Անգլիայի լիգայի գավաթի եզրափակիչ․ ՄՅՈւ-ն ընդդեմ Նյուքասլի կամ առաջին տիտղոսի հետևից

Անգլիայի լիգայի գավաթի եզրափակիչում «Մանչեսթեր Յունայթեդն» այսօր կմրցի «Նյուքասլի» հետ։ Սա տարվա կտրվածքով առաջին տիտղոսն է, որը վիճարկում են անգլիական թիմերը։ Նոր ճանապարհ ընտրած «Մանչեսթեր Յունայթեդն» ընդդեմ Սաուդյան Արաբիայի կառավարության Հանրային ներդրումների հիմնադրամի (PIF) միջոցներով սնվող «Նյուքասլի»։

Հանդիպումը կկայանա փետրվարի 26-ին` Լոնդոնի «Ուեմբլի» ստադիոնում և կմեկնարկի Երևանի ժամանակով 20։30-ին։

Armsport-ն անդրադարձել է սպասվող հանդիպմանը, դրա կարևորությանը և այն հետևանքներին, որոնց կբերի թիմերից յուրաքանչյուրի հաղթանակը։

Մրցաշարի մասին

Անգլիայի լիգայի գավաթը (Carabao Cup` 2017-18 թթ․ մրցաշրջանից սկսած) hիմնադրվել է 1960 թվականին։ Ներկայումս մրցաշարին մասնակցում է 92 թիմ` անգլիական առաջին չորս դիվիզիոններից (Պրեմիեր լիգայից և երեք Ֆուտբոլային լիգաներից)։ Անգլիայի լիգայի գավաթը համարվում է պակաս հեղինակավոր, քան Անգլիայի Գավաթը, որն ունի շատ հարուստ պատմություն, իսկ խաղարկությանը մասնակցում են նույնիսկ այն ակումբները, որոնք չեն ընդգրկված ֆուտբոլային լիգայում (առաջին 4 դիվիզիոններում)։

Գործող գավաթակիրը «Լիվերպուլն» է, իսկ դրանից առաջ այս մրցաշարը կարելի էր անվանել Պեպ Գվարդիոլայի անվան գավաթ։ Ինչո՞ւ։ Որովհետև վերջին 5 տարում այս մասնագետի գլխավորած «Մանչեսթեր Սիթին» 4 անգամ նվաճել է Անգլիայի լիգայի գավաթը։

Թիմերի անցած ճանապարհը

«Մանչեսթեր Յունայթեդը» մրցաշարում պայքարն սկսել է 1/16 եզրափակիչից, որտեղ 4։2 հաշվով հաղթել է «Ասթոն Վիլլային»։ Հաջորդ փուլում 2։0 հաշվով առավելության է հասել «Բարնլիի» նկատմամբ, իսկ քառորդ եզրափակիչում 3։0 հաշվով ջախջախել է «Չարլթոնին»։

Կիսաեզրափակիչում «Նոթինգեմ Ֆորեսթի» հետ երկխաղյա դիմակայությունում ՄՅՈւ-ն հաղթել է ընդհանուր 5։0 հաշվով (3:0 և 2։0)։

«Նյուքասլը» մեկ փուլ ավելի վաղ է սկսել պայքարը՝ 1/32 եզրափակիչից, որտեղ հյուրընկալվելիս 2։1 հաշվով հաղթել է «Տրանմիր Ռովերսին»։ 1/16 և 1/8 եզրափակիչներում թիմը նվազագույն հաշվով հաղթել է «Քրիսթալ Փելասին» և «Բորնմութին», իսկ քառորդ եզրափակիչում 2։0 հաշվով առավելության հասել «Լեսթերի» նկատմամբ։

Կիսաեզրափակիչում «Սաութհեմփթոնի» հետ երկխաղյա դիմակայությունում «Նյուքասլը» հաղթել է ընդհանուր 3։1 հաշվով (1:0 և 2։1)։

Ի՞նչ մարզավիճակում են թիմերը

«Մանչեսթեր Յունայթեդը» ճախրում է։ Որևէ այլ բառով դժվար է նկարագրել թիմի վերջին արդյունքները։ Այս եզրափակիչից առաջ մանչեսթերյան ակումբը տնային խաղում կամային հաղթանակ տարավ և դուրս թողեց «Բարսելոնային» Եվրոպա լիգայի 1/16 եզրափակիչից։

Անգլիայի Պրեմիեր լիգայում «Մանչեսթեր Յունայթեդը» 59 միավորով 3-րդ տեղում է և 2 միավորով է զիջում 2-րդ տեղում ընթացող «Մանչեսթեր Սիթիին»։ «Արսենալից» թիմը հետ է մնում 5 միավորով, սակայն լոնդոնյան ակումբը 1 խաղ պակաս է անցկացրել։

«Նյուքասլը» 41 միավորով ԱՊԼ-ի մրցաշարային աղյուսակի 5-րդ տեղում է, սակայն կորցրած միավորներով թիմը լավագույն քառյակում է։ Դա ֆանտաստիկ արդյունք է մի թիմի համար, որ 1 տարի առաջ վտանգավոր գոտում էր։

Մարզիչները 

Էրիկ տեն Հագն իր գլխավորած թիմին առաջնորդում է դեպի առաջին տիտղոսը։ Դեռ 1 տարի էլ չի անցել հոլանդացի մասնագետի նշանակումից, սակայն «Մանչեսթեր Յունայթեդը» ոչ միայն կերպարանափոխվել է, այլ ինչպես նշել է հենց Էրիկ տեն Հագը, Եվրոպայի միակ թիմն է, որը պայքարում է միանգամից 4 տիտղոսի համար։ Այո, վերջին տարիների անօգնական թիմն այս մրցաշրջանում կարող է 4 տիտղոս նվաճել։ Թիմը շարունակում է պայքարը ԵԼ-ում և Անգլիայի գավաթում, ներքին առաջնությունում նույնիսկ չեմպիոնական շանսեր կան, իսկ Անգլիայի լիգայի գավաթում էլ դուրս է եկել եզրափակիչ։

Մի քանի հստակ ծրագրված տրանսֆերներ, ինչպիսիք են Տայլեր Մալազիան, Քրիստիան Էրիկսենը, Էնթոնին և Լիսանդրո Մարտինեսը, գումարած փորձառու Կազեմիրոն, հանած տոքսիկ միջավայր ստեղծող Ռոնալդուն, ավելացրած 2-րդ շունչ ստացած Ռեշֆորդը։ Սա է Էրիկ տեն Հագի հաջողության բաղադրատոմսը, բայց այս ֆուտբոլիստների խաղը չէր ստացվի, եթե չլիներ 53-ամյա մասնագետի համառությունն ու սառնասրտությունը։ Նա հունից դուրս է գալիս, երբ նույնիսկ մի փոքր, չնչին ու աննշան բան իր պլանավորածով չի ընթանում։ Տեն Հագի թիմում կարգապահությունը, ինչպես խաղադաշտում, այնպես էլ դրա սահմաններից դուրս, պետք է կատարյալ լինի։

«Մանչեսթեր Յունայթեդի» խաղը, եթե աչք չի շոյում, ապա գոնե վստահություն է հաղորդում, որ խաղադաշտում այնպիսի թիմ է, որը կարող է ցանկացած պահի բեկել հանդիպման ընթացքը։ Այս թիմը կարծես թե հանձվել չգիտի։ Դժվար է պատկերացնել, բայց գրեթե կես տարում Էրիկ տեն Հագը կարողացել է անել այն, ինչ չէր հաջողվել Սըր Ալեքս Ֆերգյուսոնից հետո թիմը գլխավորած որևէ մարզչի։

ՄՅՈւ-ի խաղի մասին կարելի է անվերջ խոսել։ Այն, թե ինչպես է Էրիկ տեն Հագը կարողանում առավելագույնը քաղել այնպիսի ֆուտբոլիստներից, որոնք կարծես թե սպառել էին իրենց, գովասանքի է արժանի։

Մանչեսթերյան թիմը շատ լավ է գործում ինչպես գնդակը վերահսկելու և դիրքային գրոհների, այնպես էլ հակագրոհների ժամանակ։

Էդի Հաուն իր կատարած աշխատանքով պարզապես զարմացնում է։ Շատերն ապշած էին, երբ «Նյուքասլի» նոր սեփականատերերը թիմի ղեկը վստահեցին երիտասարդ մասնագետի, որը 8 տարի աշխատել էր անգլիական համեստ «Բորնմութում»։ Այդ թիմին դուրս էր բերել Պրեմիեր լիգա և տարիներ անց նորից նահանջել Չեմպիոնշիփ։ Դրանից հետո՝ 2020 թվականի օգոստոսին, Հաուն լքել էր զբաղեցրած պաշտոնը։

Այնուամենայնիվ, Հաուն իր կատարած աշխատանքով ապացուցեց, որ նոր ղեկավարությունը չի սխալվել ընտրության հարցում։ 2021 թվականի նոյեմբերին, երբ երիտասարդ մասնագետն ստանձնեց «Նյուքասլի» ղեկը, թիմը 11 խաղում ոչ մի հաղթանակ չէր տարել և զբաղեցնում էր նախավերջին՝ 19-րդ տեղը։ Այդ մրցաշրջանը «Նյուքասլն» ավարտեց 11-րդ տեղում, իսկ այս տարի մոտ է ոչ միայն Չեմպիոնների լիգայի ուղեգիր, այլ նաև տիտղոս նվաճելուն։

Չնայած ֆինանսական մեծ հնարավորություններին, «Նյուքասլի» վերջին 1 տարում կատարած տրանսֆերներից միայն մեկն է եղել տարբերվող․ անգլիական ակումբը գրեթե 70 մլն եվրո է վճարել «Ռեալ Սոսյեդադի» հարձակվող Ալեքսանդր Իսակի համար։ Մյուս նորեկների համար ակումբը ծախսել է անգլիական ֆուտբոլի համար արդեն ծիծաղելի համարվող առավելագույնը 40-ական մլն եվրո։ Թիմի առաջին նորեկը նոր ղեկավարության օրոք եղել է «Ատլետիկոյի» և Անգլիայի հավաքականի պաշտպան Կիրան Տրիպյեն։ «Լիոնի» կիսապաշտպան Բռունո Գիմարայեշի տրանսֆերն արժեցել է 42 մլն եվրո, իսկ հարձակվող Քրիս Վուդի համար ակումբը վճարել է 30 մլն եվրո։ Նույնքան է արժեցել պաշտպան Սվեն Բոթմանի տրանսֆերը։ Անցած ձմեռային տրանսֆերային պատուհանի ընթացքում «Նյուքասլը» 42 մլն եվրոյով ձեռք է բերել «Էվերթոնի» երիտասարդ վինգեր Էնթոնի Գորդոնին։ Ընդհանուր առմամբ, ակումբը տրանսֆերային ճիշտ քաղաքականություն է որդեգրել և նորեկների մեծ մասի համար 30-40 մլն եվրոյից ավելի գումար չի վճարել։

Երկրորդ երիտասարդությունն է ապրում Միգել Ալմիրոնը, որն ԱՊԼ-ի ընթացիկ մրցաշրջանում թիմի լավագույն ռմբարկուն է՝ խփած 10 գոլով։ Հարձակման գծում լավ խաղ են ցուցադրում Ժոելինտոնը, Ջո Ուիլլոքը և Կալում Ուիլսոնը։

«Նյուքասլը» զարմացնում է նաև պաշտպանությունում ցուցադրած վստահ խաղով։ Թիմն ԱՊԼ-ի ընթացիկ մրցաշրջանի 23 խաղում ընդամենը 15 գոլ է բաց թողել։ Դա լավագույն արդյունքն է լիգայում։ Առաջատար «Արսենալը» բաց է թողել 23, իսկ 2-րդ տեղում գտնվող «Մանչեսթեր Սիթին» 24 գոլ։ Թիմը 6 անգամ 0։0 հաշվով ոչ-ոքի է խաղացել։ Եվ 4 խաղ ավարտել է 1։1 հաշվով ոչ-ոքիով։

Կարևոր է պրոցե՞սը, թե՞ արդյունքը

Շատ մարզիչներ են այս թեմային անդրադարձել։ Խորխե Սամպաոլին, որն այժմ մարզում է «Սևիլյան», 2015 թվականին, երբ գլխավորում էր Չիլիի հավաքականը, հետևյալ կերպ է պատասխանել այն հարցին, թե որքան կարևոր է խաղի ընթացքում գնդակին շատ տիրելու փաստը։

«Մի օր գնացի բար։ Ես մի աղջկա հետ էի։ Ամբողջ գիշեր զրուցեցինք, ծիծաղեցինք, սիրախաղ սկսվեց։ Ես նրան մի քանի կոկտեյլ հյուրասիրեցի։

Առավոտյան ժամը 5-ին մոտ մի տղա ներս մտավ, բռնեց աղջկա ձեռքից ու նրանք առանձնացան։ Այնտեղ նրանք սիրով զբաղվեցին, և աղջիկը հեռացավ այդ տղայի հետ։

Ստացվեց, որ գիշերվա մեծ մասը ես աղջկա հետ էի, բայց նա հեռացավ այդ տղայի հետ»։

Իսկ Ժոզե Մոուրինյուն, որի գլխավորած թիմը հաղթել էր «Մանչեսթեր Սիթիին», հետևյալ կերպ էր արձագանքել հնչած հարցին․

— «Մանչեսթեր Սիթին» 90 րոպեների ընթացքում վերահսկում էր գնդակը ժամանակի շուրջ 80 %-ը․․․

— Նրանք կարող են գնդակն իրենց հետ տուն տանել, իսկ ես վերցնում եմ 3 միավորը,- ասել էր Մոուրինյուն։

Ինչի՞ համար էին այս մեջբերումները։ Ֆուտբոլում արդյունքը ոչ միայն շատ կարևոր է, այլ երևի թե միակ բանն է, որի շնորհիվ ֆուտբոլիստը կամ մարզիչը կարողանում է իր անունը գրել պատմության մեջ։ Այո, բացառություններ լինում են միշտ ու բոլոր տեղերում, բայց լավ, գեղեցիկ, հիասքանչ, սակայն առանց տիտղոսների ֆուտբոլը չի գոհացնում որևէ երկրպագուի։ Շատ դեպքեր կարող ենք հիշել, որ թոփ ակումբում ընդամենը 1 մրցաշրջան տիտղոս չնվաճելուց հետո մարզիչները կորցրել են իրենց աշխատանքը։

Ի՞նչ կտա այս տիտղոսը թիմերից յուրաքանչյուրին

Եթե «Մանչեսթեր Յունայթեդը» նվաճի այս տիտղոսը, դա ոչ միայն կլինի Էրիկ տեն Հագի և թիմի կատարած լավ աշխատանքի վկայությունը, այլ նաև կհանդիսանա ավելի մեծ ուժերով առաջ շարժվելու խթան ։

Եթե «Նյուքասլը» դառնա Անգլիայի լիգայի գավաթակիր, դա ևս մեկ ապացույց կլինի, որ ֆուտբոլում փողից բացի մեծ դեր է խաղում նաև ակումբը ղեկավարելու ճիշտ քաղաքականությունը։

Մարզչական աշխատանքը հիմնականում գնահատվում է տիտղոսներով, նվաճումներով։ Համենայն դեպս, թոփ ակումբներում այդպես է։ Եթե Էրիկ տեն Հագին հիմա ՄՅՈւ-ի երկրպագուներն աստվածացնում են, ապա մրցաշրջանի վերջում լավագույն քառյակից դուրս մնալուց և տիտղոս չնվաճելուց հետո նրանց վերաբերմունքը փոխվելու է, բայց ոչ ոք չի նշելու, որ մրցաշրջանի մեկնարկից առաջ ՄՅՈւ-ն իր հնարավորություններով չէր կարող լրջորեն հավակնել լավագույն քառյակում տեղ զբաղեցնելուն։

Եզրափակելով պետք է նշել, որ Carabao Cup-ի եզրափակիչը կլինի Անգլիայի տղամարդկանց առաջին խոշոր եզրափակիչը վերջին 35 տարվա ընթացքում, որին որոշ երկրպագուների կթույլատրվի կանգնած հետևել հանդիպմանը։

Երկու ակումբները կստանան 867 տոմս, որոնք հասանելի կլինեն Ուեմբլի մարզադաշտի նոր հարթակներում։ Դրանք տեղակայված են յուրաքանչյուր դարպասի հետևում, ինչպես արևելյան, այնպես էլ արևմտյան տրիբունաներում, որպեսզի տեղավորեն երկու թիմերի երկրպագուներին։

Միհրան Ալեքսանյան