Հայաստանի բռնցքամարտի ֆեդերացիայի նախագահ Հովհաննես Հովսեփյանը հանդես է եկել ամանորյա ուղերձով.
«Սիրելի մարզիկներ, մարզիչներ բռնցքամարտի աշխարհի հարգելի ներկայացուցիչներ, մրցաշրջան 2021-ը հայկական բռնցքամարտի համար թերևս ամենահաջողներից էր:
Մեր բոլորիս թիմային աշխատանքը անպտուղ չմնաց ու մենք գրանցեցինք աննախադեպ արդյունք:
12 տարվա ընդմիջումից հետո Հայաստանը կրկին մեդալ նվաճեց օլիմպիական խաղերի բռնցքամարտի ստուգատեսում: Պատմության մեջ առաջին անգամ մենք փոխչեմպիոն ունեցանք աշխարհի առաջնության գերծանր քաշային կարգում: Փայլուն ելույթներ ունեցան նաև մեր պատանի ու երիտասարդ բռնցքամարտիկները: Ընդհանուր առմամբ աշխարհի և Եվրոպայի առաջնություններում, նաև ԱՊՀ և օլիմպիական խաղերում մեր բռնցքամարտիկները նվաճեցին 30 մեդալ, որից 5 ոսկե, 11 արծաթե և 14 բրոնզե»,- ընդգծել է Հովհաննես Հովսեփյանը:
Նա նաև կարևորել է մրցավարական ոլորտում Հայաստանի ձեռքբերումը. Միջազգային կարգի մրցավար Բագրատ Ավոյանը ստացել է երկրորդ աստղը և հետագայում կսպասարկի ավելի բարձրակարգ մրցաշարեր:
Խոսելով հաջորդ տարվա անելիքների մասին՝ ֆեդերացիայի նախագահն ընդգծել է՝ մրցաշրջան-2022-ը ևս կարևոր տարի է.
«Պատմության մեջ առաջին անգամ Հայաստանը ընդունելու է բռնցքամարտի մեծահասակների Եվրոպայի առաջնությունը: Սա լուրջ մարտահրավեր է հայկական բռնցքամարտի ընտանիքի համար և ես վստահ եմ, որ բոլորս միասին անցկացնելու ենք պատմության լավագույն առաջնություններից մեկը, որը հուսով եմ կնշանավորվի նաև մեր հաղթանակներով:
Սիրելի ընկերներ, տարվա ավարտին ցանականում եմ շնորհավորել բոլորիդ՝ ամանորի տոների կապակցությամբ: Մեր ազգին ամենակարևորը խաղաղություն եմ մաղթում, իսկ մեր մարզիկներին փառահեղ հաղթանակներ: Թող որ յուրաքանչյուրիդ աշխատանքը պսակվի ոսկե նվաճումներով»:
