Իսպանական Լա Լիգայի 30-րդ տուրի շրջանակներում Մադրիդի «Սիվիտաս Մետրոպոլիտանո» մարզադաշտում կայացավ տուրի կենտրոնական հանդիպումը. «Ատլետիկոն» հյուրընկալել էր «Բարսելոնային»։ Դրամատիկ և իրադարձություններով հարուստ խաղում կատալոնական ակումբը կամային հաղթանակ տարավ 2:1 հաշվով:
Հաշիվը 39-րդ րոպեին բացեց մադրիդցիների հարձակվող Ջուլիանո Սիմեոնեն։ Սակայն դաշտի տերերի ուրախությունը կարճ տևեց․ ընդամենը երեք րոպե անց Մարկուս Ռեշֆորդը վերականգնեց հավասարությունը: Կրքերը բորբոքվեցին առաջին խաղակեսի ավելացված ժամանակում. 45+7-րդ րոպեին Լամին Յամալի նկատմամբ թույլ տված կոպիտ խախտման համար ուղիղ կարմիր քարտով դաշտից հեռացվեց «Ատլետիկոյի» կիսապաշտպան Նիկոլաս Գոնսալեսը՝ տանտերերին թողնելով 10 հոգով։
Երկրորդ խաղակեսի մեկնարկում կրքերը կրկին թեժացան։ Գլխավոր մրցավարը VAR համակարգի օգնությամբ տեսակրկնապատկերը դիտելուց հետո չեղարկեց «Բարսելոնայի» պաշտպան Խերարդ Մարտինի հեռացումը։ Արձանագրվեց, որ մինչև մրցակցի ոտքին հարվածելը, Մարտինը նախ խաղացել էր գնդակով։
Թվային առավելություն ունեցող հյուրերը շարունակեցին ճնշումը, ինչն իր արդյունքը տվեց հանդիպման բուն ավարտին։ 87-րդ րոպեին Ռոբերտ Լևանդովսկին խփեց կատալոնացիների հաղթական գնդակը՝ ձևակերպելով վերջնական հաշիվը՝ 1:2։
Այս հաղթանակից հետո Հանս-Դիտեր Ֆլիկի գլխավորած «Բարսելոնան» իր ակտիվում ունի արդեն 76 միավոր և շարունակում է վստահորեն գլխավորել Լա Լիգայի մրցաշարային աղյուսակը։
Դիեգո Սիմեոնեի «Ատլետիկոն» 57 միավորով զբաղեցնում է 4-րդ հորիզոնականը։
Հաջորդ տուրում՝ ապրիլի 11-ին, «Բարսելոնան» կատալոնական դերբիում սեփական հարկի տակ կընդունի «Էսպանյոլին», իսկ «Ատլետիկոն» նույն օրը արտագնա խաղում կմրցի «Սևիլիայի» հետ։
Տեսանյութը՝ ԱՅՍՏԵՂ
Մրցաշարային աղյուսակն այս պահին
