Այսօր՝ փետրվարի 24-ին, կկայանա Չեմպիոնների լիգայի 2025/2026 մրցաշրջանի փլեյ-օֆֆ փուլի պատասխան հանդիպումը, որում իտալական «Ինտերը» կընդունի նորվեգական «Բուդյո-Գլիմտին»։ Խաղը կկայանա Միլանի «Սան Սիրո» մարզադաշտում։
Հիշեցնենք, որ առաջին խաղում նորվեգական թիմը սենսացիոն հաղթանակ էր տարել 3։1 հաշվով։
Վճռորոշ հանդիպումից առաջ միլանյան ակումբի գլխավոր մարզիչ Քրիստիան Կիվուն Ապիանո Ջենտիլեի մարզաբազայում կայացած ասուլիսի ժամանակ պատասխանել է լրագրողների հարցերին։
Առաջին խաղում կրած պարտության դասերի մասին
«Այդ խաղը մեզ սովորեցրեց այն, ինչ արդեն գիտեինք. հեշտ չի լինելու թե՛ խաղադաշտի վիճակի, թե՛ եղանակի պատճառով: Մենք պետք է ավելի լավ հարմարվեինք պայմաններին, բայց, ցավոք, ամբողջ հանդիպման ընթացքում դա մեզ չհաջողվեց։ Գիտեինք մրցակցի ուժը. լիգայի փուլում նրանց գրանցած արդյունքները պատահական չէին: Նրանք ոչ-ոքի խաղացին Դորտմունդում, հաղթեցին «Մանչեսթեր Սիթիին» և վստահ հանդես եկան Մադրիդում։ Մենք դժվարություններ ունեցանք ու հնարավորություններ տվեցինք մրցակցին։ Հուսով ենք՝ այսօր դա չի կրկնվի»:
Լաուտարո Մարտինեսի բացակայության մասին
«Մենք շատ առաջնորդներ ունենք, ինչն ապացուցել ենք մրցաշրջանի սկզբից: Յուրաքանչյուրը, ով դուրս է գալիս խաղադաշտ, զգում է իր պատասխանատվությունը թիմի հանդեպ։ Մենք հիմնվում ենք այն առաջնորդության, նպատակասլացության, քրտնաջան աշխատանքի և համեստության վրա, որոնք ցուցաբերել ենք այս ամիսների ընթացքում»։
Հոգեբանական գործոնի և ճնշման մասին
«Սա պարտադրանք չէ, սա պարտք է: Մենք պետք է անենք այն, ինչ կարողանում ենք, դուրս գանք խաղադաշտ վստահությամբ և գիտակցենք՝ եթե կա թիմ, որը կարող է բեկել այս դիմակայության ընթացքը, ապա դա մերն է: Մենք չպետք է կորցնենք հավասարակշռությունն ու ինքնավստահությունը: Խաղը տևում է 90, 100 կամ 120 րոպե, գուցե նաև՝ հետխաղյա 11-մետրանոցներ լինեն: Պետք չէ շտապել գոլ խփել ու բացեր թողնել պաշտպանությունում։ Կարևորը վճռորոշ պահերը ճիշտ կառավարելն է»:
Անհարմար մրցակցի և «ամոթալի» պարտության մասին
«Ֆուտբոլում ամոթալի ոչինչ չկա (խմբ. խոսքը 50 հազար բնակչություն ունեցող քաղաքի թիմին պարտվելու մասին է)։ Ամեն ինչ կախված է ակումբի ու թիմի աշխատանքից։ Մենք հարգում ենք մեր մրցակցին։ «Բուդյո-Գլիմտն» ապացուցել է իր որակը մեր դեմ խաղում, Մադրիդում, «Սիթիի» ու Դորտմունդի դեմ խաղերում: Դա հստակ գաղափարներով, լավ կառավարվող նախագիծ է: Մեր կողմից ոչ մի ամոթալի բան չկա. նրանք առաջին խաղում պարզապես ավելի լավն էին, և մենք շնորհավորեցինք նրանց»։
Մարտավարության և հարձակվողական խաղի մասին (քանի որ պետք է հաղթել 2-3 գոլի տարբերությամբ)
«Ա Սերիայում ունեցած մեր առավելությունը կամ այս խաղի բարդությունը չեն փոխում մեր մոտեցումը։ Մենք պարտվել ենք 1:3 հաշվով, և հիմա միայն դա է կարևոր: Խաղային պլանը ամբողջությամբ փոխելու կարիք չկա։ Մենք թիմ ենք, որը մրցաշրջանը կառուցել է կայունության վրա: Միջինը խփում ենք երկուսից ավելի գոլ, գոլի հեղինակ է դարձել 17 տարբեր ֆուտբոլիստ: Մենք ուղղել ենք առաջին խաղի սխալները և խաղին մոտենում ենք սառնասրտությամբ։ Ֆուտբոլն անկանխատեսելի է. մեզանից պահանջվում է հասունություն, հանգստություն, կենտրոնացվածություն և բնավորություն»։
Հավելենք, որ Չեմպիոնների լիգայի լիգայի փուլի արդյունքներով նորվեգական թիմը վաստակել էր 9 միավոր և զբաղեցրել 23-րդ տեղը, իսկ իտալական ակումբը 15 միավորով 10-րդն էր:
Մրցաշարի ընթացիկ խաղարկության եզրափակիչը կկայանա 2026 թվականի մայիսի 30-ին՝ Բուդապեշտի «Պուշկաշ Արենա» մարզադաշտում։
