«Չելսիի» նախկին գլխավոր մարզիչ Լիամ Ռոսենյորը պատմել է լոնդոնյան ակումբում աշխատելու ընթացքում լրատվամիջոցների կողմից իր նկատմամբ գործադրված ճնշման և աշխատանքից հեռացվելու մասին։
«Դա իմ կյանքի լավագույն փորձառությունն էր և միաժամանակ՝ ամենածանրը։ Ամեն ինչ հիանալի էր, թեև տևեց ընդամենը չորս ամիս»,- մարզչի խոսքերը մեջբերում է FourFourTwo-ն։
Ռոսենյորը նշել է, որ իրեն հատկապես զարմացրել էր այն, որ թիմի՝ անընդմեջ հինգ հաղթանակներից հետո լրատվամիջոցներում իր նկատմամբ քննադատությունն ավելի էր սրվել։
«Ցանկացած ակումբ գոհ կլիներ նման հաղթական շարքից, բայց միայն ոչ «Չելսին»։ Լավ արդյունքներ ես գրանցում և հայտնվում ուշադրության կենտրոնում։ Դրանից հետո լրատվամիջոցներում մի տեսակ ձնագնդիի էֆեկտ առաջացավ»,- ասել է մասնագետը։
Նա նաև պատմել է, որ ծաղրի առարկա են դարձել ՊՍԺ-ի դեմ խաղում Ալեխանդրո Գարնաչոյին թղթի կտորի վրա փոխանցած հրահանգները, երբ «Չելսին» մնացել էր տասը ֆուտբոլիստով։ Քննադատության են արժանացել նաև նրա հագուստն ու խոսելու ձևը։
«Նրանք ծաղրում էին այն հրահանգները, որոնք գրել էի Գարնաչոյի համար թղթի կտորի վրա, երբ ՊՍԺ-ի դեմ խաղում մնացել էինք տասը հոգով։ Հագուստս կատակների առարկա էր դարձել, ինչպես նաև խոսելու ձևս։ Ես ծաղրածու չեմ»,- նշել է Ռոսենյորը։
Մասնագետը հավելել է, որ իր հեռացումը կապ չի ունեցել ֆուտբոլային պատճառների հետ։
«Դուք առաջինն եք, ում պատմում եմ այս մասին, և, հավանաբար, մոտ ժամանակներս՝ վերջինը։ Բայց մի օր կպատմեմ, թե իրականում ինչ է տեղի ունեցել»,- ասել է նա։
Ռոսենյորը «Չելսին» գլխավորել էր 2026 թվականի հունվարին՝ տեղափոխվելով «Ստրասբուրից»։ Ապրիլին, ակումբի ղեկին անցկացրած 23 հանդիպումից հետո, նա հեռացվել էր պաշտոնից։ Ներկայումս մասնագետն աշխատում է «Փարիզում»։
