«Մանչեսթեր Յունայթեդն» այս ամառ շատ ակտիվ է լինելու տրանսֆերային շուկայում և կփորձի կրկնել կամ նույնիսկ գերազանցել «Չելսիի» վերջին տրանսֆերային արշավները։ ՄՅՈՒ-ն ամռանն ակումբի ղեկավարությունից կստանա մոտ 500 միլիոն եվրո՝ կազմն ուժեղացնելու համար, գրում է Mundo Deportivo-ն։
Ըստ իսպանական աղբյուրի՝ Էրիկ տեն Հագի երկու հիմնական տրանսֆերային նպատակները կլինեն կատալոնական «Բարսելոնայի» խաղացողները՝ կենտրոնական պաշտպան Ռոնալդ Արաուխոն և կիսապաշտպան Ֆրենկի դե Յոնգը, որն անցյալ ամառ հրաժարվեց տեղափոխվել «Օլդ Թրաֆորդ»:
Երկու ֆուտբոլիստներն էլ գլխավոր մարզիչ Չավի Էրնանդեսի ծրագրերում են, ուստի գործարքները ձևակերպելը չափազանց դժվար կլինի, թեև «Բարսելոնան» ֆինանսական խնդիրներ ունի:
Բացի այդ, վերջերս անգլիական և իտալական մամուլում նշվում էր, որ իբր «Նապոլիի» պաշտպան Կիմ Մին Ջեն արդեն համաձայնեցրել է պայմանագիրն անգլիական ակումբի հետ։ Եթե այս տրանսֆերը կայանա, գործարքի արժեքը կկազմի մոտ 50-60 մլն եվրո։
«Վիլյառեալի» պաշտպան Պաու Տորեսը կարող է կարիերան շարունակել Անգլիայում։ Ֆուտբոլիստով հետաքրքրված է «Մանչեսթեր Յունայթեդը», հայտնում է The Mirror-ը։ Աղբյուրի տեղեկություններով՝ մանկունիանցիները ցանկանում են բաժանվել Հարի Մագուայրից և նրա փոխարեն ծրագրում են պայմանագիր կնքել Տորեսի հետ։ Տրանսֆերի գումարը կարող է կազմել գրեթե նույնքան, որքան Կիմի տրանսֆերի դեպքում՝ 50 մլն եվրո։ Բայց Տորեսը կարիերան շարունակելու տարբերակ ունի նաև Իտալիայում, որտեղ նրա ծառայություններով հետաքրքրված է «Յուվենտուսը»։
Հարձակման գիծն ուժեղացնելու համար Տեն Հագը դիտարկում է երեք ֆուտբոլիստի թեկնածություն՝ Կիմի թիմակից Վիկտոր Օսիմհենի, ով այս պահին Ա Սերիայի լավագույն ռմբարկուն է, «Ատալանտայի» հարձակվող Ռասմուս Հոյլունդի տրանսֆերի տարբերակը, ինչպես նաև «Բրայթոնի» երիտասարդ հարձակվող Էվան Ֆերգյուսոնի թեկնածությունը։ «Բավարիայի» հարձակվող Սադիո Մանեն ևս կարող է տեղափոխվել «Մանչեսթեր Յունայթեդ», հայտնում է Daily Mirror-ը: Աղբյուրի փոխանցմամբ՝ խաղացողը դժգոհ է «Բավարիայում» իր կարգավիճակից և ցանկանում է հաջորդ տրանսֆերային պատուհանի ժամանակ հեռանալ ակումբից։
Ամենահավանական տարբերակը Հոյլունդի տրանսֆերն է, քանի որ Օսիմհենի տրանսֆերային մրցավազքը չափազանց թեժ է լինելու, իսկ Ֆերգյուսոնը դեռ չի պատրաստվում լքել Դե Զերբիի թիմը (ակումբը ևս չի դիտարկում նրա տրանսֆերը վաճառելու տարբերակը)։ Իսկ Մանեն․․․ համաձայնվեք, դա 99 տոկոսով անհնար է (հաշվի առնելով, որ նա «Լիվերպուլի» ֆուտբոլիստ է եղել երկար ժամանակ)։
ՄՅՈՒ-ն դիտարկում է նաև թիմի եզրերն ուժեղացնելու տարբերակը։ Ագլիական ակումբն ունի երկու թեկնածու, երկուսն էլ՝ Ասիայից։ Նախ, ՄՅՈՒ-ն ևս միացել է «Բրայթոնի» առաջատար Կաուրո Միտոմայի տրանսֆերային մրցավազքին։ Ըստ բրիտանական մամուլի՝ «Արսենալն» ու «Մանչեսթեր Սիթին» արդեն առաջարկել են ֆուտբոլիստի տրանսֆերի դիմաց 50 միլիոն ֆունտից ավել, սակայն «ճայերը» չեն ցանկանում բաժանվել թիմի առանցքային ֆուտբոլիստներից մեկից։
Ի դեպ՝ Միտոմայի մասին ArmSport-ի պատրաստած նյութին կարող եք ծանոթանալ այստեղ․
Դիպլոմավորված ֆուտբոլիստը՝ Կաուրու Միտոման․ Եվրոպական ֆուտբոլում նոր աստղ է հասունանում
Մյուս թեկնածուի նկատմամբ մանկունիանցիների հետաքրքության մասին տեղեկությունն ամենաթարմն է։ Տեն Հագը ցանկանում է իր թիմում տեսնել «Մալյորկայի» առաջատար Լի Կան Ինին։ Հարավկորեացի ֆուտբոլիստը փայլուն մրցաշրջան է անցկացնում Լա լիգայում։ ՄՅՈՒ-ի գլխավոր մրցակիցը նրա տրանսֆերի համար պայքարում, ճակատագրի հեգնանքով, կլինի հենց «Նապոլին», որին անգլիական ակումբը բավական չէ, որ փորձում է զրկել առաջատարներներից (Կիմ, Օսիմեն), հիմա էլ նրանց տրանսֆերային նպատակին է հավակնում։
Եվս մեկ հավանական տրանսֆեր՝ բայց անվճար․
«Մանչեսթեր Յունայթեդը» ուշադիր հետևում է «Յուվենտուսի» կիսապաշտպան Ադրիեն Ռաբիոյի պայմանագրի շուրջ ստեղծված իրավիճակին։ Մանկունիացիները ցանկանում են ֆրանսիացու տեղափոխությունը իրականացնել ազատ գործակալի կարգավիճակով, հայտնում է L’Equipe-ը: Ըստ աղբյուրի՝ «Մանչեսթեր Յունայթեդը» կրկին կփորձի ձեռք բերել կիսապաշտպանին՝ 2022 թվականի օգոստոսի և 2023 թվականի հունվարի անհաջող փորձերից հետո։ Այս անգամ «կարմիր սատանաները» մտադիր չեն վճարել ֆուտբոլիստի համար և ցանկանում են նրա հետ պայմանագիր կնքել որպես ազատ գործակալ: Մանկունիանցիների գլխավոր մարզիչ Էրիկ տեն Հագին հաջողվել է հնարավոր համագործակցության մասին անձամբ խոսել «Յուվենտուսի» ֆուտբոլիստի հետ ։ Հաղորդվում է, որ թուրինյան ակումբի ղեկավարությունը մտադիր չէ երկարաձգել պայմանագիրը Ռաբիոյի հետ։
Ֆանտաստիկայի ժանրից, բայց․․․ ո՞վ գիտի․․․
Տեսանելի ապագայում «Մանչեսթեր Յունայթեդը» կարող է վաճառվել։ Անգլիական ակումբը ձեռք բերելու հավակնորդներից մեկը Կատարի շեյխ Ջասիմն է, որն օրերս ևս մեկ անգամ նոր առաջարկ է արել ակումբը գնելու համար։ Եթե նա ձեռք բերի ակումբը, ապա ծրագրում է պայմանագիր կնքել աստղային հարձակվող Կիլիան Մբապեի հետ, հայտնում է TodoFichaes-ը: ՄՅՈՒ-ն այս դեպքում կարող է բավականին տպավորիչ տրանսֆերային առաջարկ անել ինչպես ՊՍԺ-ին, այնպես էլ շահավետ պայմանագիր առաջարկել անձամբ խաղացողին։ Միաժամանակ նշվում է, որ 24-ամյա Մբապեն երբեք չի դիտարկել տրանսֆերի այլ տարբերակներ, բացի «Ռեալից»։ Մամուլում ֆրանսիացի հարձակվողի ապագան առավել հաճախ կապում են հենց մադրիդյան գրանդի հետ:
