Հայկական արմատներ ունեցող ամերիկացի նախկին թենիսիստ, Մեծ սաղավարտի մրցաշարերի 8-ակի չեմպիոն, աշխարհի նախկին առաջին ռակետ Անդրե Աղասին այսօր նշում է ծննդյան 50-ամյակը։
Աղասիի հայրը իրանահայ էր։ Նրա նախնիները կրել են Աղասյան ազգանունը, որը փոփոխվել է Աղասիի այն բանից հետո, երբ նրանք Միացյալ Նահանգներ են տեղափոխվել։ Հայ-իրանական, ասորական ու ֆրանսիական ծագում ունեցող Աղասին լավագույն խաղացողներից մեկն է, ով ռակետ է պահել իր ձեռքերում։
Նրա հայրը՝ Էմանուելը ընկերացել ու աշխատել է Քըրք Քըրքորյանի հետ։ Այդտեղից է գալիս Աղասիի՝ Անդրե Քըրք Աղասի անվանումը։
Աղասին Բաց Էրայում առաջին թենիսիստն էր, ով 4 անգամ հաղթեց Ավստրալիայի բաց առաջնությունը։ Այդ ցուցանիշը հետագայում գերազանցեցին Նովակ Ջոկովիչը (2015) և Ռոջեր Ֆեդերերը (2017):
1995 թվականին Աղասին առաջին անգամ գլխավորեց ATP-ի վարկանիշային աղյուսակը։ 1996 թվականին Աղասին նվաճեց Ատլանտայի Օլիմպիական խաղերի ոսկե մեդալ տղամարդկանց մենախաղում։
Աղասին Ռոդ Լեյվերից հետո առաջին թենիսիստն էր տղամարդկանց մենախաղում, ով կարիերայի-մեծ սաղավարտ գրանցեց՝ հաղթելով Մեծ սաղավարտի բոլոր չորս մրցաշարերում։ Ներկա պահին նման ցուցանիշ գրանցել են հինգ թենիսիստներ՝ Ռոդ Լեյվերը, Անդրե Աղասին, Ռոջեր Ֆեդերերը, Ռաֆայել Նադալը և Նովակ Ջոկովիչը։
Անդրե Աղասիի վերջին մրցաշարը 2006 թվականի Միացյալ Նահանգների բաց առաջնությունն էր։ Նա հայտարարեց, որ իր վերջին խաղը կանցկացնի իր տանը՝ Նյու Յորքում։ Սպասելիքները մեծ չէին։ Ավստրալիայի բաց առաջնությունն ու Ռոլան Գարոսը բաց թողնելուց հետո Աղասին մեջքի վնասվածքով էր ներկայացել իր լեգենդար կարիերայի վերջին մրցաշարին։ Առաջին շրջանում Անդրեյ Պավելին 6-7, 7-6, 7-6, 6-2 հաշվով հաղթելուց հետո Աղասիին սպասում էր Մարկոս Բագդատիսը։ 6-4, 6-4, 3-6, 5-7, 7-5 հաշվով հինգ-սեթանոց թրիլլերում Աղասին հաղթեց ու մոտեցավ երրորդ շրջանին։
Հենց այստեղ էլ ամեն ինչ ավարտվեց։ Բենջամին Բեկերի դեմ խաղում Աղասին պարտվեց։ Սա լեգենդար թենիսիստի վերջին խաղն էր ու որքա՜ն խորհրդանշական էր, որ այն կայացավ Նյու Յորքի գլխավոր կորտում՝ «Արտուր Էշում»։
Աղասիի ելույթը խաղից հետո ուղղակի ֆանտաստիկ էր․
«Ցուցատախտակն ասում է, որ ես այսօր պարտվել եմ, բայց ցուցատախտակը չի ասում, թե ինչ եմ ես գտել։ Ես գտել եմ հավատարմություն այս 21 տարիների ընթացքում։ Դուք առաջ էիք մղում ինձ ինչպես կորտում, այնպես էլ կյանքում։ Ես ոգեշնչման աղբյուր եմ գտել։ Դուք ինձ առաջնորդել եք հաջողության անգամ իմ ամենադժվար պահերին։ Դուք տվեցիք ինձ ձեր ուսերը, որպեսզի ես կանգնեմ ու մղեցիք հաջողությունների, որի մասին ես երազում էի, և որին չէի հասնի առանց ձեզ։ Այս 21 տարիների ընթացքում ես ձեզ գտա։ Ես հիշելու եմ ձեզ ու ձեր հետ կապված հիշողությունները իմ ողջ կյանքում։ Շնորհակալ եմ»։
View this post on InstagramAndre Agassi’s 2006 US Open retirement run is one we will never forget 😢❤️
Անդրե Աղասին ամուսնացած է լեգենդար թենիսիստուհի Շտեֆի Գրաֆի հետ։ Իր մեկ այլ հայտնի խոսքերով Աղասին ընդգծում է թենիսի ու կյանքի նմանությունը։
«Թենիսում կիրառվում է կյանքի լեզուն․ Առավելություն (Advantage), ծառայություն (service), ձախողում (fault), կոտրում (break) և սեր (love)։ Ամենօրյա գոյատևման գլխավոր էլեմենտները կիրառվում են նաև թենիսում, որովհետև յուրաքանչյուր խաղ հենց կյանքի մանրանկարն է»։
Շնորհավո՜ր ծնունդդ, լեգենդա՛ր Անդրե Աղասի։
Արամ Սահակյան
