Ծանր քաշային կարգում WBO, IBF, WBA վարկածներով տիտղոսակիր Ալեքսանդր Ուսիկի մենեջերը հայտարարել է, որ ուկրաինացին WBC վարկածով աշխարհի չեմպիոն Թայսոն Ֆյուրիի հետ չի մենամարտի․ հանդիպումը նախատեսված էր ապրիլի 29-ին։
Աշխարհի բացարձակ չեմպիոնի կոչման համար հանդիպումը նախատեսված էր անցկացնել Լոնդոնի «Ուեմբլի» մարզադաշտում։ Նախկինում WBA-ն Ուսիկին և Ֆյուրիին պարտավորեցրել էր մինչև ապրիլի 1-ը մենամարտի պայմանագիր կնքել։
«Որքան էլ Ուսիկը փոխզիջման գնաց, նրանից պահանջներն ավելի էին շատանում», – ասել է Ուսիկի մենեջերը լրագրող Սթիվ Քիմին:
Ըստ Ուսիկի մենեջերի, ուկրաինացին հույս ունի ռինգ վերադառնալ հունիսին կամ հուլիսին՝ տիտղոսի պարտադիր պաշտպանության համար:
Ամենայն հավանականությամբ՝ մենամարտը կլինի WBA վարկածով աշխարհի չեմպիոն բրիտանացի Դանիել Դյուբուայի հետ։
