Այսօր՝ սեպտեմբերի 8-ին մեկնարկում է Եվրոպա լիգայի 2022/23 թթ․ մրցաշրջանի խմբային փուլը։ Չեմպիոնների լիգայի երկու խաղային օրերից հետո Եվրոպա լիգան կարծես աղանդեր լինի ընթրիքի սեղանին։ Շատերի համար այն այդքան էլ հետաքրքիր չէ, սակայն պայքարով և դիտարժանությամբ այս մրցաշարի հանդիպումները շատ անակնկալներ են մատուցում։ Armsport-ի այս անդրադարձը մասնակից թիմերի, ձևավորված խմբերի և մրցաշարի ֆավորիտների մասին է։
Ձևաչափի փոփոխություն, որը նոր շունչ տվեց մրցաշարին
Թիմերը բաժանվել են 8 խմբերի։ Այո, արդեն երկրորդ տարին անընդմեջ այս մրցաշարը նորովի է ներկայանում։ Եվրոպական ակումբային ֆուտբոլում նշանակությամբ երրորդ մրցաշարի՝ Կոնֆերենցիաների լիգայի հայտնվելուց հետո ՈՒԵՖԱ-ն որոշեց սինխրոնացնել իր հովանու տակ անցկացվող բոլոր 3 մրցաշարերի (ՉԼ, ԵԼ և ԿԼ) խմբային և փլեյ-օֆֆ փուլերի ժամանակացույցը։ Բացի այդ, կառույցը փոխել է մրցաշարի ձևաչափը և 48 թիմի փոխարեն, հիմա 32-ն են խմբային փուլում (նույնքան, որքան եվրոպական ակումբային ամենահեղինակավոր մրցաշարում՝ Չեմպիոնների լիգայում)։
Դրա շնորհիվ փոփոխվել է որակավորման կարգը, ուստի խմբային փուլ հասած թիմերն էլ համեմատաբար ավելի բարձրակարգ են, քան նախորդ տարիներին։
Անցած մրցաշրջանում Եվրոպա լիգայի կիսաեզրափակչում խաղացել են «Լայպցիգը», «Վեսթ Հեմը», «Այնտրախտը» և «Ռեյնջերսը»։ Եզրափակչում Ֆրանկֆուրտի «Այնտրախտը» հետխաղային 11 մետրանոց հարվածներով հաղթել է «Գլազգո Ռեյնջերսին»։
Հետաքրքիր է, որ անգլիական ակումբներն սկսել են լուրջ վերաբերվել այս մրցաշարին։ «Վեսթ Հեմն» իսկապես լուրջ հավակնություններ ուներ նախորդ տարի։ Երկար տարիներ անգլիական և իտալական ակումբներին, այսպես ասած, հարիր չէր Եվրոպա լիգայում խաղալը։ Այդ թիմերը նախապատվությունը տալիս էին ներքին առաջնություններին։ Առաջին հանգամանքը, որը փոխեց նման ակումբների մոտեցումը, դարձավ ՈՒԵՖԱ-ի հեղափոխական քայլը։ Ինչպե՞ս անել, որ մրցաշարն ավելի մեծ արժեք ունենա։ Նույնիսկ ավելի մեծ, քան տիտղոս նվաճելն է։ Դե իհարկե, գավաթակիր թիմին ՉԼ-ի ուղեգիր պարգևելը։ Իսկ նախորդ մրցաշրջանից առաջ վերոնշյալ ձևաչափային փոփոխություններն ավելի մեծ շարժառիթ են տվել մասնակից բոլոր թիմերին։
Եվ այսպես, 32 թիմ, որոնք վիճակահանության արդյունքում բաժանվել են 8 խմբի (A, B, C, D, E, F, G, H) 4-ական թիմերով։
Խմբերին կարող եք ծանոթանալ ԱՅՍՏԵՂ։
Ֆավորիտները
Ընդհանուր մրցաշարի ֆավորիտներից խոսելը դեռ վաղ է, քանի որ Չեմպիոնների լիգայի խմբերում 3-րդ տեղը զբաղեցրած թիմերը 1/16 եզրափակչի երկխաղյա դիմակայություններում մրցելու են Եվրոպա լիգայի խմբերում երկրորդ տեղը զբաղեցրած թիմերի հետ։ Օրինակ՝ Չեմպիոնների լիգայի C խմբում հայտնվել են հետևյալ թիմերը՝ «Բավարիա», «Բարսելոնա», «Ինտեր» և «Վիկտորիա Պլզեն»։ Այսինքն, եթե լինենք իրատես, ապա խմբում վերջին տեղն է զբաղեցնելու չեխական թիմը, իսկ իսպանա-գերմանա-իտալական գրանդերից մեկը լինելու է երրորդը և պայքարը շարունակելու է Եվրոպա լիգայում։ Իսկ «Բավարիա», «Բարսելոնա» և «Ինտեր» թիմերից յուրաքանչյուրը կլինի բացահայտ ֆավորիտ ԵԼ-ում։
Իսկ, եթե դիտարկենք միայն Եվրոպա լիգայի խմբային փուլի 32 թիմերին, ապա ֆավորիտ են «Մանչեսթեր Յունայթեդը», «Արսենալը», ինչու ոչ՝ գործող գավաթակիր «Այնտրախտը» և գուցե նաև «Ռոման», որը նախորդ տարի նվաճել էր Կոնֆերենցիաների լիգայի գավաթը։
ՊՍՎ-ն, «Բետիսը», «Ռեալ Սոսյեդադը» և «Մոնակոն» կարող են հնարավորինս առաջ գնալ փլեյ-օֆֆում, եթե, իհարկե, լուրջ վերաբերվեն այս մրցաշարին։
Իրականում, այս տարին շատ անկանխատեսելի է լինելու։ Սեպտեմբեր-հոկտեմբերը ֆուտբոլում դաժան և «արյունոտ» շրջան է։ Գրեթե ամեն տարի այս հատվածում առաջատար ակումբները ֆուտբոլիստներ են կորցնում վնասվածքների պատճառով։ Բացի այդ, այս տարին տարբերվում է մյուսներից նաև նրանով, որ պատմության մեջ առաջին անգամ Աշխարհի առաջնությունն անցկացվելու է ձմռանը՝ նոյեմբերի 20-ից դեկտեմբերի 18-ը, Կատարում։
Պարզ է՝ ձմռանը եվրագավաթային խաղեր չեն լինում, սակայն ներքին առաջնություններն այնքան խիտ գրաֆիկ ունեն, որ ամեն ինչ խառնվելու է իրար։ Աշնան 2․5 ամսում պետք է եվրագավաթային 6 տուր անցկացվի։ Ներքին առաջնություններում կատաղի պայքար է։ Իտալական A Սերիայի առաջին տուրից հետո ամեն 2-րդ թիմի նվազագույնը 1 ֆուտբոլիստ մկանային ծանրաբեռնվածության պատճառով շուրջ 1-2 շաբաթ շարքից դուրս է մնացել։ Եթե դա լիներ 1 կամ 2 թիմի մոտ, կարող էինք ասել, որ խնդիրը լոկալ է, բայց այսքան շատ մկանային վնասվածքները միայն խիտ գրաֆիկի արդյունքն են։
Ինչևէ, վերադառնանք Եվրոպա լիգային։ Անկասկած, անչափ հետաքրքիր է լինելու։ Մեծ են սպասումները «Մանչեսթեր Յունայթեդից», որը ԱՊԼ-ում ձախողված մեկնարկից հետո 4-խաղյա անպարտելի շարք է գրանցել։
Մանչեսթերյան ակումբի գլխավոր մարզիչ Էրիկ տեն Հագը մաքսիմալիստ է։ Համենայնդեպս, այդպիսի տպավորություն է ստեղծվում, երբ լսում ես այս մասնագետի խոսքերը։ Թերևս նա փորձելու է կրկնել Ժոզե Մոուրինյուի նվաճումը և ակումբում իր առաջին մրցաշրջանում եվրագավաթային տիտղոս նվաճել (Մոուրինյուի ՄՅՈՒ-ն, որտեղ այդ ժամանակ խաղում էր Հենրիխ Մխիթարյանը, 2016/17 թթ․ մրցաշրջանում նվաճել է Եվրոպա լիգայի գավաթը)։
Անկասկած, շատ հետաքրքիր և ինտրիգային հարցեր կան, բայց դրանցից ամենագլխավորը կապված է ՄՅՈՒ-ի հարձակվող Կրիշտիանու Ռոնալդուի հետ։ Պորտուգալացին երբևէ չի խաղացել Եվրոպա լիգայի մրցաշարում։ 37-ամյա ռմբարկուն ցանկանում էր փոխել ակումբային գրանցումը, բայց մնաց ՄՅՈՒ-ում։ Եվ դատելով այն հանգամանքից, որ Ռոնալդուն ԱՊԼ-ի խաղերին չի հայտնվում թիմի մեկնարկային կազմում, կարելի է ենթադրել, որ Կրիշտիանուն մեկնարկային րոպեներից դաշտ է դուրս գալու Եվրոպա լիգայի հանդիպումներում։ Տեսնել Ռոնալդուին Եվրոպա լիգայում, անկասկած, շարքային իրադարձություն չէ։ Եվ անչափ հետաքրքիր է, թե ինչ մոտիվացիայով կխաղա այս մրցաշարում Չեմպիոնների լիգայի պատմության գլխավոր ռմբարկուն (141 գոլ)։
Հակառակ իրավիճակն է «Արսենալի» մոտ, որը 5 անընդմեջ հաղթանակներից հետո պարտվել է նույն ՄՅՈՒ-ին, սակայն շարունակում է գլխավորել մրցաշարային աղյուսակը։
Եթե Միկել Արտետան ուզում է արդարացնել վերջին 2 տարիներին տրանսֆերների վրա ծախսված գումարները, ապա «Արսենալը» նվազագույնը պետք է մինչև վերջ պայքարի ընթացիկ մրցաշրջանում տիտղոս նվաճելու համար։ Դա անելու լավագույն տարբերակը Եվրոպա լիգան հաղթելն է։ Դժվար թե իսպանացին հանդգնի ձեռնոց նետել իր հայրենակցին՝ Պեպ Գվարդիոլային, որի «Մանչեսթեր Սիթին» Անգլիայի չեմպիոնի գլխավոր հավակնորդն է։
Սպասվող անակնկալներն ու հայտնությունները
Եվրագավաթային յուրաքանչյուր մրցաշարում ամեն տարի լինում է նվազագույնը մեկ թիմ, որն «իր գլխից մի քանի անգամ բարձր է ցատկում»։ Ու որպես կանոն, խմբային փուլից առաջ դրա մասին ոչինչ չի վկայում։ Այնպես որ, այս անգամ ևս անակնկալներ և հայտնություններ կլինեն։
Կան թիմեր, որոնք իսկապես կարող են պայքարել տիտղոսի համար և օգտագործել այն հանգամանքը, որ թոփ թիմերի դեմ խաղալիս, մրցակիցը կթերագնահատի հակառակորդին կամ լուրջ չի վերաբերվի մրցաշարին։
Օրինակ՝ Մանուել Պելեգրինիի «Բետիսը» կարող է «կռիվ տալ», եթե «Ռոմայի» հետ խմբում զբաղեցնի առաջին տեղը։
Լեգենդար նախկին ֆուտբոլիստ Ռուդ վան Նիստելռոյի գլխավորած ՊՍՎ-ն կարող է կրկնել «Ֆեյենորդի» անցած ճանապարհը։ Նախորդ մրցաշրջանում «Ֆեյենորդը» հասել էր Կոնֆերենցիաների լիգայի եզրափակիչ, որտեղ զիջեց «Ռոմային»։
Անկասկած, հիասթափություն կլինի, եթե ՄՅՈՒ-ն և «Արսենալը» տպավորիչ ելույթներ չունենան։ Թիմերն ունեն կազմի խորություն, բարձր մակարդակ և կարող են գոնե խմբային փուլում ինչպես հարկն է տրամադրվել խաղերին։
Ցավոք, չունեցանք հայկական թիմ Եվրոպա լիգայի այս խաղարկությունում, քանի որ Հայաստանի չեմպիոն «Փյունիկը» ԵԼ-ի որակավորման փլեյ-օֆֆում զիջեց Տիրասպոլի «Շերիֆին»։ Փոխարենը, երկրորդ տարին անընդմեջ Հայաստանը ներկայացված կլինի Կոնֆերենցիաների լիգայում։ Այս մրցաշարին և հատկապես «Փյունիկին», նույնպես կանդրադառնանք։
Եվրոպա լիգայի խաղերի ժամանակացույցը
Խմբային փուլի հանդիպումները կանցկացվեն հետևյալ ժամանակացույցով՝
Տուր 1 — Սեպտեմբերի 8
Տուր 2 — Սեպտեմբերի 15
Տուր 3 — Հոկտեմբերի 6
Տուր 4 — Հոկտեմբերի 13
Տուր 5 — Հոկտեմբերի 27
Տուր 6 — Նոյեմբերի 3
Անցումային խաղերը կկայանան 2023 թվականի փետրվարին, 1/8 եզրափակչի խաղերը՝ մարտին, քառորդ եզրափակչի խաղերը՝ ապրիլին, իսկ կիսաեզրափակչի հանդիպումները՝ մայիսին։
Եզրափակիչը նախատեսված է մայիսի 31-ին՝ Հունգարիայի մայրաքաղաք Բուդապեշտի «Պուշկաշ Արենայում»։ Հանդիպումները, բացի որոշ բացառություններից, մեկնարկելու են Երևանի ժամանակով 20։45-ին և 23։00-ին։ Հոկտեմբերի վերջին կիրակից հետո նախատեսված խաղերը կմեկնարկեն մեկ ժամ ուշ (21:45 և 23։55), քանի որ Եվրոպան կանցնի ձմեռային ժամանակի։