Գյումրիի «Շիրակի» երկարամյա ավագ Աղվան Դավոյանն օրերս հեռացավ հարազատ թիմից ու համալրեց Երևանի «Ալաշկերտի» կազմը։
Որոշման պատճառների, Գյումրիի թիմում անցկացրած ժամանակշրջանի, նոր հեռանկարների ու երևանյան թիմում իր առջև դրված խնդիրների մասին ArmSport-ը զրուցել է 31-ամյա գյումրեցի ֆուտբոլիստի հետ․
-Աղվան, ինչպե՞ս կայացրիք «Շիրակից» հեռանալու որոշումը, որտեղ Ձեր ամբողջ կարիերան էիք անցկացրել։
— Եթե չեմ սխալվում՝ 12 մրցաշրջան անընդմեջ խաղացել եմ «Շիրակի» կազմում, բայց մրցաշրջանի ավարտից հետո թիմում անորոշ վիճակ էր։ Ունեցա զրույց «Ալաշկերտի» նախագահի հետ, եկանք համաձայնության, ու հիմա այս ակումբում եմ։
-«Շիրակն» այսօր պաշտոնապես հայտարարեց, որ հաջորդ մրցաշրջանից հանդես չի գա Հայաստանի Բարձրագույն խմբում։ Ինչպե՞ս ընդունեցիք այս լուրը։
— Մեծ ցավով: Հուսով եմ՝ սա միակ ու վերջին մրցաշրջանը կլինի ու «Շիրակը» նորից կվերադառնա ուժեղագույնների լիգա։
«Շիրակը» միշտ գյումրեցիների ուշադրության կենտրոնում է՝ անկախ նրանից, թե ինչքան մարդ է ներկա լինում խաղերին, ու հանդիսանում է մարզում ֆուտբոլի հաճախող երեխաների գլխավոր մոտիվացիան։
-Իսկ ի՞նչ կասեք «Շիրակի» երկրպագուներին։
-Կասեմ, որ դուք ֆանտաստիկ եք՝ թե՛ մարզադաշտում, թե՛ դրանից դուրս։ Սիրում եմ բոլորիդ, շնորհակալ եմ բոլորիցդ ու կկարոտեմ։
-Ինչպե՞ս կամփոփեք «Շիրակում» անցկացրած ժամանակաշրջանը։
-Ուղղակի հիանալի տարիներ եմ անցկացրել՝ շատ բուռն հիշողություններով լի։ Ակումբի հետ մի շարք անմոռաց պահեր եմ ունեցել, ինչպես օրինակ Հայաստանի չեմպիոնությունը 12-13 թթ, երկու անգամ գավաթ նվաճելը, Եվրագավաթներում «Դիլայի» և «Զրինսկիի» հետ դիմակայությունները։
-«Ալաշկերտին» ի՞նչ տրամադրվածությամբ եք միացել, ու ի՞նչ զգացողություններ կան երկարամյա մրցակցի կազմը համալրելուց հետո։ Թիմում ի՞նչ մթնոլորտ է տիրում։
-Սա ֆուտբոլ է։ Ես երկար տարիներ մրցակցել եմ ինչպես «Ալաշկերտի», այնպես էլ մնացած բոլոր հայկական և ոչ հայկական թիմերի հետ։ Հիմա ես «Ալաշկերտում» եմ ու ամեն ինչ կանեմ թիմին օգնելու համար։ Մթնոլորտը թիմում շատ լավ է, մեծ մասին ճանաչում էի մինչ տեղափոխվելս։
-Ի՞նչ խնդիրներ եք դրել Ձեր առջև։
-Թիմում մեծ մրցակցություն կա բոլոր դիրքերի վրա, ու իմ խնդիրն է լավ մարզվել, լավ աշխատել, «Ալաշկերտի» կազմում դառնալ չեմպիոն ու եվրագավաթներում հասնել խմբային փուլ, ինչը համարում եմ իրատեսական։
-Իսկ ՉԼ-ի առաջիկա խաղարկությունից ի՞նչ սպասելիքներ ունեք։ Շատերի կարծիքով «Ալաշկերտի» բախտը բերել է վիճակահանության առումով։ Թիմում ինչպե՞ս եք տրամադրված Ուելսի չեմպիոնի հետ առաջիկա խաղին։
-Չեմպիոնների լիգայում չեն լինում թույլ մրցակիցներ։ Ուսումնասիրել ենք մրցակցին, ուժային ֆուտբոլ են խաղում։ Իսկ մենք մարտական ենք տրամադրված, մեծ ոգևորությամբ ու բարձր կենտրոնացումով պատրաստվում ենք այդ խաղերին։
-Իսկ անձամբ Ձեզ համար ՉԼ վերադառնալը ի՞նչ զգացողություններ է առաջացրել, փաստորեն վերջին անգամ 13/14-ին եք մասնակցել Չեմպիոնների լիգային։
-Տարբեր են մի քիչ. այն ժամանակ մի ամբողջ մրցաշրջան խաղացել ու իմ ներդրումն եմ ունեցել ՉԼ ուղեգիր ձեռք բերելու համար, իսկ հիմա մրցաշրջանի ավարտից հետո եմ միացել թիմին։ Բայց բոլոր դեպքերում շատ ուրախ եմ։