Գերմանական ֆուտբոլի լեգենդ, 2014 թվականի Աշխարհի չեմպիոն Լուկաս Պոդոլսկին 40 տարեկանում ավարտում է ֆուտբոլիստի պրոֆեսիոնալ կարիերան։
Շաբաթ օրը՝ մայիսի 23-ին, հայտնի հարձակվողն իր հրաժեշտի հանդիպումը կանցկացնի լեհական «Գուրնիկ Զաբժեի» կազմում՝ Լեհաստանի առաջնության բարձրագույն լիգայի շրջանակում մրցելով «Ռադոմյակի» հետ: Խաղակոշիկները մեխից կախելուց անմիջապես հետո Պոդոլսկին կանցնի նոր գործունեության. նա կդառնա իր մանկության ակումբի՝ «Գուրնիկի» լիիրավ սեփականատերը:
Այս մասին պաշտոնապես հայտնել է լեհական ակումբի X-ի էջը.
«Մի դարաշրջան մոտեցավ ավարտին, սկսվում է նոր դարաշրջան։ Աշխարհի չեմպիոն Լուկաս Պոդոլսկին այս հանգստյան օրերին վերջակետ կդնի իր փայլուն կարիերային։ Նա կստանձնի իր մանկության ակումբի՝ Զաբժեի «Գուրնիկի» սեփականատիրոջ դերը։ Շնորհակալություն ամեն ինչի համար, Պոլդի»,- ասված է հայտարարության մեջ։
Իր հարուստ և տպավորիչ կարիերայի ընթացքում Պոդոլսկին հանդես է եկել այնպիսի հայտնի ակումբներում, ինչպիսիք են գերմանական «Քյոլնն» ու Մյունխենի «Բավարիան», անգլիական «Արսենալը», իտալական «Ինտերը», թուրքական «Գալաթասարայը» և «Անթալյասպորը», ինչպես նաև ճապոնական «Վիսել Կոբեն»:
Գերմանիայի ազգային հավաքականի կազմում նա 2014 թվականին հռչակվել է Աշխարհի չեմպիոն։
Հավելենք, որ ընթացիկ մրցաշրջանում 40-ամյա Պոդոլսկին «Գուրնիկի» կազմում մասնակցել է 15 հանդիպման, սակայն դարպասի գրավմամբ աչքի չի ընկել։
Посмотреть эту публикацию в Instagram
