Հայաստանի ազատ ոճի երիտասարդական հավաքականը շարունակում է ելույթները Մ23 տարեկանների Եվրոպայի առաջնությունում։
Բուխարեստում ընթացող առաջնությունում Հայաստանի ներկայացուցիչ, 92 կգ քաշային Սերգեյ Սարգսյանը սփոփիչ գոտեմարտում 7-0 հաշվով առավելության է հասել Շվեդիայի ներկայացուցիչ Ֆարհադ Անոշեհի նկատմամբ և բրոնզե մեդալի համար պայքարելու հնարավորություն է ստացել։ Երրորդ տեղի համար գոտեմարտում Սարգսյանը կմրցի Ադրբեջանի ներկայացուցիչ Աբդուլալի Շաբանովի հետ։
Սարգսյանը պայքարը սկսել էր որակավորման փուլից, որտեղ պարտվել էր վրացի Անդրո Մարգիշվիլիին։ Վերջինս հասել է եզրափակիչ, ինչի արդյունքում հայ ըմբիշը սփոփիչ գոտեմարտ անցկացնելու իրավունք էր ստացել։
Հիշեցնենք՝ Հայաստանի ներկայացուցիչներից ավելի վաղ արծաթե մեդալ էր նվաճել Հայկ Պապիկյանը (70 կգ), իսկ Էդիկ Հարությունյանը (57 կգ) և Մարտին Սիմոնյանը (125 կգ) դարձել էին բրոնզե մեդալակիրներ։
Այսօր ավելի ուշ ոսկե մեդալի համար կգոտեմարտեն Մեժլում Մեժլումյանը (61 կգ) և Կնյազ Իբոյանը (86 կգ)։