Հայաստանի ազգային հավաքականը Եվրո-2020-ի ընտրական փուլի, թերևս, ամենակարևոր խաղերը կանցկացնի տնից հեռու։ Խաղերը, որոնցից մեզ օդ ու ջրի պես 3-ական միավոր է անհրաժեշտ, կկայանան մրցակիցների հարկի տակ։ Սա, գուցե, իր լավ կողմը ևս ունի․ սեփական երկրպագուների աջակցությունն, իհարկե, հաճախ է առաջ մղում թիմին անհնարին թվացող պահերին, բայց այսպիսի պատասխանատու խաղերում կարող է նաև լրացուցիչ լարվածություն հաղորդել։
Ինչևէ, Հայաստանի ազգային հավաքականն արդեն այսօր Լիխտենշտեյնի մայրաքաղաք Վադուցում գտնվող «Ռեյնպարկ» մարզադաշտում կմրցի այդ երկրի ազգային թիմի հետ։
Այս հավաքականի հետ խաղալու փորձ մեր թիմն ունի։ Նրանց հանդիպել ենք 3 անգամ՝ երկու անգամ Ազգերի լիգայում ու մեկ անգամ Եվրո-2020-ի որակավորման փուլի տնային խաղում։ Արդյունքները գոհացնող են՝ 2 հաղթանակ, 1 ոչ-ոքի։ Այս անգամ ևս մեր թիմն ամեն գնով պետք է 3 միավորով հեռանա Լիխտենշտեյնից։ Այս կարծիքին է նաև մեր թիմի հարձակվող Ալեքսանդր Կարապետյանը, որը նախորդ խաղերում արդեն երկու անգամ գրավել է Լիխտենշտեյնի դարպասն ու, երևի, գիտի՝ որտեղ է թաքնված այնտեղ տանող բանալին։
«Ցածր կարգի թիմերի դեմ խաղալը դժվար է, որովհետև նրանց մոտիվացիան շատ ուժեղ է, բայց մենք պետք է հաղթենք ու 3 միավորով հեռանանք Լիխտենշտեյնից»,-նախախաղային մամուլի ասուլիսի ժամանակ ասել էր Կարապետյանը։
Օրեր առաջ կայացած «Լեչե»-«Ռոմա» խաղից հետո պարզ դարձավ, որ հռոմեացիների կազմում վնասվածք ստացած Հենրիխ Մխիթարյանը ստիպված կլինի 2-3 շաբաթ բացակայել։ Դա նշանակում էր, որ Մխիթարյանը չի խաղա նաև հավաքականի կարևորագույն՝ Լիխտենշտեյնի ու Ֆինլանդիայի ընտրանիների դեմ խաղերում։ Այս տեղեկությունը հուսահատեցրեց երկրպագուներին, բայց առաջարկում ենք մտովի վերադառնալ Եվրո-2016-ի ընտրական փուլի Հայաստան-Սերբիա խաղին, որը լավագույն օրինակն է, թե ինչպես թիմն առանց առաջատարների կարող է կռիվ տալ դաշտում․ Հենրիխ Մխիթարյանը, Յուրա Մովսիսյանն ու Արաս Օզբիլիսը բացակայում էին Հայաստանի հավաքականի կազմից, պարտությունը Սերբիայի պես թիմից միակ խելամիտ ելքն էր թվում, բայց ֆուտբոլը ճշգրիտ գիտություն չէ ու խաղն ավարտվեց 1-1 հաշվով, մենք նույնիսկ կարող էինք հաղթել, եթե Մարկոսի իրացրած 11-մետրանոցից հետո գնդակը հայտնվեր ցանցում։
Այսօր մեր հայտացուցակից կբացակայեն նաև Կամո Հովհաննիսյանն ու Կառլեն Մկրտչյանը։ Ինչպես նախախաղային ասուլիսի ժամանակ ասաց մեր ընտրանու գլխավոր մարզիչ Արմեն Գյուլբուդաղյանցը՝ հարցականի տակ է նաև Արտակ Գրիգորյանի մասնակցությունը։
«Մեր թիմի ավագն ու առաջնորդը, մեր գոլահարն ու ֆուտբոլային ուղեղը բացակայելու է։ Հենրիխի հետ մենք ավելի վստահ ու համարձակ ենք խաղում, բայց ես վստահ եմ, որ կհամախմբվենք ու լավ ֆուտբոլ կցուցադրենք, քանի որ բարդ հանդիպում է սպասվում»,- ասել է Գյուլբուդաղյանցը։
Առանց մրցակցին թերագնահատելու միտումի, այնուամենայնիվ, հանուն արդարության պետք է նշել, որ Լիխտենշտեյնն այս խաղում ֆավորիտ չէ և դա ցույց է տալիս նաև վիճակագրությունը։ Եվրո-2020-ի որակավորման փուլի 6 խաղերից 5-ում Լիխտենշտեյնի ընտրանին պարտություն է կրել, մեկ անգամ էլ ոչ-ոքի ավարտել Հունաստանի դեմ խաղը։
Ամեն դեպքում այս հանդիպումը լավ առիթ է ապացուցելու, որ մեր թիմը մեկ ամբողջություն է և կարող է առանց գլխավոր առաջատարի ու նաև հանուն նրա կատարել իր առաջադրանքն ու լուրջ հայտ ներկայացնել այս պահին J խմբի երկրորդ հորիզոնականում հանգրվանած Ֆինլանդիայի ընտրանուն։
Հավատում ենք, որ այսօր «Ռեյնպարկ» մարզադաշտում ամենից բարձր լսվելու են հայ երկրպագուների ձայներն ու ամենից բարձր ծածանվելու է Հայաստանի Հանրապետության դրոշը։
Ստելլա Բաբլոյան
