Կոնֆերենցիաների լիգայի որակավորման 2-րդ փուլի պատասխան խաղում Երևանի «Արարատը» Վրոցլավում 3:3 հաշվով ավարտեց հանդիպումը լեհական «Շլյոնսկի հետ» և դիմակայությունում զիջելով 7:5 հաշվով դուրս մնաց եվրագավաթային ընթացիկ մրցաշրջանից:
«Արարատի» գլխավոր մարզիչ Վարդան Բիչախչյանը «Շլյոնսկի» հետ խաղից հետո մեկնաբանել է թիմի խաղը։ Երևանյան ակումբի մամուլի ծառայությունը հրապարակել է տեսանյութ՝ հետխաղային մամուլի ասուլիսից։
«Առաջին խաղից հետո բարդ վիճակում էինք ու այս հանդիպման խաղասկիզբն էլ հաջող չդասավորվեց։ Հետո կարողացանք խաղը կարգավորել և երկու գոլ խփել։ Երկրորդ կեսը լավ չսկսեցինք, կորավ այն արագությունը, որը կար առաջին խաղակեսում ու կրկին ստանդարտ դրությունից գոլ բաց թողեցինք։ Աբսուրդ է․ երկու խաղերում 5 գոլ խփեցինք, բայց, ցավոք, չկարողացանք երկրորդ փուլի արգելքը հաղթահարել, քանի որ տարրական սխալները բավականին շատ էին, իսկ նման խաղերում սխալները չեն ներվում։ Շնորհավորում եմ «Շլյոնսկին» հաջորդ փուլ դուրս գալու կապակցությամբ ու հաջողություն մաղթում»։
— Առաջին կեսից հետո ի՞նչ ասեցիք Ձեր ֆուտբոլիստներին և ո՞րն էր խաղի ծրագիրը երկրորդ կեսում։
— Պահպանել հանգստությունը, ոչ մի դեպքում վա բանկ չգնալ․ մեծ ուշադրություն դարձնել պաշտպանությանը։ Իմ կարծիքով երկրորդ կեսի մեր խնդիրն այն էր, որ չկարողացանք պահել առաջին կեսի արագությունը։ Մեր խնդիրը հիմնականում երկու խաղերում անընդմեջ ստանդարտ դրություններից գոլ բաց թողելն էր։
— Շատ հիասթափվա՞ծ եք երկրորդ կեսից հետո։
— Կարելի է ասել՝ այո։ Կարծում եմ, որ այն ինչ ակնկալում էինք երկրորդ խաղակեսում, չկարողացանք կատարել։
— Ո՞ր մրցակիցն էր ավելի հզոր՝ «Ֆեհերվարը», թե «Շլյոնսկը»։
— Չեմ կարող առանձնացնել։ Հարգանք եմ տածում երկու ակումբների նկատմամբ էլ, նրանք յուրաքանչյուրն ունեն իրենց խաղաոճը։ Տարբերությունն այն էր, որ մեր պաշտպանությունը «Ֆեհերվարի» դեմ խաղերում նման սխալներ թույլ չտվեց։
— Ո՞վ էր «Շլյոնսկի» լավագույն խաղացողը
— Կառանձնացնեմ 23 համարով խաղացող ֆուտբոլիստին՝ Գարսիա Մարինին։ Ինչպես նաև 7 համարով հանդես եկով Ռոբերտ Պիխին և 9 համարի մարզաշապիկով խաղացող Էրիկ Էքսպոսիտոյին։ Պետք է առանձնացնել նաև պաշտպանական գծի խաղացողներին, որոնք լավ էին գործում ստանդարտ իրավիճակներում։
Աղբյուր՝ ՖԱ Արարատ