Հայաստանի մարմնամարզության ֆեդերացիայի նախագահ Գագիկ Վանոյանը լրագրողների հետ հանդիպման ժամանակ այսօր ամփոփել է Լիվերպուլում անցկացված աշխարհի առաջնությունում թիմի գրանցած արդյունքները.
«Գաղտնիք չէ, որ վերջին տարիներին մարմնամարզությունում մեր արդյունքները բարելավվում են տարեցտարի: Դա ի պատիվ մեր մարզիչների՝ Հակոբ Սերոբյանի գլխավորությամբ, և մեր մարզիկների, որոնք ջանք ու եռանդ չեն խնայում, քրտնաջան աշխատում են: Այսօր ամբողջ աշխարհին ցույց տվեցինք, որ քրտնաջան աշխատանքի, նվիրվածության և աշխատասիրության արդյունքում հնարավոր է ունենալ այսպիսի փառահեղ հաղթանակներ»,- ասել է ֆեդերացիայի նախագահ:
Ֆեդերացիայի նախագահը խոսել է նաև նոր մարզադպրոց ունենալու հեռանկարների մասին. «Վստահ եմ՝ 2-3 տարում ունենալու ենք միջազգային բոլոր ստանդարտներին համապատասխան սպորտային մարմնամարզության դահլիճ: Չկա օդում կախված հարց: Մարզադահլիճը կլինի, ասում եմ՝ որպես ֆեդերացիայի նախագահ»:
Հիշեցնենք՝ Անգլիայի Լիվերպուլ քաղաքում ավարտված սպորտային մարմնամարզության աշխարհի առաջնությունում Հայաստանի հավաքականը 1 ոսկե և 1 բրոնզե մեդալ է նվաճել:
Անկախ Հայաստանի պատմության մեջ առաջին անգամ մարմնամարզությունից աշխարհի չեմպիոնի կոչումը նվաճել է Տոկիոյի Օլիմպիական խաղերի բրոնզե մեդալակիր, Եվրոպայի չեմպիոն, 2022 թվականի Եվրոպայի փոխչեմպիոն, Եվրոպական խաղերի չեմպիոն, աշխարհի գավաթակիր Արթուր Դավթյանը: Հայաստանի հավաքականի անդամ, 38-ամյա Հարություն Մերդինյանը երրորդ տեղն է զբաղեցրել՝ կարիերայում երկրորդ անգամ հռչակվելով աշխարհի առաջնությունների բրոնզե մեդալակիր: Նժույգթափեր վարժության եզրափակիչում Եվրոպայի կրկնակի չեմպիոն Հարություն Մերդինյանը 14.733 միավոր է վաստակել և կանգնել պատվո հարթակի երրորդ աստիճանին:
