Հայաստանի Մ17 տարեկանների հավաքականը ՈւԵՖԱ կանանց Եվրոպայի Մ-17 առաջնության B լիգայի առաջին խմբի որակավորման փուլում Լյուքսեմբուրգում մրցել է Վրաստանի իր հասակակիցների հետ և 3-0 հաշվով հաղթանակ տարել։
Հայաստանի թիմի կազմում դուբլի հեղինակ է դարձել 15-ամյա Մանե Ներսիսյանը՝ հեղինակելով իր առաջին գոլերը Հայաստանի Մ-17 հավաքականի կազմում։ Ի դեպ, Վրաստանի նկատմամբ տարած հաղթանակն առաջինն էր նաև Հայաստանի Մ-17 տարեկանների հավաքականի պատմության մեջ։
Այս տարվա մարտին Մանեն դարձավ ՈՒԵՖԱ-ի Մ17 տարեկանների պատմության ամենաերիտասարդ խաղացողը, երբ 14 տարեկանում մասնակցեց Հայաստան-Թուրքիա խաղին։ Երեկ արդեն Մանեն պատմություն կերտեց Հայաստանի Մ-17 հավաքականի հետ՝ նպաստելով թիմի առաջին հաղթանակին և խփելով իր առաջին գոլն ինչպես հավաքականում, այնպես էլ ՈՒԵՖԱ-ի մրցաշարերում։
Իզաբելլա (Մանե) Ներսիսյանը ծնվել է ԱՄՆ-ում՝ Լոս-Անջելեսում, 2007 թվականի մարտի 17-ին։ 5 տարեկանից հաճախել է ֆուտբոլի, իսկ 7 տարեկանից սկսել է խաղալ Կալիֆորնիայի տարբեր թիմերում։ 10-15 տարեկանում Մանեն արդեն մի շարք մրցաշարերի հաղթող էր։ Մանեն նաև ԱՄՆ Օլիմպիական զարգացման ծրագրի անդամ է, և 2 տարի անընդմեջ դարձել է Օլիմպիական զարգացման մրցաշարի հաղթող։
Այժմ Մանեն հանդես է գալիս ԱՄՆ Աղջիկների բարձրագույն լիգայում ( Elite Club National League)` LA FC ակումբում, իսկ ՀՖՖ-ից Հայաստանի կանանց պատանեկան հավաքականին միանալու հրավերը ստացել է 2021 թվականին և մեծ ուրախությամբ ընդունել այն։ Մանեն երազում է դառնալ ամենաերիտասարդ հայ պրոֆեսիոնալ ֆուտբոլիստուհին և Հայաստանի հավաքականի հետ մասնակցել Եվրոպայի առաջնություններին և Օլիմպիական խաղերին։
Հիշեցնենք՝ Հայաստանի Մ-17 տարեկանների հավաքականն իր հաջորդ հանդիպումը կանցկացնի հոկտեմբերի 10-ին։ Որակավորման փուլի վերջին խաղում մեր ընտրանին կմրցի Լյուքսեմբուրգի հավաքականի հետ։
