Տոկիոյի օլիմպիական խաղերի բրոնզե մեդալակիր, բռնցքամարտիկ Հովհաննես Բաչկովը կարիերայում երրորդ անգամ նվաճել է Եվրոպայի չեպիոնի տիտղոսը:
Երևանում ավարտին մոտեցող Եվրոպայի առաջնության 63,5 կգ քաշայինների եզրափակչում Բաչկովը երեք ռաունդում էլ ունենալով բացարձակ առավելություն՝ 5-0 հաշվով ֆանտաստիկ հաղթանակ է տարել Ֆրանսիայի ներկայացուցիչ Լյունի Համրուիի նկատմամբ: Երրորդ ռաունդում նա նաև նոկդաունի է ենթարկել մրցակցին։
Սա Բաչկովի երրորդ չեմպիոնությունն էր: Առաջին անգամ գյումրեցի բռնցքամարտիկը Եվրոպայի չեմպիոնի կոչումը նվաճել էր 2017 թվականին Խարկովում անցկացված առաջնությունում, իսկ երկրորդ ոսկե մեդալը նվաճել էր 2019 թվականին Մինսկում տեղի ունեցած Եվրոպական խաղերում, որն այդ տարի փոխարինում էր Եվրոպայի առաջնությանը: