ՀՀ կրթության, գիտության, մշակույթի և սպորտի նախարար Ժաննա Անդրեասյանը գրառում է կատարել Facebook սոցիալական ցանցի իր էջում՝ անդրադառնալով Օլիմպիական խաղերի բրոնզե մեդալակիր, աշխարհի ու Եվրոպայի չեմպիոն Արթուր Դավթյանին, որն օրերս դարձավ աշխարհի կրկնակի գավաթակիր․
«Որպեսզի մեր մարզիկները կենտրոնանան միայն իրենց մարզավիճակի և լավ արդյունքներ գրանցելու վրա՝ պետությունը գործարկել է խրախուսման քաղաքականություն նման հաջողություններ գրանցող մարզիկների համար։ Նախորդ տարեվերջին Արթուր Դավթյանը 18,2 մլն ՀՀ դրամ ստացավ իր փայլուն մրցելույթների համար՝ 10 մլն ՀՀ դրամ՝ աշխարհի չեմպիոնի կոչումը նվաճելու համար, 3,2 մլն ՀՀ դրամ՝ Եվրոպայի փոխչեմպիոն հռչակվելու համար, 5 մլն ՀՀ դրամ՝ որպես տարվա 10 լավագույն մարզիկներից մեկը։ Բացի այդ, հաջող մրցելույթների համար, ինչպես նաև Փարիզի օլիմպիական խաղերին պատշաճ պատրաստվելու համար մարզիկը ստանում է ամենամսյա վճարներ՝ ավելի քան մեկ միլիոն դրամ։
Ամեն անգամ, երբ մեր մարզիկները հաջողություն են գրանցում, ավելանում են այդ մարզաձևով զբաղվել ցանկացող երեխաները՝ ցանկանալով նմանվել մարզիկներին։ Դրանով մեր մարզիկները ոգևորում են մեր երեխաներին, նրանց առաջ մղում դեպի իրենց երազանքներն ու նպատակները»,- գրել է Ժաննա Անդրեասյանը։
Հիշեցնենք՝ Դավթյանը հիանալի է հանդես եկել Դոհայում ընթացող սպորտային մարմնամարզության աշխարհի գավաթի խաղարկության երկրորդ փուլի հենացատկի եզրափակչում և երկու ցատկի հանրագումարով 15,083 միավոր վաստակել։ Դավթյանը զբաղեցրել է առաջին հորիզոնականը և ոսկե մեդալ նվաճել։ Նա հաղթող էր ճանաչվել նաև առաջին փուլում։
