Դեկտեմբերի 29, 2019 թ․․․ Դորտմունդի «Բորուսիան» իր պաշտոնական կայքում հայտարարեց «Ռեդ Բուլ Զալցբուրգի» հարձակվող Էրլինգ Հոլանդի տեղափոխության մասին: Շատերի համար նա հերթական հեռանկարային ֆուտբոլիստն էր, հարյուրավորներից մեկը․․․ Հերթակա՞ն․․․ Հոլանդը համաձայն չէ․․․
Հոլանդաստիկ մեկնարկը Բունդեսլիգայում
Հունվարին Գերմանիայի Բունդեսլիգայի 18-րդ տուրում «Աուգսբուրգն» ընդունել էր Դորտմունդի «Բորուսիային»: Խաղում խելահեղ պայքար ծավալվեց: Խաղի 56-րդ րոպեի դրությամբ հյուրերը պարտվում էին 1-3 հաշվով: Հենց այդ ժամանակ փոխարինման մտավ թիմի պատանի տաղանդ Էրլինգ Հոլանդը՝ նշելով նորամուտը թիմի կազմում պաշտոնական խաղերում: 3 րոպե անց Հոլանդը կրճատեց հաշվի տարբերությունը: Հոլանդի գոլից դեռ ուշքի չէին եկել տանտերերը, երբ Սանչոն հավասարեցրեց հաշիվը՝ 3:3: Ոգևորված հյուրերը նետվեցին առաջ ու խփեցին նաև 4-րդ ու 5-րդ գնդակները:
ՖԱՆՏԱՍՏԻԿ խաղ ցուցադրեց Էրլինգ Հոլանդը՝ ձևակերպելով հեթ-տրիկ: Եվ դա միայն սկիզբն էր․․․
⚽ 19-րդ տուրում «Քյոլնի» դեմ հանդիպման ժամանակ (5:1), նա 2 գոլի հեղինակ դարձավ: Սա 19-ամյա նորվեգացու երկրորդ հանդիպումն էր «Բորուսիայի» կազմում:
Մինչ այդ, «Աուգսբուրգի» դեմ իր նորամուտի խաղում Հոլանդը 3 գոլ էր հեղինակել:
Այսպիսով, Հոլանդը դարձավ առաջին ֆուտբոլիստը, ով Բունդեսլիգայում իր մեկնարկային երկու խաղերում խփեց 5 գոլ։ Բացի այդ, նա առաջին ֆուտբոլիստն է, ով կարողացավ այդ արդյունքին հասնել ընդամենը 59 րոպեում:
⚽ Գերմանիայի առաջնության 20-րդ տուրի խաղում Դորտմունդի «Բորուսիան» հաղթեց Բեռլինի «Յունիոնին»: Խաղը, որն անցկացվեց «Սիգնալ Իդունա Պարկ» մարզադաշտում, ավարտվեց 5։0 հաշվով՝ հօգուտ տանտերերի: «Բորուսիայի» կազմում դուբլ ձևակերպեց թիմի նորվեգացի նորեկ Էրլինգ Հոլանդը, ով առաջին անգամ խաղադաշտ մտավ մեկնարկային կազմում: Առաջնության առաջին երեք հանդիպումներում Հոլանդը գրանցեց Բունդեսլիգայի ռեկորդ՝ խփելով յոթ գոլ:
🕵♀ Հետաքրքիր փաստ․ 2016 թ-ին Հոլանդը մարզվել է «Հոֆենհայմի» կազմում, խաղացել Մ-16 տարեկանների թիմում: Ակումբի սկաուտները բարձր են գնահատել ֆուտբոլիստի պոտենցիալը, բայց Հոլանդն ուզել է ամսական 5000 եվրո աշխատավարձ, իսկ գերմանական թիմում չեն համաձայնվել: Երիտասարդական թիմում ամենաբարձր աշխատավարձը եղել է 2000 եվրո ու չեն ցանկացել համակարգ փոխել:
⚽ Գերմանիայի Բունդեսլիգայի 22-րդ տուրի շրջանակում Դորտմունդի «Բորուսիան» ընդունեց «Այնտրախտին»(4:0): Խաղի 54-րդ րոպեին Ջեյդոն Սանչոյի փոխանցումից հետո գոլի հեղինակ դարձավ Էրլինգ Հոլանդը: Այսպիսով, նորվեգացին Բունդեսլիգայի նոր ռեկորդ սահմանեց: Նա առաջին 5 խաղերում դարձավ 8 գոլի հեղինակ:
Արդյունքում, նորվեգացի հարձակվողը ճանաչվել է Բունդեսլիգայի հունվար ամսվա լավագույն խաղացող:
2 ռեկորդ և հետաքրքիր ցուցանշ ՉԼ-ի 1/8 եզրափակչի ՊՍԺ-ի հետ խաղում։ Եվ մեկ հետաքրքիր փաստ նրա մանկությունից
Դորտմունդի «Բորուսիայի» հարձակվող Էրլինգ Հոլանդը դուբլ է ձևակերպել Չեմպիոնների լիգայի 1/8 եզրափակչի՝ ՊՍԺ-ի հետ տնային խաղում ու օգնել դորտմունդցիներին 2:1 հաշվով հաղթանակ տանել:
⚽ Նորվեգացին դարձել է առաջին ֆուտբոլիստը, որը Չեմպիոնների լիգայի մեկ խաղարկության ընթացքում գոլ է խփում երկու տարբեր թիմերի կազմերում: Ավելի վաղ նա 8 գոլ էր խփել «ՌԲ Զալցբուրգի» կազմում խմբային փուլում:
⚽ ՊՍԺ-ի հետ խաղում երկու անգամ առանձնանալով ՝ Հոլանդը մրցաշարում իր գոլերի քանակը հասցրեց 10-ի: Այս ցուցանիշին հասնելու համար նրան պետք եղավ յոթ հանդիպում: Սա ռեկորդային ցուցանիշ է Չեմպիոնների լիգայի պատմության մեջ:
«Ես ուզում եմ առաջինը լինել ռմբարկուների ցուցակում: Ինչ վերաբերում է երկրորդ գոլին, ես երկար չմտածեցի, պարզապես օգտվեցի այդ պահից: Սրանք այն պահերն են, որոնց համար աշխատում ենք: Սա ֆանտաստիկ է»,- մեջբերում է Հոլանդին ՈւԵՖԱ-ի պաշտոնական կայքը:
⚽ Սոցիալական ցանցերում կայացած հանդիպումից հետո պարզ դարձավ մի հետաքրքիր փաստ ևս. 19-ամյա Հոլանդը շարունակում է պահպանել համաշխարհային ռեկորդը 5-ամյա երեխաների մեջ`տեղից ցատկ մարզաձևում: 2006-ի հունվարի 22-ին 5-ամյա Հոլանդը ցատկել է 163 սմ, ինչը դեռևս աշխարհի լավագույն արդյունքն է այս տարիքային կարգում:
⚽ Եվ սա դեռ ամենը չէ․ ինչպես տեղեկացնում է Sky Sport Italia-ն երիտասարդ «վիկինգը» վերջին խաղի դրվագներից մեկում 60 մետր տարածությունը վազել է 6,64 վայրկյանում: 19-ամյա ֆուտբոլիստը շատ մոտ է եղել թեթև աթլետիկայի ռեկորդին, որը 60 մետր տարածությունում կազմում է 6,34 վայրկյան:
Եվ․․․ կարծում ենք, սա դեռ սկիզբն է և երիտասարդ «վիկինգի» նավարկությունը մեծ ֆուտբոլի օվկիանոսում միայն նոր է մեկնարկում․․․
Վար Բաբայան
