Այսօր Կարեն Դեմիրճյանի անվան մարզահամերգային համալիրում տեղի ունեցավ Երևանում կայանալիք բռնցքամարտի Եվրոպայի առաջնության վերաբերյալ մամուլի ասուլիս, որին մասնակցեցին Եվրոպայի առաջնության կազմկոմիտեի նախագահ Արայիկ Հարությունյանը, ԿԳՄՍ փոխնախարար Կարեն Գիլոյանը և Հայաստանի բռնցքամարտի ֆեդերացիայի նախագահ Հովհաննես Հովսեփյանը:
«Բացման արարողության մանրամասները չենք բացահայտի, բայց շատ գեղեցիկ շոու է սպասվում: Երկրպագուներին հրավիրում եմ համալիր՝ կիսելու լավագույն տպավորությունները։
Կարապի լճում և Հյուսիսային պողոտայում կլինի ֆան գոտի։ Հնարավոր է՝ բռնցքամարտիկները ևս երբեմն լինեն ֆան գոտում, շփվեն երկրպագուների հետ»,- ասել է Եվրոպայի առաջնության կազմոմիտեի նախագահ Արայիկ Հարությունյանը։
Եվրոպայի բռնցքամարտի առաջնությունը կայանալու է մայիսի 21-31-ը Կարեն Դեմիրճյանի անվան մարզահամերգային համալիրում: Բացման արարողությունը կկայանա այս կիրակի՝ 21։00-ին։ Մայիսի 30-ին EUBC գործկոմի առաջին նիստը կայանալու է Հայաստանում։