առաջնության շրջանակներում Իսպանիայի հավաքականն ընդգրկված է H խմբում, որտեղ նրա մրցակիցներն են Կաբո Վերդեն, Սաուդյան Արաբիան և Ուրուգվայը։ Իսպանացիները մրցաշարում իրենց մեկնարկային հանդիպումը կանցկացնեն հունիսի 15-ին՝ մրցելով Կաբո Վերդեի ընտրանու հետ։
