«Բարսելոնան» շարունակում է մտածել իր տեխնիկական հովանավորի փոփոխության մասին, հայտնում է Marca-ն։ Այս պահին կատալոնացիները համալրված են ամերիկյան Nike ապրանքանիշով, սակայն գերմանական Puma ընկերությունը կապտանռնագույններին առաջարկում է 100 միլիոն եվրո բոնուս:
Ըստ աղբյուրի՝ Puma-ի նման առաջարկը կարող է լուրջ փաստարկ դառնալ նրանց օգտին։ Ներկայում «Բարսելոնան» Nike-ից ստանում է 85 միլիոն եվրո մեկ մրցաշրջանում, ևս 25 միլիոն եվրո տրամադրվում է որպես բոնուս: Միևնույն ժամանակ, ամերիկյան ընկերությունը նախատեսել է տուգանքների համակարգ որոշակի թիրախներ չկատարելու համար։ Puma-ն, իր հերթին, ստորագրման բոնուսից բացի, պատրաստ է վճարել տարեկան 120 միլիոն եվրո ֆիքսված գումար:
Նշվում է, որ այս պահին «Բարսելոնայի» ղեկավարությունը հակված է Puma-ի հետ համագործակցությանը, սակայն սպասում է Nike-ի ներկայացուցիչների վերջնական, բարելավված առաջարկին։