2022-ին Երևանի «Հանրապետական» մարզադաշտում ՈւԵՖԱ-ի Ազգերի լիգայի շրջանակում Հայաստանը 1:0 հաշվով հաղթել էր Իռլանդիային՝ հիշեցնելով, որ երեքշաբթի կայանալիք խաղում հաղթանակը հեշտ չի լինի: Միակ գոլը հեղինակել էր Էդուարդ Սպերցյանը։
Իռլանդիայի և «Տոտենհեմի» նախկին պաշտպան Սթիվեն Քելին կարծում է, որ Հեյմիր Հադլգրիմսոնի գլխավորությամբ թիմը զգալիորեն բարելավել է խաղի կառավարումը: Հունգարիայի դեմ վերջին ոչ-ոքին (2:2) ոգեշնչում է թիմին Երևանում կայանալիք Աշխարհի առաջնության ընտրական հանդիպմանը:
Քելին, ով 2022-ի խաղում մեկնաբան էր, հույս ունի, որ Իռլանդիան 30 աստիճան տապի պայմաններում կդրսևորի ամուր բնավորություն:
«Մեծ մրցաշարի ուղեգիր նվաճելու համար պետք է հաղթել նման խաղերում: Կարևոր չէ՝ խաղը գեղեցիկ կլինի, թե ոչ, գլխավորը արդյունքն է»,- ասել է նա RTÉ Soccer փոդքաստում:
«Հունգարիայի դեմ խաղում մենք երկու գոլ ընդունելուց հետո կարողացանք փոխել խաղի ընթացքը: Նույն ոգով պետք է մոտենանք Հայաստանի դեմ խաղին: Ճանապարհը երկար է, եղանակը՝ շոգ, խաղադաշտը՝ ոչ իդեալական, բայց պայմանները նույնն են երկու թիմերի համար: Պետք է դիմանալ, գոլ խփել, իսկ ավելի լավ է՝ երկու: Հանգիստ խաղը կատարյալ կլինի:
Անցյալ անգամ Հայաստանը 25-30 մետրից գոլ խփեց, և մենք չկարողացանք վերականգնվել: Հունգարիայի դեմ խաղում, սակայն, մենք ավելի լավ կառավարեցինք իրավիճակը՝ կատարելով անհրաժեշտ փոփոխություններ: Եթե խաղը սկզբում չհաջողվի, վստահ եմ, որ կշտկենք ընթացքը: Իդեալական է անմիջապես վերահսկել խաղը:
Հայաստանը վերջին հինգ խաղում ընդունել է 21 գոլ, ինչը ցույց է տալիս նրանց խոցելիությունը: Պետք է սկզբից ճնշել նրանց»,- ավելացրել է Քելլին:
