Մադրիդի «Ռեալի» հարձակվող Կիլիան Մբապեն որոշել է հրաժարվել ծնկի վիրահատությունից, որպեսզի չվտանգի իր մասնակցությունը աշխարհի 2026 թվականի առաջնությանը, որը կհյուրընկալեն ԱՄՆ-ը, Կանադան և Մեքսիկան։ Այս մասին հայտնում է իսպանական AS պարբերականը։
Աղբյուրի տեղեկություններով՝ ֆրանսիացի աստղային ֆուտբոլիստը ծնկի կապանների հետ կապված խնդիրներ ունի դեռևս 2025 թվականի դեկտեմբերից։ Վնասվածքի պատճառով Մբապեն արդեն բաց է թողել Չեմպիոնների լիգայի անցումային փլեյ-օֆֆ փուլի՝ «Բենֆիկայի» դեմ պատասխան հանդիպումը, որն ավարտվել է մադրիդցիների հաղթանակով՝ 2-1 հաշվով:
Քանի որ վիրահատական միջամտությունը կարող է երկարաձգել ապաքինման գործընթացն ու հարցականի տակ դնել ֆուտբոլիստի մասնակցությունը Հյուսիսային Ամերիկայում կայանալիք հեղինակավոր մրցաշարին, հարձակվողը նախընտրել է խուսափել վիրահատարանից։ Մինչև աշխարհի առաջնության մեկնարկը Մբապեն կհետևի կոնսերվատիվ բուժման տարբերակին։
Հիշեցնենք, որ ֆրանսիացին «արքայական» ակումբի գույները պաշտպանում է 2024 թվականի ամառվանից։ Չնայած վնասվածքին՝ ընթացիկ մրցաշրջանում Մբապեն ֆանտաստիկ արդյունավետություն է ցուցադրում. մադրիդյան ակումբի կազմում անցկացրած 33 հանդիպումներում նա դարձել է 38 գոլի և 6 արդյունավետ փոխանցման հեղինակ։
