ԿՈՆՄԵԲՈԼ-ի նախագահ Ալեխանդրո Դոմինգեսը ՖԻՖԱ-ի նախագահ Ջանի Ինֆանտինոյին է ներկայացրել 2030 թվականի աշխարհի առաջնությանը մասնակցող հավաքականների թիվը 48-ից 64-ի հասցնելու ծրագիր։ Այս մասին հայտնում է ESPN-ը։
Աղբյուրի համաձայն՝ ՖԻՖԱ-ն պատրաստ է ընդունել 2030 թվականի աշխարհի առաջնությունը 64 թիմով։ Այս դեպքում մրցաշարը կանցկացվի 16 խմբերով, որոնցից յուրաքանչյուրը կունենա չորս թիմ։ Խմբում առաջին և երկրորդ տեղ գրաված թիմերը կանցնեն փլեյ-օֆֆ փուլ։
Խաղերը, ինչպես նշվում է, կկայանան Իսպանիայում, Պորտուգալիայում, Մարոկկոյում, Արգենտինայում, Պարագվայում և Ուրուգվայում։ Աշխարհի առաջնության խմբային փուլի երեք խաղերը կանցկացվեն ամբողջությամբ Հարավային Ամերիկայի երկրներում, իսկ մնացածը՝ Եվրոպայում և Աֆրիկայում։
Նշենք, որ ՖԻՖԱ-ն նախկինում արդեն ընդլայնել էր մրցաշարի մասնակիցների թիվը՝ 32-ից հասցնելով 48-ի։ 2026 թվականի աշխարհի առաջնությունը պատմության մեջ առաջինը կլինի, որին կմասնակցեն 48 ազգային հավաքականներ։
